Di Nyu Wɔl we De Kam Jisnɔ!

Wan gɔvmɛnt go rul di wan ol wɔl

I nɔ go te igen, Gɔd in gɔvmɛnt we de na ɛvin go rul mɔtalman. Da tɛm de, di wɔl go bi ples usay pipul dɛn gladi, gɛt wanwɔd, ɛn dɛn go de du gud wok dɛn we go mek dɛn satisfay. Gɔd dɔn pik Jizɔs Krays fɔ rul di wɔl. Tide, bɔku rula dɛn nɔ rili bisin bɔt pipul dɛn, bɔt Jizɔs in difrɛn bikɔs i go du wetin go bɛnifit pipul dɛn ɔltɛm. I go rul wit lɔv ɛn i go bi Kiŋ we gud, we gɛt sɔri-at, ɛn we de trit ɔlman fia wan.—Ayzaya 11:​4.

Pipul dɛn ɔlsay na di wɔl go gɛt wanwɔd

Insay di nyu wɔl, pipul dɛn nɔ go sheb bikɔs ɔf dɛn kɔntri ɔ trayb. Wi ɔl go bi wan. (Rɛvɛleshɔn 7:​9, 10) Ɔlman we go de na di wɔl da tɛm de go lɛk Gɔd ɛn dɛn neba, dɛn go gɛt pis, dɛn go jɔyn an ɛn wok togɛda fɔ tek kia ɔf di wɔl jɔs lɛk aw Gɔd bin want.—Sam 115:​16, NWT.

Mɔtalman go ol di wɔl fayn

We Gɔd in Kiŋdɔm go bigin rul di wɔl, Gɔd go kɔntrol ɔltin we gɛt fɔ du wit di wɛda, i go mek i nɔ gɛt wan prɔblɛm. (Di Sam Dɛm 24:​1, 2) We Jizɔs bin de na di wɔl, i sho di kayn pawa we Gɔd gi am bay we i stɔp wan big big briz, izi wan. (Mak 4:​39, 41) We Krays go de rul, nɔbɔdi nɔ go gɛt ɛni rizin fɔ fred nachɔral dizasta dɛn lɛk flɔd, ɛn atkwek. We Gɔd in Kiŋdɔm go de rul, mɔtalman go de pisful wan wit di animal dɛn ɛn wi nɔ go de pwɛl di wɔl igen.—Ozie 2:​18.

Wɛlbɔdi ɛn bɔku it go de

Ɔlman go gɛt pafɛkt wɛlbɔdi. Nɔbɔdi nɔ go sik, ol, ɔ day. (Ayzaya 35:​5, 6) Pipul dɛn go ɛnjɔy fɔ de na fayn ɛn klin ples we tan lɛk di wan we Adam ɛn Iv bin ɛnjɔy fɔ de na di gadin we bin de na Idɛn. Insay di nyu wɔl, bɔku tin fɔ it go gro ɛn ɔlman go gɛt plɛnti tin fɔ it jɔs lɛk aw i bin de bi na Idɛn. (Jɛnɛsis 2:​9) Jɔs lɛk aw i bin de bi fɔ Gɔd in pipul dɛn na Izrɛl, “it go de ɔltɛm” fɔ ɔlman na Paradays.—Lɛvitikɔs 26:​4, 5.

Rial pis go de ɛn ɔlman go sef

We Gɔd in Kiŋdɔm go de rul ɔlsay na di wɔl, ɔlman go gɛt pis ɛn dɛn go trit dɛn kɔmpin dɛn fayn ɛn fia wan. Wɔ nɔ go de, nɔbɔdi nɔ go yuz pawa di rɔng we, ɛn ɔlman go gɛt wetin i nid. Di Baybul prɔmis se: “Ɔlman go sidɔm nain fam ɔ in gadin, ɛn natin nɔ go mek dɛn de fred.”—Mayka 4:​3, 4.

Ɔlman go gɛt say fɔ de ɛn du wok we i lɛk

Ɔlman go gɛt os fɔ de ɛn dɛn nɔ go de fred se dɛn de kam pul dɛn kɔmɔt de. Ɛn ɔlman go de du wok we de bɛnifit dɛn. Jɔs lɛk aw di Baybul se, di wan dɛn we go de na di nyu wɔl “nɔ go lebɔ fɔ natin.”—Ayzaya 65:​21-23.

Pipul dɛn go lan di bɛst we

Di Baybul prɔmis se: “Di wɔl go no bɔt PAPA GƆD [“Jiova,” NWT] bɛtɛ bɛtɛ wan.” (Ayzaya 11:​9) Di wan dɛn we go de na di nyu wɔl go lan frɔm Jiova, we mek dɛn ɛn we gɛt sɛns pasmak, ɛn dɛn go lan bɔt di fayn fayn tin dɛn we i mek. Dɛn nɔ go yuz dɛn sɛns fɔ mek tin dɛn fɔ fɛt ɔ fɔ du bad to dɛn kɔmpin mɔtalman. (Ayzaya 2:​4) Bifo dat, dɛn go lan aw fɔ liv pisful wan wit dɛn kɔmpin dɛn ɛn aw fɔ tek kia ɔf di wɔl.—Di Sam Dɛm 37:​11.

Layf go de sote go

Gɔd tek tɛm mek di wɔl so dat ɛvride wi go ɛnjɔy layf gud gud wan. I want mek mɔtalman dɛn de na di wɔl sote go. (Di Sam Dɛm 37:​29; Ayzaya 45:​18) Fɔ mek wetin Gɔd want frɔm di biginin apin, i “go swɛla day sote go.” (Ayzaya 25:​8) Di Baybul prɔmis se: “Day nɔ go de igen, pwɛl at ɛn pen nɔ go de igen.” (Rɛvɛleshɔn 21:​4) Gɔd go gi ɔlman di chans fɔ de sote go, dat na, di wan dɛn we go sev we dis wikɛd wɔl go dɔn ɛn di bɔku bɔku wan dɛn we i go gi layf bak na di nyu wɔl.—Jɔn 5:​28, 29; Akt 24:​15.

Ivin naw bɔku bɔku pipul dɛn ɔlsay na di wɔl de rɛdi fɔ de ɔnda Gɔd in Kiŋdɔm we go kam jisnɔ. Pan ɔl we dɛn nɔ pafɛkt, dɛn de tray fɔ bi di kayn pipul dɛn we Gɔd go want fɔ de na in nyu wɔl. Aw? Dɛn de du dis bay we dɛn de lan bɔt Jiova Gɔd ɛn di wan we i sɛn, Jizɔs Krays.—Jɔn 17:​3.

Lan mɔ bɔt aw yu go sev we dis wɔl go dɔn ɛn liv na wan wɔl we bɛtɛ pas dis wan ɛn we de kam jisnɔ. Gri fɔ stɔdi di Baybul wit wan pan Jiova Witnɛs dɛn fɔ fri bay we una go yuz di Ɛnjɔy Layf Sote Go! buk.