Yuz Dis Chans!
Di Mɛmorial We De Kam Go Ɛp Wi fɔ Sho Se Wi Gɛt Tɛnki
1. Us chans wi go gɛt insay di tɛm fɔ di Mɛmorial?
1 Di Mɛmorial we gɛt fɔ bi Epril 14, go gi wi di chans fɔ tɛl Gɔd tɛnki ɛn fɔ sho se wi gladi fɔ Jiova in gudnɛs. Di tin we rayt na Lyuk 17:11-18 tɔk bɔt di we aw Jiova ɛn Jizɔs de si pɔsin we gɛt tɛnki. Pan di tɛn pipul dɛn we Jizɔs bin mɛn, na wangren pɔsin nɔmɔ bin kam tɛl tɛnki. Di day we Jizɔs bin kam day fɔ wi, go mek ɔlkayn sik nɔ go de igen, ɛn i go mek wi ebul fɔ gɛt layf we go de sote go tumara bambay! Fɔ tru, datɛnde wi go de tɛl Jiova tɛnki ɛvride fɔ di fayn fayn tin dɛn we i go de du fɔ wi. Insay di wik dɛn we gɛt fɔ kam, aw wi go sho se wi gɛt tɛnki?
2. Wetin wi go du fɔ sho se wi gɛt tɛnki fɔ di day we Jizɔs kam day fɔ wi?
2 Di Tin We Go Mek Wi Want fɔ Sho Se Wi Gɛt Tɛnki: We pɔsin de tink bɔt wetin dɛn du fɔ am, dat kin mek di pɔsin want fɔ sho se i gɛt tɛnki. So fɔ sho se wi gladi fɔ di day we Jizɔs kam day fɔ wi, i go fayn mek wi yuz di spɛshal Mɛmorial Baybul ridin, lɛk di wan we de na apɛndiks B12 na di nyu New World Translation, di 2014 kalɛnda ɛn na di deli tɛks. I go fayn mek wi ɛn wi famili tɔk bɔt am. As wi de tink gud wan ɛn tɔk bɔt wetin Jiova ɛn Jizɔs dɔn du fɔ wi, dat go mek wi rili gladi fɔ di day we Jizɔs kam day fɔ wi. Ɛn dis go mek wi want fɔ du fayn fayn tin dɛn.—2 Kɔr. 5:14, 15; 1 Jɔn 4:11.
3. Aw wi go sho se wi gɛt tɛnki insay di tɛm fɔ di Mɛmorial?
3 Sho Se Wi Gɛt Tɛnki: Pɔsin go sho se i gɛt tɛnki bay di tin we i de du. (Kɔl. 3:15) Wan pan di man dɛn we bin gɛt lɛprɔsi, bin waka fɔ go fɛn Jizɔs fɔ tɛl am tɛnki. Wi shɔ se i bin ivin go ɛn tɛl pipul dɛn bɔt di mirekul we Jizɔs du fɔ mɛn dɛn. (Lyuk 6:45) Di tɛnki we wi gɛt fɔ di day we Jizɔs kam day fɔ wi, fɔ mek wi jɔyn fɔ invayt pipul dɛn fɔ kam na di Mɛmorial. Wan ɔda we aw wi go sho se wi gɛt tɛnki na bay we wi go ɔgzilari payɔnia ɛn du mɔ na di prichin wok insay di tɛm fɔ di Mɛmorial. Di ivintɛm fɔ di Mɛmorial, i go fayn mek wi de na di Kiŋdɔm Ɔl fɔ de grit di wan dɛn we wi invayt fɔ kam di Mɛmorial ɛn mek dɛn no se wi rɛdi fɔ ansa ɛni kwɛstyɔn we dɛn gɛt.
4. Wetin wi fɔ du so dat wi nɔ go fil am we dis Mɛmorial pas?
4 Na dis Mɛmorial go bi di las wan? (1 Kɔr. 11:26) Wi nɔ no. Bɔt wi no se we dis tɛm ya go dɔn pas, na so bak di chans fɔ sho se wi gɛt tɛnki fɔ Jiova in gudnɛs, go pas. Yu go yuz dis chans we yu gɛt? Lɛ ɔl wetin wi de tɔk ɛn ɔl wetin de na wi at, mek Jiova we mek in Pikin kam day fɔ wi, gladi!—Sam 19:14.