Wi De Sav di Gɔd We “Rili Gɛt Sɔri-At”

1. Wetin go kam na wi maynd we wi de tink bɔt pɔsin we gɛt sɔri-at?

WE WI de tink bɔt pɔsin we gɛt sɔri-at, sɔntɛm wi go tink bɔt pɔsin we gud, we nays, ɛn we gɛt fri-an. Sɔntɛm wi go tink bak bɔt di stori we Jizɔs bin pul bɔt di gud Samɛritan. Tifman dɛn bin dɔn bit ɛn tif wan man we na Ju. Bɔt dis Samɛritan man we kɔmɔt na ɔda neshɔn bin trit di Ju man “fayn.” We di Samɛritan man si se di Ju man dɔn wund, i bin “sɔri fɔ am” ɛn mek arenjmɛnt fɔ tek kia ɔf am. (Lyuk 10:​29-37) Dis ɛgzampul de tich wi bɔt sɔri-at, we na wan fayn kwaliti we wi Gɔd gɛt. Gɔd de sho sɔri-at bikɔs i lɛk wi, ɛn ɛvride i de sho sɔri-at to wi bɔku bɔku we dɛn.

2. Wetin na wan ɔda we fɔ sho sɔri-at?

² Wan ɔda we de we pɔsin kin sho sɔri-at. Pɔsin we gɛt sɔri-at kin disayd se i nɔ go pɔnish ɔda pɔsin pan ɔl we i gɛt rizin fɔ du dat. We wi tink bɔt dis kayn we aw pɔsin kin sho sɔri-at, wi go se Jiova dɔn rili sho sɔri-at to wi. Wan pan di man dɛn we rayt di sam buk bin se: “I nɔ de pɔnish wi lɛk aw i fɔ pɔnish wi.” (Sam 103:​10) Bɔt ɔda tɛm dɛn de we Jiova kin strikt we i de kɔrɛkt pɔsin we dɔn kɔmit sin.

3. Us kwɛstyɔn dɛn wi de kam tɔk bɔt?

³ Insay dis atikul, wi go ansa tri kwɛstyɔn dɛn: Wetin mek Jiova de sho sɔri-at? I pɔsibul fɔ kɔrɛkt pɔsin strikt wan ɛn stil sho sɔri-at? Ɛn wetin go ɛp wi fɔ sho sɔri-at? Lɛ wi si aw Gɔd in Wɔd ansa dɛn kwɛstyɔn dɛn ya.

WETIN MEK JIOVA DE SHO SƆRI-AT?

4. Wetin mek Jiova de sho sɔri-at?

⁴ Jiova lɛk fɔ sho sɔri-at. Apɔsul Pɔl bin rayt se Gɔd “rili gɛt sɔri-at.” Pɔl bin de ɛksplen se Gɔd sho sɔri-at bay we I mek In anɔyntɛd savant dɛn we nɔ pafɛkt gɛt op fɔ go de na ɛvin. (Ɛfi. 2:​4-7) Bɔt Jiova nɔ jɔs de sho sɔri-at to in anɔyntɛd savant dɛn. Devid, we na wan pan di man dɛn we rayt di sam buk bin rayt se: “PAPA GƆD [“Jiova,” NWT] gud to ɔlman; i gɛt sɔri-at fɔ ɔl udat i mek.” (Sam 145:​9) Bikɔs Jiova lɛk pipul dɛn, i de sho sɔri-at ɛnitɛm we i gɛt rizin fɔ du dat.

5. Aw Jizɔs bin lan bɔt Jiova in sɔri-at?

⁵ Jizɔs no di we aw Jiova lɛk fɔ sho sɔri-at pas ɛni ɔda pɔsin. Bifo Jizɔs bin kam na di wɔl, in ɛn Jiova bin de togɛda na ɛvin fɔ lɔng lɔng tɛm. (Prɔv. 8:​30, 31) Jizɔs bin de si aw in Papa bin de sho sɔri-at bɔku tɛm to mɔtalman dɛn we bin de sin. (Sam 78:​37-42) Bɔku tɛm we Jizɔs bin de tich, i bin de tɔk bɔt dis fayn kwaliti we in Papa gɛt.

6. Aw Jizɔs bin ɛp wi fɔ ɔndastand in Papa in sɔri-at?

⁶ Lɛk aw wi bin dɔn tɔk na di atikul bifo dis wan, Jizɔs bin yuz wan ɛgzampul bɔt wan bɔypikin we bin lɔs fɔ ɛp wi fɔ ɔndastand se Jiova rili lɛk fɔ sho sɔri-at. Di bɔbɔ bin lɛf os, i go “liv fri layf ɛn west ɔl in prɔpati.” (Lyuk 15:​13) Leta, i ripɛnt, put insɛf dɔŋ, ɛn kam bak na os. Wetin in papa bin du? Jizɔs bin se: “We [di bɔbɔ] de fa de kam, in papa si am ɛn sɔri fɔ am, so i rɔn go mit am, i ɔg am, ɛn kis am.” Di papa nɔ bin molɛs in pikin. Bifo dat, wantɛm wantɛm, i sho sɔri-at ɛn fɔgiv am, ɛn i wɛlkɔm am bak na di famili. Di bɔypikin we bin lɔs bin dɔn sin siriɔs wan, bɔt bikɔs i ripɛnt, in papa bin fɔgiv am. Dis papa we gɛt sɔri-at tinap fɔ Jiova. Jizɔs bin yuz dis fayn ɛgzampul fɔ sho se in Papa want fɔ fɔgiv sina dɛn we dɔn rili ripɛnt.—Lyuk 15:​17-24.

7. Aw di we aw Jiova de sho sɔri-at de sho se i rili gɛt sɛns?

⁷ Jiova de sho sɔri-at bikɔs i gɛt sɛns pasmak. Ɔltɛm, Jiova kin disayd fɔ du sɔntin we go bɛnifit di tin dɛn we i mek. Di Baybul se “di sɛns we de kɔmɔt ɔp” de mek pɔsin “gɛt sɔri-at ɛn biev fayn.” (Jems 3:​17) Jɔs lɛk mama ɔ papa we lɛk in pikin, Jiova no se in sɔri-at de bɛnifit in pikin dɛn. (Sam 103:​13; Ayz. 49:​15) Di sɔri-at we Jiova de sho in pipul dɛn de mek dɛn gɛt op fɔ tumara bambay pan ɔl we dɛn nɔ pafɛkt. So bikɔs Jiova gɛt sɛns pasmak, i de sho sɔri-at ɛnitɛm we i gɛt rizin fɔ du dat. Bɔt Jiova no bak ustɛm i nɔ fɔ sho sɔri-at. Di sɛns we i gɛt de mek i nɔ de ɛva sho sɔri-at, if dat go min se i de sɔpɔt bad tin.

8. Wetin di ɛlda dɛn kin nid fɔ du sɔntɛnde, ɛn wetin mek?

⁸ Wetin wi fɔ du if pɔsin we de sav Gɔd disayd fɔ liv fri layf? Jiova bin dayrɛkt Pɔl fɔ rayt to di kɔngrigeshɔn se: “Una nɔ kip kɔmpin wit” am. (1 Kɔr. 5:​11) Dɛn kin disfɛloship pipul dɛn we dɔn sin ɛn we nɔ gri fɔ ripɛnt. I impɔtant fɔ du dat bikɔs i de protɛkt wi fetful brɔda ɛn sista dɛn, ɛn i de sho se wi de sɔpɔt di tin dɛn we Jiova se rayt ɛn rɔng. Bɔt sɔm pipul dɛn kin tink se we dɛn disfɛloship pɔsin, dat min se Gɔd nɔ sho sɔri-at to am. Na so i bi? Lɛ wi si.

NA TRU SE FƆ DISFƐLOSHIP PƆSIN NA WAN WE FƆ SHO SƆRI-AT?

9-10. Akɔdin to Ibruz 12:​5, 6, wetin mek wi go se na sɔri-at de mek dɛn disfɛloship pɔsin we nɔ gri fɔ ripɛnt? Gi wan ɛgzampul.

⁹ We wi go mitin ɛn yɛri we dɛn de anawns se pɔsin we wi sabi ɛn lɛk “nɔto Jiova Witnɛs igen,” wi at kin pwɛl bad bad wan. Sɔntɛm wi go de tink if dɛn bin nid fɔ disfɛloship da pɔsin de we wi lɛk. Na tru se fɔ disfɛloship pɔsin na wan we fɔ sho sɔri-at? Yɛs. If dɛn nɔ gi kɔrɛkshɔn to pɔsin we nid am, dat nɔ de sho lɔv, i nɔ mek sɛns, ɛn i nɔ de sho se wi de sɔri fɔ di pɔsin. (Prɔv. 13:​24) Fɔ se we dɛn disfɛloship pɔsin, dat go ɛp am fɔ chenj ɛn ripɛnt? Yɛs, i go ɛp am. Bɔku brɔda ɛn sista dɛn we bin mek am abit fɔ sin siriɔs wan tɔk se we dɛn bin disfɛloship dɛn, dat bin ɛp dɛn fɔ no se na bad bad tin dɛn bin de du. Dɔn bak, i ɛp dɛn fɔ ripɛnt, chenj di we aw dɛn de biev, ɛn kam bak to Jiova.—Rid Ibruz 12:​5, 6.

¹⁰ Tink bɔt dis ɛgzampul we de sho wetin mek fɔ disfɛloship pɔsin na wan we fɔ sho sɔri-at to di kɔngrigeshɔn. Wan shɛpad notis se wan pan in ship dɛn nɔ wɛl. I no se fɔ lɛ i trit dis patikyula sik we di ship gɛt, i fɔ pul am kɔmɔt nia in kɔmpin dɛn. Bɔt ship dɛn na animal dɛn we lɛk fɔ de wit dɛn kɔmpin dɛn, ɛn dɛn kin tɔmɛnt we dɛn nɔ de wit dɛn. Fɔ se we di shɛpad pul di ship kɔmɔt nia in kɔmpin dɛn, dat min se i wikɛd? Nɔ, i nɔ min dat. I no se if i alaw di ship we sik fɔ miks wit di ɔda ship dɛn, di sik go prɛd. So we i pul am kɔmɔt nia di ɔda wan dɛn, dat min se i de protɛkt dɛn ɔl.—Luk Lɛvitikɔs 13:​3, 4.

11. (a) Us we dɛn pɔsin we disfɛloship fiba ship we sik? (b) Wetin na sɔm tin dɛn we pɔsin we disfɛloship kin du, ɛn us ɛp i kin gɛt?

¹¹ Wi kin kɔmpia Kristian we disfɛloship to di ship we sik. Bikɔs in padi biznɛs wit Jiova dɔn pwɛl, i tan lɛk pɔsin we sik. (Jems 5:​14) Jɔs lɛk aw pipul dɛn kin gɛt sɔm sik dɛn we de prɛd to ɔda pipul dɛn, na so pɔsin we dɔn pwɛl in padi biznɛs wit Jiova kin mek ɔda pipul dɛn du bad tin. So sɔntɛnde, dɛn kin nid fɔ disfɛloship pɔsin we dɔn kɔmit sin. Dis kɔrɛkshɔn de sho se Jiova lɛk in fetful pipul dɛn we de na di kɔngrigeshɔn, ɛn sɔntɛm i go ɛp di pɔsin we sin fɔ no se i dɔn rili du bad tin, ɛn i fɔ ripɛnt. Da tɛm de we di pɔsin disfɛloship, sɔntɛm i go stil ebul fɔ atɛnd di mitin dɛn, usay i go lisin to tɔk dɛn we kɔmɔt frɔm di Baybul ɛn we go ɛp am fɔ gɛt strɔng fet bak. Dɔn bak, i kin ebul fɔ gɛt wi pɔblikeshɔn dɛn we i go rid ɛn stɔdi, ɛn i go ebul fɔ wach JW Brɔdkastin. Ɛn we di ɛlda dɛn de si se i de mek chenj dɛn na in layf, sɔntɛm dɛn go de gi am advays wan wantɛm fɔ ɛp am fɔ gɛt tayt padi biznɛs wit Jiova bak, so dat i go bi Jiova Witnɛs bak.b

12. Wetin ɛlda dɛn go du fɔ sho se dɛn lɛk ɛn dɛn de sɔri fɔ pɔsin we nɔ gri fɔ ripɛnt?

¹² I impɔtant fɔ mɛmba se di pipul dɛn nɔmɔ we dɛn kin disfɛloship na di wan dɛn we nɔ gri fɔ ripɛnt. Di ɛlda dɛn no se dɛn fɔ tek tɛm tink gud gud wan bifo dɛn disayd fɔ disfɛloship pɔsin. Dɛn no se Jiova kin kɔrɛkt wi “di rayt we,” ɛn i want dɛn fɔ du di sem tin. (Jɛr. 30:​11, NWT) Dɛn lɛk dɛn brɔda dɛn, ɛn dɛn nɔ want fɔ du ɛnitin we go mek dɛn pwɛl dɛn padi biznɛs wit Jiova. Bɔt sɔntɛnde, di we aw dɛn go sho se dɛn lɛk ɛn de sɔri fɔ pɔsin we dɔn du bad, na we dɛn disfɛloship am fɔ sɔm tɛm.

13. Wetin mek dɛn bin nid fɔ disfɛloship wan brɔda na Kɔrint?

¹³ Tink bɔt aw apɔsul Pɔl bin trit wan sina we nɔ bin gri fɔ ripɛnt. Wan brɔda we bin de na Kɔrint bin de du mami ɛn dadi biznɛs wit in papa in wɛf. Dat bin rili bad! Pɔl bin no se Jiova bin dɔn tɛl di Izrɛlayt dɛn we bin de trade se: “Man we mek in papa in wɛf pul klos fɔ am dɔn disgres in papa, dɛn fɔ kil di man ɛn di uman bikɔs na dɛn kɔmit sin.” (Lɛv. 20:​11) Pɔl nɔ go tɛl di kɔngrigeshɔn fɔ kil di man. Bɔt i bin tɛl dɛn fɔ disfɛloship am. Di fri layf we da man de bin de liv bin de afɛkt ɔda wan dɛn na di kɔngrigeshɔn. Sɔm pan dɛn nɔ bin ivin tink se na siriɔs sin i de kɔmit.—1 Kɔr. 5:​1, 2, 13.

14. Aw Pɔl bin sho sɔri-at to di man we bin disfɛloship na Kɔrint, ɛn wetin mek? (2 Kɔrintians 2:​5-8, 11)

¹⁴ Afta sɔm tɛm, Pɔl bin kam fɔ no se dis man dɔn mek big chenj dɛn na in layf; i bin dɔn rili ripɛnt. Pan ɔl we di man bin dɔn briŋ shem pan di kɔngrigeshɔn, Pɔl bin tɛl di ɛlda dɛn se i nɔ want fɔ kɔrɛkt am di we we go tu “ash.” I tɛl dɛn se: “Una fɔ fɔgiv am wit ɔl una at ɛn kɔrej am.” Notis di rizin we mek Pɔl se dɛn fɔ du dat. I se: “So dat in at nɔ go pwɛl pasmak te i giv-ɔp.” Pɔl bin sɔri fɔ dis man we ripɛnt. I nɔ bin want fɔ mek di man in at pwɛl fɔ wetin i du te i nɔ kɔntinyu fɔ aks fɔ fɔgivnɛs igen.—Rid 2 Kɔrintians 2:​5-8, 11.

15. Aw ɛlda dɛn kin strikt ɛn sho sɔri-at di sem tɛm?

¹⁵ Lɛk Jiova, di ɛlda dɛn lɛk fɔ sho sɔri-at. If nid de, dɛn kin strikt we dɛn de kɔrɛkt pɔsin we dɔn du bad, bɔt dɛn kin sho sɔri-at ɛnitɛm we dat pɔsibul. If dɛn nɔ du natin fɔ kɔrɛkt pɔsin we du bad, dat min se dɛn nɔ de sho sɔri-at, bɔt dɛn de sɔpɔt di bad. Fɔ se na di ɛlda dɛn nɔmɔ nid fɔ sho sɔri-at?

WETIN GO ƐP WI ƆL FƆ SHO SƆRI-AT?

16. Wetin Prɔvabs 21:​13 (NWT) se Jiova go du to di wan dɛn we nɔ de sho sɔri-at?

¹⁶ Ɔlman we na Kristian de tray fɔ sho sɔri-at lɛk Jiova. Wetin mek? Wan rizin na dat Jiova nɔ go lisin to di wan dɛn we nɔ de sho sɔri-at to ɔda pipul dɛn. (Rid Prɔvabs 21:​13, NWT.) Wi ɔl want fɔ mek Jiova lisin to wi prea dɛn, so wi de tek tɛm fɔ lɛ wi nɔ bi pɔsin we gɛt trɔngat. Bifo wi lɔk wi yes pan wi kɔmpin Kristian we de sɔfa, wi fɔ rɛdi ɔltɛm fɔ lisin “we pɔsin we nid ɛp de kray.” Semweso, wi de du wi bɛst fɔ fala di lɛsin na dis vas we se: “Di pɔsin we nɔ de sho se i gɛt sɔri-at, dɛn nɔ go sho am sɔri-at we dɛn de jɔj am.” (Jems 2:​13) If wi put wisɛf dɔŋ ɛn mɛmba se wi rili nid fɔ lɛ dɛn sho sɔri-at to wi, i go mɔs bi se wisɛf go sho sɔri-at to ɔda pipul dɛn. Di tɛm mɔ we wi want fɔ sho sɔri-at na we pɔsin we dɔn ripɛnt kam bak na di kɔngrigeshɔn.

17. Aw Kiŋ Devid bin sho se i rili gɛt sɔri-at?

¹⁷ Baybul ɛgzampul dɛn kin ɛp wi fɔ sho sɔri-at ɛn avɔyd fɔ bi pɔsin we wikɛd. Fɔ ɛgzampul, tink bɔt Kiŋ Devid. Bɔku tɛm, i bin de sho se i rili gɛt sɔri-at. Pan ɔl we Sɔl bin want fɔ kil Devid, i bin de sho sɔri-at to dis kiŋ we Gɔd bin dɔn pik, ɛn i nɔ ɛva tray fɔ tɔn-am-gi ɔ du bad to Sɔl.—1 Sam. 24:​9-12, 18, 19.

18-19. Gi tu ɛgzampul dɛn bɔt tɛm dɛn we Devid nɔ bin sho sɔri-at.

¹⁸ Bɔt Devid nɔ bin de sho sɔri-at ɔltɛm. Fɔ ɛgzampul, Nebal na bin man we bin ash, ɛn i bin tɔk bad tin bɔt Devid. Dɔn bak, i nɔ gri fɔ gi Devid ɛn in man dɛn tin fɔ it. Dis bin mek Devid vɛks bad bad wan, ɛn i disayd se i go kil Nebal ɛn ɔl di man dɛn we de na in os. Bɔt Nebal in wɛf, Abigɛl, na uman we bin gud ɛn peshɛnt, ɛn kwik kwik wan i go wit it to Devid. So Devid nɔ bin kil Nebal ɛn in man dɛn.—1 Sam. 25:​9-22, 32-35.

¹⁹ Wan ɔda tɛm, prɔfɛt Netan bin tɛl Devid bɔt wan jɛntriman we bin tif in po neba in ship we i lɛk. Devid bin vɛks bad bad wan ɛn tɔk se: “Wans PAPA GƆD [“Jiova,” NWT] de, di jɛntriman fit fɔ day.” (2 Sam. 12:​1-6) Devid bin sabi di Lɔ we Gɔd Bin Gi Mozis. I bin no se we pɔsin tif wan ship, i fɔ gi 4 ship dɛn to di man we bin gɛt di wan we i tif. (Ɛks. 22:​1) So we Devid tɔk se di man we bin tif di ship fit fɔ day, dat nɔ sho se i gɛt sɔri-at. Ɛn i kam fɔ bi se Netan pul di stori fɔ ɛp Devid fɔ ɔndastand se i dɔn du tin dɛn we bad pas dande fa fawe. Ɛn Jiova bin sho sɔri-at to Devid fa fawe pas di we aw Devid bin fɔ dɔn sho sɔri-at to di pɔsin we tif di ship na Netan in stori.—2 Sam. 12:​7-13.

20. Wetin wi lan frɔm Devid in ɛgzampul?

²⁰ Notis se we Devid bin vɛks bad bad wan, i bin disayd se Nebal ɛn ɔl in man dɛn fɔ day. Ɛn leta, Devid bin se di jɛntriman na Netan in ɛgzampul fit fɔ day. Bɔt Devid na bin gud man, so wetin mek i bin jɔj di tifman dis kayn ash we. Tink bɔt wetin bin jɔs dɔn apin na Devid in layf. In gilti kɔnshɛns bin de mɔna am da tɛm de. If pɔsin nɔ jɔj ɔda pipul dɛn wit sɔri-at, dat de sho se i nɔ gɛt tayt padi biznɛs wit Jiova. Jizɔs bin gi siriɔs wɔnin to in disaypul dɛn bay we i se: “Una lɛf fɔ jɔj pipul dɛn so dat Gɔd nɔ go jɔj una; bikɔs aw una jɔj ɔda pipul dɛn, na so i go jɔj una.” (Mat. 7:​1, 2) So lɛ wi du wi bɛst fɔ avɔyd fɔ bi pɔsin we ash, ɛn lɛ wi sho se wi “rili gɛt sɔri-at” lɛk wi Gɔd.

21-22. Wetin na sɔm we dɛn we wi go sho sɔri-at?

²¹ If wi gɛt sɔri-at, wi nɔ go jɔs sɔri fɔ ɔda pipul dɛn. Infakt, dɛn kin se pɔsin we gɛt sɔri-at de du sɔntin fɔ ɛp ɔda pipul dɛn. So wi ɔl go ebul fɔ luk gud wan na wi famili, wi kɔngrigeshɔn, ɛn wi kɔmyuniti fɔ si udat nid ɛp. Wi go mɔs fɛn bɔku we dɛn fɔ sho sɔri-at. Pɔsin de we nid ɛnkɔrejmɛnt? Fɔ se wi go ebul ɛp pipul dɛn wit wetin dɛn nid, lɛk fɔ gi dɛn tin fɔ it ɔ fɔ du ɔda tin fɔ dɛn? Fɔ se pɔsin we dɔn kam bak na di kɔngrigeshɔn nid gud padi we go ɛnkɔrej am? Ɔ wi go ebul ɛnkɔrej ɔda pipul dɛn wit di gud nyuz we de na di Baybul? Dis na wan pan di bɛst we dɛn we wi go sho sɔri-at to ɔlman we wi de mit.—Job 29:​12, 13; Rom. 10:​14, 15; Jems 1:​27.

²² If wi no se sɔm pipul dɛn nid dɛn tin dɛn ya, wi go si se wi gɛt bɔku we dɛn fɔ sho sɔri-at. We wi de sho sɔri-at, wi de mek wi Papa we de na ɛvin gladi pasmak, bikɔs in na di Gɔd we “rili gɛt sɔri-at.”