DI BAYBUL IN ANSA TO SƆM KWƐSTYƆN DƐN
Wi go ɛva gɛt wan gɔvmɛnt we go rul di wan ol wɔl?
Aw wan gɔvmɛnt go mek pipul dɛn ɔlsay na di wɔl gɛt wanwɔd? Ayzaya 32:1, 17; 54:13
Tink bɔt aw mɔtalman go bɛnifit we wan gɔvmɛnt rul di wɔl. Tide, bɔku pipul dɛn de sɔfa bikɔs dɛn po, bɔt ɔda pipul dɛn de we rili jɛntri. Bɔt if wan gɔvmɛnt we gɛt sɔri-at rul di wan ol wɔl, ɔlman go gɛt wetin dɛn nid. Yu tink se mɔtalman go ɛva gɛt da kayn gɔvmɛnt de?—Rid Jɛrimaya 10:23.
Fɔ lɔng tɛm naw, mɔtalman gɔvmɛnt nɔ ebul fɔ kia fɔ di wan dɛn we dɛn de rul, mɔ di wan dɛn we po. Sɔm gɔvmɛnt dɛn wikɛd. (Ɛkliziastis 4:1; 8:9) Bɔt di Ɔlmayti Gɔd dɔn prɔmis fɔ gi wi wan gɔvmɛnt we go pul ɔl mɔtalman gɔvmɛnt. Di Pɔsin we de rul da gɔvmɛnt de, go rili kia fɔ pipul dɛn.—Rid Ayzaya 11:4; Daniɛl 2:44.
Wetin Gɔd in Kiŋdɔm Go Du?
Jiova Gɔd dɔn pik in pafɛkt Pikin we na Jizɔs, fɔ rul di wan ol wɔl. (Lyuk 1:31-33) We Jizɔs bin de na di wɔl as mɔtalman, i bin rili lɛk fɔ ɛp pipul dɛn. As Kiŋ, i go mek pipul dɛn ɔlsay na di wɔl gɛt wanwɔd ɛn i go mek dɛn lɛf fɔ sɔfa.—Rid Sam 72:8, 12-14.
Bɔt na ɔlman dɔn gri fɔ lɛ Jizɔs bi dɛn Rula? Nɔ, nɔto ɔlman. Bɔt Jiova na Gɔd we peshɛnt. (Pita In Sɛkɔn Lɛta 3:9) I de gi pipul dɛn di chans so dat dɛn go gri fɔ lɛ Jizɔs rul dɛn. I nɔ go te igen, Jizɔs go pul ɔl di bad pipul dɛn na di wɔl ɛn mek pis ɛn kolat de ɔlsay na di wɔl.—Rid Mayka 4:3, 4.