Yuz Yu “Gift . . . we Gɛt fɔ Du wit Gɔd Biznɛs”

Wi ɔl kin gladi fɔ spɛn tɛm wit wi brɔda ɛn sista dɛn bikɔs wi kin ɛnkɔrej wisɛf. Bɔt fɔ mek wi go rili ebul fɔ ɛnkɔrej wisɛf, i nɔ jɔs du fɔ mek wi de togɛda. Di Baybul tɔk se di chans we wi gɛt fɔ ɛp wi kɔmpin dɛn fɔ gɛt strɔng fet na “gift . . . we gɛt fɔ du wit Gɔd biznɛs.” (Rom. 1:11, 12) Aw wi go yuz da gift de fayn fayn wan?

Yuz wetin yu de tɔk fɔ ɛnkɔrej ɔda pipul dɛn. Fɔ ɛgzampul, we yu de gi kɔmɛnt na mitin, tek tɛm mek yu nɔ tɔk tumɔs bɔt wetin yu tink ɔ bɔt yusɛf. Bifo dat, na fɔ tɔk bɔt wetin yu dɔn lan frɔm Jiova, di Baybul, ɛn in fetful savant dɛn. We wi ɛn wi brɔda ɛn sista dɛn de tɔk, wi want fɔ tɔk tin dɛn we go mek dɛn gɛt mɔ fet.

Yuz di tin dɛn we yu de du fɔ ɛnkɔrej ɔda pipul dɛn. Fɔ ɛgzampul, sɔm brɔda ɛn sista dɛn dɔn disayd fɔ kɔntinyu fɔ de na ful-taym savis pan ɔl we i nɔ izi fɔ dɛn. Ɔda wan dɛn kin atɛnd mitin insay di wik ɔltɛm pan ɔl we dɛn gɛt wɛlbɔdi prɔblɛm ɔ di wok we dɛn de du kin mek dɛn taya.

Yu tink se di tin dɛn we yu kin tɔk ɛn du de ɛnkɔrej yu brɔda ɛn sista dɛn? Yu kin notis wetin yu brɔda ɛn sista dɛn de tɔk ɛn du fɔ ɛnkɔrej yu?