**Lɛ Wi Tray fɔ Du Dis we Wi De Prich—Yuz di Baybul Tich Buk fɔ Sho Aw fɔ Du Baybul Stɔdi**

Wetin Mek Dis Impɔtant? Bɔku pipul dɛn nɔ go ɔndastand wetin yu min we yu se yu want fɔ stɔdi dɛn di Baybul fɔ fri. Dɛn go de tink se dɛn gɛt fɔ kram ɛn rid sɔntin, du omwɔk, ɔ sit ɛgzam. Nɔ jɔs tɛl am se yu want fɔ stɔdi am, sho am aw wi kin du am. Insay shɔt tɛm, sɔntɛm na in domɔt, yu kin sho di pɔsin aw i izi ɛn fayn fɔ stɔdi di Baybul.

Aw fɔ Du Am?

We yu dɔn sho di pɔsin yu nem, aks am if i bisin bɔt aw di tumara bambay go tan.
Tɛl am se na so bɔku pipul dɛn de tink, ɛn sho am di chapta dɛn we de insay di Baybul Tich buk. Ɛksplen to am se dis buk gɛt chapta dɛn we izi fɔ ɔndastand wetin di Baybul tich bɔt di tumara bambay ɛn ɔda tɔpik dɛn. Aks am us chapta i go rili want fɔ no mɔ bɔt.
Gi am wan buk, ɛn sho am usay di chapta we i dɔn pik de. Ɛksplen to am se di ansa fɔ di kwɛstyɔn dɛn we de na di chapta in biginin, de insay di paregraf dɛn.
If di pɔsin gri, mek lɛ i rid di fɔs paregraf. Dɔn rid di kwɛstyɔn fɔ da paregraf ɛn una tɔk bɔt di ansa togɛda. Una rid ɛn tɔk bɔt di skripchɔ dɛn we de na di paregraf we sɔpɔt di ansa. Sho am aw yu ɔndalayn di ansa na yu buk.
Afta una dɔn rid di nɛks paregraf, aks di pɔsin we yu de prich to fɔ ansa di kwɛstyɔn fɔ insɛf.
Tɛl am tɛnki ɛn arenj fɔ kam bak to am fɔ dɔn di chapta.
If nid de, tɛl di pɔsin bɔt di vidio we de na jw.org we gɛt di taytul Aw Wi Kin Stɔdi Pɔsin di Baybul?

Tray fɔ Du Dis Insay Dis Mɔnt:

Pre fɔ mek Jiova blɛs yu as yu de tray tranga wan fɔ stat Baybul stɔdi.—Fil. 2:13.
Tray fɔ yuz di Baybul Tich buk fɔ stat Baybul stɔdi ɔ ple di vidio we gɛt di taytul, Aw Wi Kin Stɔdi Pɔsin di Baybul? ilɛk na wan tɛm yu du dat we yu de prich.