Aw fɔ Ɛp di Wan dɛn we Nɔ Sabi Rid Fayn

1. Wetin mek i nɔ kin izi fɔ tich di wan dɛn we nɔ sabi rid fayn?

¹ Bɔku pipul dɛn kin rili want fɔ no mɔ bɔt Jiova, bɔt dɛn nɔ kin sabi rid fayn, so dɛn kin fred we dɛn si Baybul ɔ ɛni ɔda big buk. If yu gi dɛn pipul ya di Baybul Tich buk di fɔs tɛm we yu mit dɛn, dat go mek i at fɔ stɔdi dɛn. Wetin wi go du fɔ ɛp dɛn fɔ lan mɔ bɔt Jiova? Wi dɔn aks bɔku pɔblisha dɛn we gɛt ɛkspiriɛns na lɛk 20 difrɛn kɔntri dɛn, bɔt wetin dɛn kin du fɔ ɛp pipul dɛn we nɔ sabi rid fayn. Dis na wetin dɛn se.

2. Us buk dɛn go ɛp di wan dɛn we nɔ sabi rid fayn?

² If di pɔsin we yu de stɔdi nɔ sabi rid fayn ɔ i nɔ sabi rid atɔl, i go fayn fɔ yuz ɛniwan pan dɛn smɔl buk ya, Lisin to Gɔd ɔ Lisin to Gɔd ɛn De Sote Go. Wan brɔda we de payɔnia na Amɛrika kin sho ɔl tu di smɔl buk dɛn to di pɔsin ɛn aks am us wan mɔ i fil se i go ebul rid. Di branch ɔfis na Kenya bin ripɔt se dɛn smɔl buk ya dɔn rili ɛp dɛn bikɔs na Afrika, pipul dɛn kin lan kwik kwik wan we dɛn de pul stori fɔ dɛn pas we dɛn de aks dɛn kwɛstyɔn fɔ mek dɛn ansa. I kin izi fɔ pɔsin we go skul fɔ gri fɔ rid ɛn gi ansa to kwɛstyɔn dɛn, bɔt fɔ pɔsin we nɔ go bɛtɛ skul, i nɔ kin izi. If di pɔsin sabi rid smɔl, bɔku pɔblisha dɛn kin stat wit ɔda smɔl buk dɛn lɛk, Gɔd Gɛt Gud Nyus fɔ Wi! ɔ Aw Yu Go Bi Gɔd in Padi? ɔ sɔntɛm Mi Baybul Stori Buk.

3. Wetin wi fɔ no bɔt pɔsin we nɔ sabi rid we go ɛp wi fɔ ebul tich am fayn?

³ Tɛl Dɛn Tɛnki: Di wan dɛn we nɔ sabi rid kin shem ɔ fil bad bɔt dɛnsɛf. Fɔ ɛp dɛn fɔ fil gud bɔt dɛnsɛf na wan we fɔ mek wi tich dɛn di tru we de na di Baybul. Bɔku pipul dɛn we nɔ sabi rid gɛt sɛns ɛn kin lan kwik. So i fayn fɔ rɛspɛkt di pɔsin ɛn mek i fil gud bɔt insɛf. (1 Pit. 3:15, 16a) Dɛn go want fɔ kɔntinyu fɔ stɔdi if dɛn fil se wetin dɛn de du fayn, ɛn dɛn rili de go bifo pan Gɔd in wok. So i fayn fɔ tɛl dɛn tɛnki ɔltɛm.

4. Wetin wi fɔ du fɔ ɛnkɔrej di wan dɛn we nɔ sabi rid fayn fɔ stɔdi dɛn buk bifo wi kam fɔ stɔdi dɛn?

⁴ Ilɛksɛf di pɔsin nɔ sabi rid fayn, ɛnkɔrej am fɔ de tray fɔ rid wetin una gɛt fɔ stɔdi bifo tɛm. Sɔm pɔblisha dɛn na Sawt Afrika kin ɛnkɔrej dɛn stɔdi dɛn fɔ aks pɔsin na dɛn famili ɔ dɛn padi we sabi rid fɔ ɛp dɛn. Wan brɔda na Briten kin ɛnkɔrej in Baybul stɔdi dɛn fɔ stɔdi fɔs bifo i kam to dɛn. Aw i kin du dis? I kin gi dɛn in buk fɔ wan ɔ tu paregraf we dɛn de stɔdi so dat dɛn go si se i izi fɔ fɛn di ansa if dɛn bin dɔn ɔndalayn am. Wan brɔda na India kin ɛnkɔrej in stɔdi dɛn fɔ luk di pikchɔ dɛn we dɛn gɛt fɔ lan bɔt di nɛks tɛm we dɛn gɛt fɔ stɔdi ɛn tink bɔt am gud wan bifo tɛm.

5. Aw wi go sho se wi peshɛnt we wi de stɔdi pɔsin we nɔ sabi rid fayn?

⁵ Peshɛnt wit Dɛn: Ilɛk us buk una de stɔdi, pe atɛnshɔn mɔ to di men pɔynt ɛn ɛp di pɔsin fɔ ɔndastand am gud gud wan. We una bigin, i nɔ bad fɔ yuz 10 to 15 minit fɔ stɔdi di pɔsin. Nɔ tray fɔ stɔdi di pɔsin bɔku bɔku tin, du smɔl ɛnitɛm we una stɔdi. I fayn fɔ peshɛnt wit di pɔsin if i de rid wan wan. As di pɔsin de gladi mɔ fɔ wetin i de lan bɔt Jiova, dat go mek i rili want fɔ lan fɔ rid fayn. Fɔ ɛp di pɔsin mɔ, i go fayn fɔ invayt am na mitin frɔm di tɛm we una bigin stɔdi.

6. Wetin wi go du fɔ ɛp pɔsin fɔ lan fɔ rid?

⁶ If wi Baybul stɔdi dɛn lan fɔ rid fayn, dat go mek dɛn go bifo pan Gɔd in wok kwik kwik wan. (Sam 1:1-3) Bɔku pɔblisha dɛn dɔn ɛp dɛn stɔdi we dɛn yuz wan buk we nem Apply Yourself to Reading and Writing, fɔ smɔl tɛm ɛnitɛm we dɛn dɔn fɔ stɔdi. If di stɔdi fil bad bɔt insɛf, yu kin ɛp am fɔ tink gud bɔt insɛf bay we yu tɛl am bɔt sɔntin dɛn we i dɔn tray fɔ lan. Mek di pɔsin no se Jiova go blɛs am fɔ wetin i de du ɛn ɛnkɔrej am fɔ pre mek Jiova ɛp am. (Prɔv. 16:3; Jɔn In Fɔs Lɛta 5:14, 15) Sɔm pɔblisha dɛn na Briten kin ɛnkɔrej dɛn stɔdi dɛn fɔ plan fɔ du sɔntin we dɛnsɛf no se dɛn go ebul fɔ du. Sɔntɛm dɛn go bigin lan ABC, lan fɔ fɛn ɛn rid sɔm skripchɔ dɛn, ɛn fɔ rid frɔm di izi buk ɛn magazin dɛn we de tɔk bɔt di Baybul. Fɔ ɛp pɔsin fɔ lan aw fɔ rid nɔ jɔs min se wi sho am aw fɔ du am, bɔt wi fɔ mek di pɔsin sɛf want fɔ du am.

7. Wetin mek wi nɔ fɔ fred fɔ prich to pipul dɛn we nɔ sabi rid fayn?

⁷ Jiova lɛk di wan dɛnsɛf we nɔ lan buk. (Job 34:19) Na di pɔsin in at Jiova de luk. (1 Krɔ. 28:9) So nɔ fred fɔ prich to pipul dɛn we nɔ sabi rid fayn. Yu gɛt bɔku fayn fayn buk dɛn fɔ bigin wit we go ɛp yu. As tɛm de go, yu kin bigin di Baybul Tich buk wit di pɔsin ɛn ɛp am fɔ rili ɔndastand di Baybul gud gud wan.