Lɛ Wi Tray fɔ Du Dis we Wi De Prich—Rayt Pipul dɛn Nem ɛn Ɔda Tin dɛn We Yu Nid fɔ No

“Yu fɔ bikyaful wetin yu de du ɛn wetin yu de lan pipul.” (1 Tim. 4:16) Dis advays we Pɔl bin gi to Timoti sho wi se wi fɔ tray fɔ du tin dɛn we go ɛp wi fɔ du mɔ we wi de prich ilɛksɛf wi jɔs bigin prich ɔ i dɔn te we wi de prich. Wan tin we go ɛp wi fɔ du dat na di nyu pat we gɛt fɔ de kam na Wi Kiŋdɔm Ministri. Di pat in taytul na “Lɛ Wi Tray fɔ Du Dis we Wi De Prich.” Dɛn pat ya gɛt difrɛn difrɛn tɔpik dɛn. Ɛni tɔpik go tɔk bɔt wan impɔtant tin we wi fɔ du we wi de prich, ɛn i go sho wi bak aw wi fɔ du am. Insay da mɔnt de, i go fayn fɔ mek ɔlman tray fɔ du dat. We di mɔnt dɔn, wan Savis Mitin pat go de we go gi wi chans fɔ lɛ wi tɔk bɔt aw wi bɛnifit we wi du wetin di pat se. Ɛn wi go gɛt di chans bak fɔ tɔk bɔt di fayn fayn ɛkspiriɛns dɛn we wi bin gɛt insay da mɔnt de. Dis mɔnt, dɛn de ɛnkɔrej wi fɔ rayt pipul dɛn nem ɛn ɔda tin dɛn we wi nid fɔ no bɔt dɛn.

Wetin Mek Dis Impɔtant: Fɔ lɛ wi du di wok we Gɔd dɔn gi wi, nɔto prich nɔmɔ wi fɔ prich. Wi fɔ go bak to di wan dɛn we want fɔ no mɔ bɔt Gɔd ɛn tich dɛn. We wi du dis, i go tan lɛk se wi de wata di sid we wi bin dɔn plant na dɛn at. (Mat. 28:19, 20; 1 Kɔr. 3:6-9) Dis min se wi fɔ go fɛn di pɔsin bak, tɔk bɔt di tin dɛn we de wɔri di pɔsin, ɛn bɔt di tin dɛn we wi ɛn di pɔsin bin dɔn tɔk bɔt. So ɛnitɛm we wi mit pɔsin we want fɔ no mɔ bɔt Gɔd, wi fɔ rayt di pɔsin in nem ɛn ɔda tin dɛn we wi nid fɔ no bɔt am.

Aw fɔ Du Am:

• Mek shɔ se yu gɛt sɔntin na yu bag we yu go yuz fɔ rayt di pɔsin in nem ɛn ɔda tin dɛn we yu nid fɔ no. Kip di tin dɛn we yu dɔn rayt klin ɛn nit, ɛn nɔ skata skata dɛn. Mek shɔ se yu rayt ɔltin we yu nid fɔ no. Du ɔl dis jɔs afta yu dɔn fɔ tɔk to di pɔsin.

• Rayt sɔm tin dɛn bɔt di pɔsin. Wetin na di pɔsin in nem, in adrɛs, in fon nɔmba ɔ in imel? Wetin yu lan bɔt di pɔsin ɛn in famili we rili impɔtant? Di pɔsin gɛt pikin dɛn? Ɛnibɔdi de na in os we sik?

• Rayt ɔltin we una tɔk bɔt. Us skripchɔ dɛn yu rid? Wetin di pɔsin se bɔt di tin dɛn we i biliv? Us buk, magazin, ɔ ɛni ɔda tin we yu lɛf gi am? Rayt di tɛm, di de, ɛn di det we yu go de.

• Rayt wetin yu plan fɔ du we yu go bak to di pɔsin. Wetin yu tɛl am se una go tɔk bɔt? Ustɛm yu tɛl am se yu de go bak to am?

• Ɛnitɛm we yu go bak to di pɔsin, na fɔ rayt di nyu tin dɛn we yu lan bɔt di pɔsin ɔ in famili. I nɔ bad fɔ rayt bɔku tin dɛn we yu nid fɔ no bɔt am.

Tray fɔ Du Dis Insay Dis Mɔnt:

• We yu de rayt bɔt pɔsin we want fɔ no mɔ bɔt Gɔd, na fɔ tɛl di pɔsin we una ɔl tu de prich wetin yu de rayt.