Aw Ɔlman na di Kɔngrigeshɔn Go Ɛp Baybul Studɛnt dɛn Te Dɛn Baptayz?

1-2. Udat dɛn go ebul ɛp Baybul studɛnt te i baptayz?

WAN sista we nem Emi, we de na Fiji bin se: “A bin lɛk wetin a bin de lan we a bin de stɔdi di Baybul. A bin no se na di tru a de lan. Bɔt na we a stat fɔ spɛn tɛm wit di brɔda ɛn sista dɛn na in a bin ebul fɔ mek chenj dɛn na mi layf ɛn baptayz.” Emi in ɛkspiriɛns ɛp wi fɔ no wan impɔtant tin: I kin izi fɔ lɛ Baybul studɛnt go bifo pan in stɔdi te i baptayz we ɔda brɔda ɛn sista dɛn na di kɔngrigeshɔn de ɛp am.

² Ɔl di brɔda ɛn sista dɛn na di kɔngrigeshɔn go ebul du sɔntin fɔ ɛp nyu wan dɛn fɔ de na di kɔngrigeshɔn wit wi. (Ɛfi. 4:​16) Wan payɔnia sista we nem Lelani, we de na Vɛnuatu bin se: “Wan parebul de we se: ‘Na wan pɔsin de bɔn, bɔt nɔto wan pɔsin de mɛn.’ A tink se na di sem tin wi go se we i kam to fɔ mek disaypul dɛn. Bɔku tɛm, na di wan ol kɔngrigeshɔn kin ɛp pɔsin fɔ kam sav Jiova.” Sɔm pan di wan dɛn we kin ɛp fɔ mɛn pikin te i big na in mama ɛn papa dɛn, in ɔda fambul dɛn, pipul dɛn we na padi to di famili, ɛn in ticha dɛn na skul. Dɛn kin du dat bay we dɛn de ɛnkɔrej di pikin ɛn tich am impɔtant tin dɛn. Semweso, brɔda ɛn sista dɛn na di kɔngrigeshɔn kin ɛp Baybul studɛnt dɛn te dɛn baptayz bay we dɛn kin advays dɛn, ɛnkɔrej dɛn, ɛn sɛt fayn ɛgzampul fɔ dɛn.—Prɔv. 15:​22.

3. Wetin yu lan frɔm wetin Ana, Devid, ɛn Lelani tɔk?

³ Wetin mek di pɔblisha we de kɔndɔkt di Baybul stɔdi fɔ gladi we ɔda brɔda ɛn sista dɛn de ɛp di studɛnt? Notis wetin Ana, we na spɛshal payɔnia na Mɔldova bin tɔk. I se, “We Baybul studɛnt dɛn kin stat fɔ go bifo pan dɛn stɔdi, dɛn kin nid ɛp wit bɔku tin dɛn. Bɔt i nɔ kin izi fɔ lɛ Baybul ticha in wangren ɛp Baybul studɛnt wit ɔl di tin dɛn we i nid.” Wan brɔda we nem Devidb we insɛf na spɛshal payɔnia na Mɔldova bin se, “Bɔku tɛm, ɔda brɔda ɛn sista dɛn kin tɔk sɔntin we kin rili tɔch di studɛnt in at, ɛn i kin bi sɔntin we mi nɔ bin dɔn ɛva tink bɔt.” Lelani tɔk bɔt wan ɔda rizin we mek wi fɔ gladi we ɔda brɔda ɛn sista dɛn de ɛp di studɛnt. I se, “We di studɛnt de si se di brɔda ɛn sista dɛn lɛk am ɛn dɛn bisin bɔt am, dat de ɛp am fɔ no se wi na Jiova in pipul dɛn fɔ tru.”—Jɔn 13:​35.

4. Wetin wi go tɔk bɔt insay dis atikul?

⁴ Sɔntɛm yu go de tink to yusɛf se, ‘Wetin mi go ebul du fɔ ɛp Baybul studɛnt we mi nɔto in ticha?’ Lɛ wi tɔk bɔt wetin wi go du we wan brɔda ɔ sista aks wi fɔ jɔyn am fɔ kɔndɔkt Baybul stɔdi. Wi go tɔk bak bɔt wetin wi go du we Baybul studɛnt stat fɔ atɛnd mitin. Dɔn wi go tɔk bɔt aw ɛlda dɛn kin ɛp Baybul studɛnt dɛn te dɛn baptayz.

WETIN YU FƆ DU WE YU JƆYN WAN BRƆDA Ɔ SISTA FƆ KƆNDƆKT BAYBUL STƆDI?

5. If brɔda ɔ sista aks yu fɔ jɔyn am fɔ kɔndɔkt Baybul stɔdi, wetin yu fɔ du?

⁵ Na di Baybul ticha na di men pɔsin we de ɛp di studɛnt fɔ ɔndastand Gɔd in Wɔd. If di ticha aks yu fɔ jɔyn am, yu fɔ si yusɛf as in patna bikɔs yu de go de fɔ sɔpɔt am. (Ɛkli. 4:​9, 10) Bɔt wetin yu go du fɔ ɛp mek di Baybul stɔdi go kɔmɔt fayn?

6. We yu gɛt fɔ jɔyn wan brɔda ɔ sista fɔ kɔndɔkt Baybul stɔdi, aw yu go fala di prinsipul we de na Prɔvabs 20:​18?

⁶ Pripia fɔ di Baybul stɔdi. Fɔs, aks di ticha lɛ i tɛl yu smɔl tin bɔt di studɛnt. (Rid Prɔvabs 20:​18.) Yu kin aks am kwɛstyɔn dɛn lɛk: “Wetin yu no bɔt di studɛnt? Us lɛsin una gɛt fɔ stɔdi? Wetin yu go want lɛ di studɛnt lan frɔm dis stɔdi? Ɛnitin de we a fɔ du ɔ we a nɔ fɔ du ɔ tɔk we wi de du di stɔdi? Aw a go ebul fɔ ɛnkɔrej am fɔ go bifo?” Wɛl, wi no se wi nɔ go aks di ticha fɔ tɛl wi sɔntin we di studɛnt nɔ go want fɔ mek wi no bɔt am, bɔt ɛnitin we i tɛl wi kin ɛp wi. Wan mishɔnari we nem Jɔy kin tɔk bɔt dɛn tin dɛn ya wit pɔblisha we kin jɔyn am fɔ kɔndɔkt Baybul stɔdi. I bin se: “Dɛn tin dɛn ya we a kin tɛl mi patna kin mek i gladi fɔ ɛp di studɛnt, ɛn i kin ɛp am fɔ no wetin i fɔ tɔk we wi de du di stɔdi.”

7. Wetin mek yu nid fɔ pripia we yu de jɔyn wan brɔda ɔ sista fɔ kɔndɔkt Baybul stɔdi?

⁷ If wan brɔda ɔ sista aks yu fɔ jɔyn am fɔ kɔndɔkt Baybul stɔdi, i go fayn fɔ lɛ yu pripia di lɛsin we una gɛt fɔ go du. (Ɛzra 7:​10) Devid, we wi bin dɔn tɔk bɔt bin se: “A kin gladi we mi patna pripia fɔ di stɔdi, bikɔs dat kin ɛp fɔ lɛ i mek fayn kɔmɛnt dɛn.” Dɔn bak, i go bi se di studɛnt go notis se yu ɛn in ticha pripia fayn fayn wan fɔ di stɔdi, ɛn i go si se na fayn ɛgzampul una de sɛt fɔ am. Ilɛksɛf yu nɔ ebul pripia fayn fayn wan fɔ di stɔdi, i go fayn fɔ lɛ yu spɛn sɔm tɛm fɔ no di men pɔynt dɛn we di lɛsin de tɔk bɔt.

8. Wetin yu go du fɔ lɛ yu go ebul pre bɔt patikyula tin dɛn we una de kɔndɔkt Baybul stɔdi?

⁸ Wan pan di impɔtant tin dɛn we wi kin du pan ɛni Baybul stɔdi, na we wi kin pre. So tink bifo tɛm bɔt wetin yu go tɔk if di Baybul ticha aks yu fɔ pre. We yu du dat, i go mɔs bi se yu go ebul pre bɔt patikyula tin dɛn fɔ di Baybul stɔdi. (Sam 141:​2) Anaɛ, we de na Jepan, stil mɛmba aw wan sista bin pre we di sista bin jɔyn in Baybul ticha fɔ stɔdi am. Anaɛ se: “A bin notis se da sista de gɛt tayt padi biznɛs wit Jiova, ɛn a bin want fɔ gɛt da kayn padi biznɛs de wit Jiova. Ɛn we i kɔl mi nem insay in prea, a bin kam fɔ no bak se i lɛk mi.”

9. Akɔdin to Jems 1:​19, wetin yu go du fɔ bi gud patna to pɔsin we de kɔndɔkt Baybul stɔdi?

⁹ Sɔpɔt di ticha we di stɔdi de go ɔn. Wan spɛshal payɔnia na Nayjiria bin se: “Gud patna de lisin fayn fayn wan we di stɔdi de go ɔn. Pan ɔl we i de mek fayn kɔmɛnt dɛn, i nɔ de tɔk bɔku bikɔs i no se na di ticha na di men pɔsin we de kɔndɔkt di stɔdi.” So aw yu go no ustɛm ɛn wetin fɔ tɔk we di stɔdi de go ɔn? (Prɔv. 25:​11) Na fɔ lisin fayn fayn wan we di ticha ɛn di studɛnt de tɔk. (Rid Jems 1:​19.) Na we yu du dat yu go ebul fɔ ɛp di rayt tɛm. Bɔt yu gɛt fɔ tink bifo yu tɔk. Fɔ ɛgzampul, yu nɔ go want fɔ tɔk bɔku, ɔ kɔt wɔd na di ticha in mɔt we i de ɛksplen sɔntin, ɔ stat fɔ tɔk bɔt difrɛn tɔpik. Bɔt yu kin ɛp fɔ mek di pɔynt we una de tɔk bɔt klia, bay we yu go mek shɔt kɔmɛnt, yuz ɛgzampul, ɔ kwɛstyɔn. Sɔntɛnde, yu go tink se yu nɔ gɛt bɔku tin fɔ tɔk bɔt wetin una de stɔdi. Bɔt if yu de tɛl di studɛnt tɛnki ɛn sho se yu rili bisin bɔt am, yu go rili ɛp am fɔ go bifo pan in stɔdi.

10. Aw yu ɛkspiriɛns go ɛp wan Baybul studɛnt?

¹⁰ Tɛl dɛn bɔt yu ɛkspiriɛns. Yu kin tɛl di studɛnt smɔl tin bɔt aw yu lan di tru, aw yu bin ebul sɔlv wan prɔblɛm we yu bin gɛt, ɔ aw Jiova dɔn ɛp yu na yu layf. Yu kin tɛl am dɛn tin dɛn ya if yu fil se i go ɛp am. (Sam 78:​4, 7) I go bi se yu ɛkspiriɛns na di ɛgzakt tin we di studɛnt nid fɔ yɛri. Sɔntɛm i go ɛp am fɔ gɛt mɔ fet ɔ i go ɛnkɔrej am fɔ go bifo pan in stɔdi te i baptayz. Ɛn i go bi bak se na yu ɛkspiriɛns go ɛp am fɔ no aw i fɔ sɔlv in prɔblɛm we i gɛt. (1 Pit. 5:​9) Gebrɛl, we na payɔnia we de na Brazil kin mɛmba wetin bin ɛp am we i bin de stɔdi di Baybul. I bin se: “We a bin de yɛri di brɔda dɛn ɛkspiriɛns, a bin kam fɔ no se Jiova de si di prɔblɛm dɛn we wi gɛt. Ɛn if dɛn bin ebul fɔ sɔlv dɛn prɔblɛm dɛn, misɛf go ebul fɔ sɔlv mi yon.”

WETIN YU FƆ DU WE DI BAYBUL STUDƐNT STAT FƆ ATƐND MITIN?

11-12. Wetin mek wi fɔ wɛlkɔm Baybul studɛnt we kin atɛnd mitin fayn fayn wan?

¹¹ Fɔ lɛ Baybul studɛnt go bifo pan in stɔdi te i baptayz, i fɔ de atɛnd mitin ɔltɛm. Dis go rili bɛnifit am. (Ibru. 10:​24, 25) I go mɔs bi se na in Baybul ticha go invayt am fɔ atɛnd mitin fɔ di fɔs tɛm. So we i kam mitin, wi ɔl kin ebul ɛnkɔrej am fɔ lɛ i kɔntinyu fɔ de kam na Kiŋdɔm Ɔl. Aw wi go du dat?

¹² Wɛlkɔm di studɛnt fayn. (Rom. 15:​7) If di studɛnt si se wi kin gladi fɔ si am na mitin, sɔntɛm dat go mek i kɔntinyu fɔ kam na Kiŋdɔm Ɔl. Yu kin go grit di studɛnt fayn ɛn sho am to ɔda brɔda ɛn sista dɛn, bɔt na fɔ tek tɛm lɛ yu nɔ mek i shem as yu de du dat. Nɔ tink se in ticha ɔlrɛdi de we de ɛp am. Na fɔ go tɔk to am bikɔs i go bi se in ticha nɔ kam yet ɔ i bizi wit ɔda wok na di Kiŋdɔm Ɔl. Lisin gud gud wan to wetin di studɛnt de tɔk ɛn sho am se yu bisin bɔt am. We yu wɛlkɔm di studɛnt fayn wan, aw dat go ɛp am? Lɛ wi tɔk bɔt Dimitri in ɛkspiriɛns. I nɔ tu te yet we i baptayz, ɛn naw i de sav as ministerial savant. We i mɛmba di fɔs tɛm we i bin atɛnd mitin, i se: “We a bin rich na di Kiŋdɔm Ɔl, a bin tinap na do. Wan brɔda bin si mi, ɛn i notis se a de fred, so i kɛr mi go insay. Bɔku brɔda ɛn sista dɛn bin kam grit mi. A bin rili sɔprayz. A bin so lɛk di we aw dɛn trit mi dat a bin de wish se wi gɛt mitin ɛvri de insay di wik. Da kayn tin de nɔ bin dɔn ɛva apin to mi.”

13. Aw di fayn we aw yu de biev go ɛp Baybul studɛnt dɛn?

¹³ Sɛt fayn ɛgzampul. Di fayn we aw yu de biev go ɛp di Baybul studɛnt fɔ no se wi na tru Kristian dɛn. (Mat. 5:​16) Vitali, we na payɔnia na Mɔldova se: “A bin kam fɔ ɔndastand di we aw di brɔda ɛn sista dɛn na di kɔngrigeshɔn bin de liv dɛn layf, aw dɛn de tink, ɛn aw dɛn de biev. Dis bin mek a biliv tranga wan se na Jiova Witnɛs dɛn na di tru rilijɔn.”

14. Aw yu ɛgzampul go ɛp Baybul studɛnt fɔ kɔntinyu fɔ go bifo pan in stɔdi?

¹⁴ Fɔ lɛ Baybul studɛnt go kwalifay fɔ baptayz, i fɔ de du di tin dɛn we i de lan. Dat nɔ kin izi fɔ du ɔltɛm. Bɔt we di studɛnt si di we aw yu de bɛnifit we yu de fala Baybul prinsipul dɛn, sɔntɛm dat go mek i want fɔ falamakata yu. (1 Kɔr. 11:​1) Tink bɔt wetin bin apin to Anaɛ we wi bin dɔn tɔk bɔt. I se: “Di brɔda ɛn sista dɛn bin ɔlrɛdi de du di tin dɛn we a bin de lan se misɛf fɔ du. We a bin de si dɛn, a bin de lan aw misɛf go ebul fɔ ɛnkɔrej ɔda pipul dɛn, aw a fɔ de fɔgiv ɛn sho lɔv. Dɛn bin de tɔk gud tin bɔt dɛn kɔmpin dɛn ɔltɛm. So a bin want fɔ falamakata dɛn.”

15. Aw Prɔvabs 27:​17 de ɛp wi fɔ si wetin mek wi fɔ bi padi to Baybul studɛnt dɛn as dɛn de kɔntinyu fɔ atɛnd mitin?

¹⁵ Mek di studɛnt yu padi. As di studɛnt de kɔntinyu fɔ atɛnd mitin, kɔntinyu fɔ sho am se yu bisin bɔt am. (Fil. 2:​4) Yu kin tray fɔ tɔk wit am so dat yu go sabi am mɔ. Dɔn bak, yu kin tɛl am se yu gladi fɔ si se i de mek chenj dɛn na in layf. Yu kin aks am bak bɔt in Baybul stɔdi, in famili, ɛn in wok. Bɔt tek tɛm lɛ yu nɔ aks am kwɛstyɔn dɛn we go mek i shem. Sɔntɛm dɛn tin dɛn ya we yu ɛn di studɛnt de tɔk bɔt go ɛp fɔ mek una bi padi. We yu mek di studɛnt yu padi, yu de ɛp am fɔ go bifo pan in stɔdi te i baptayz. (Rid Prɔvabs 27:​17, NWT.) Anaɛ na rɛgyula payɔnia naw. We i mɛmba di tɛm we i bin stat fɔ atɛnd mitin, i bin se: “As a bin de mek padi dɛn na di kɔngrigeshɔn, na so a bin de gladi fɔ atɛnd mitin ɔltɛm, ɛn a bin de atɛnd ivin we a taya. A bin lɛk fɔ de wit mi nyu padi dɛn, ɛn dis bin ɛp mi fɔ lɛ a nɔ kɔntinyu fɔ bi padi to pipul dɛn we nɔ de wɔship Jiova. A bin want fɔ kam nia Jiova ɛn di brɔda ɛn sista dɛn mɔ ɛn mɔ. So a bin disayd se a go baptayz.”

16. Us ɔda tin we yu go du fɔ ɛp Baybul studɛnt fɔ gladi fɔ de na di kɔngrigeshɔn?

¹⁶ As di Baybul studɛnt de go bifo pan in stɔdi ɛn mek chenj dɛn na in layf, ɛp am fɔ no se in na pat ɔf di kɔngrigeshɔn. Yu kin du dis bay we yu de du gud to am. (Ibru. 13:​2) We wan brɔda we nem Dɛnis, we de na Mɔldova kin mɛmba di tɛm we i bin de stɔdi, i bin se: “Bɔku tɛm, di brɔda ɛn sista dɛn bin de invayt mi ɛn mi wɛf fɔ spɛn tɛm wit dɛn. Dɛn bin de tɛl wi bɔt aw Jiova bin de ɛp dɛn, ɛn dat bin ɛnkɔrej wi. So wi bin kam fɔ no se wisɛf want fɔ sav Jiova, ɛn if wi du dat, wi go rili ɛnjɔy wi layf.” Dɔn bak, we di Baybul studɛnt kwalifay fɔ bi pɔblisha, yu kin aks am fɔ wok wit yu na fil savis. Wan brɔda we nem Diɛgo, we de na Brazil bin se: “Bɔku brɔda dɛn bin de aks mi fɔ wok wit dɛn na fil savis. Dat bin de rili ɛp mi fɔ sabi dɛn gud gud wan. As a bin de wok wit dɛn na fil savis, a bin lan bɔku tin dɛn, ɛn a bin ebul fɔ kam nia Jiova ɛn Jizɔs mɔ ɛn mɔ.”

AW ƐLDA DƐN GO ƐP?

17. Aw ɛlda dɛn go ɛp Baybul studɛnt dɛn?

¹⁷ Mek tɛm fɔ di Baybul studɛnt dɛn. Ɛlda dɛn, we una sho se una lɛk ɛn bisin bɔt di studɛnt dɛn, una kin ebul ɛp dɛn fɔ go bifo pan dɛn stɔdi te dɛn baptayz. Yu go ebul fɔ de tɔk to di Baybul studɛnt dɛn ɛnitɛm we dɛn kam mitin? Dɛn go no se yu bisin bɔt dɛn if yu mɛmba dɛn nem, mɔ we dɛn stat fɔ gi kɔmɛnt. Yu go ebul mek tɛm fɔ jɔyn wan brɔda ɔ sista we i de kɔndɔkt Baybul stɔdi? I go mɔs bi se yu go ebul fɔ ɛp di studɛnt pas aw yu tink se yu go ɛp am. Wan payɔnia sista we nem Jaki, we de na Nayjiria bin se: “Bɔku studɛnt dɛn kin sɔprayz fɔ no se di brɔda we jɔyn mi fɔ kɔndɔkt dɛn stɔdi na ɛlda. Wan Baybul studɛnt bin se: ‘Mi pastɔ nɔ go ɛva du dat. Na di wan dɛn we gɛt mɔni nɔmɔ i kin go fɛn, ɛn na pas te dɛn pe am bifo i go to dɛn.’” Da studɛnt de de atɛnd mitin naw.

18. Aw ɛlda dɛn go du wetin de na Akt 20:​28?

¹⁸ Tren ɛn ɛnkɔrej Baybul ticha dɛn. Ɛlda dɛn, una gɛt impɔtant wok fɔ ɛp pɔblisha dɛn fɔ prich ɛn tich fayn fayn wan. (Rid Akt 20:​28.) If pɔblisha de shem fɔ kɔndɔkt Baybul stɔdi we yu de de, yu kin ɛp am fɔ kɔndɔkt di stɔdi. Jaki, we wi bin dɔn tɔk bɔt bin se: “Di ɛlda dɛn kin aks mi ɔltɛm bɔt mi Baybul studɛnt dɛn. We a kin gɛt sɔm prɔblɛm dɛn we a de kɔndɔkt Baybul stɔdi, dɛn kin gi mi fayn advays dɛn.” Ɛlda dɛn kin rili du bɔku tin fɔ ɛnkɔrej Baybul ticha dɛn. (1 Tɛs. 5:​11) Jaki bin tɔk bak se: “A kin lɛk we di ɛlda dɛn de ɛnkɔrej mi ɛn tɛl mi se dɛn gladi fɔ di tranga wok we a de du. Di fayn we aw dɛn kin tɔk to mi kin mek a fil fayn lɛk we a drink kol wata we ples wam. Dɛn kin ɛp mi fɔ no se a de rili tray wit mi Baybul studɛnt dɛn, ɛn dat kin mek a gladi mɔ ɛn mɔ.”—Prɔv. 25:​25.

19. Wetin go mek wi ɔl gladi?

¹⁹ Ilɛksɛf wi nɔ gɛt Baybul stɔdi rayt naw, wi kin stil ɛp pɔsin fɔ go bifo pan Gɔd biznɛs. Wi kin ɛp di Baybul ticha bay we wi de mek fayn kɔmɛnt dɛn we wi dɔn tek tɛm pripia, ɛn we wi nɔ de tɔk bɔku pan di stɔdi. Wi kin mek di studɛnt dɛn wi padi we dɛn kam Kiŋdɔm Ɔl, ɛn wi kin sɛt fayn ɛgzampul fɔ dɛn. Ɛlda dɛn kin ɛnkɔrej di studɛnt dɛn bay we dɛn de mek tɛm fɔ dɛn. Ɛn dɛn kin ɛnkɔrej di ticha dɛn bak bay we dɛn de tren dɛn ɛn tɛl dɛn tɛnki fɔ wetin dɛn de du. Wi kin rili gladi we wi ebul fɔ du sɔntin, ilɛksɛf na smɔl tin, fɔ ɛp pɔsin fɔ lɛk ɛn sav wi Papa, Jiova.