Kwɛstyɔn dɛn we Pipul dɛn Kin Aks
Wetin Jiova go mek di neshɔn dɛn du jisnɔ?
We Rɛvɛleshɔn 17:16, 17 de tɔk bɔt di tɛm we di big big trɔbul go stat, i se: “Di tɛn ɔn ɛn di wayl animal we yu si go et di raregal ɛn tek ɔl wetin i gɛt ɛn lɛf am nekɛd, ɛn dɛn go it in bɔdi ɛn bɔn am kpatakpata wit faya. Na Gɔd put am na dɛn at fɔ mek dɛn du wetin i want, dat na, fɔ mek dɛn du di wan tin we dɛn de tink bɔt bay we dɛn gi dɛn kiŋdɔm to di wayl animal.” Trade, wi bin dɔn tɔk insay wi pɔblikeshɔn dɛn se di tin we Jiova “want,” we i go put na di neshɔn dɛn at, na fɔ dɔnawe wit lay lay rilijɔn.
Bɔt wi nid fɔ ajɔst di we aw wi bin ɔndastand dis skripchɔ. Di tin we Jiova “want,” we i go put na di neshɔn dɛn at, na fɔ mek dɛn gi “dɛn kiŋdɔm to di wayl animal.” Fɔ ɛp wi fɔ ɔndastand aw dis go apin, lɛ wi ansa dɛn kwɛstyɔn dɛn ya.
Udat dɛn di prɔfɛsi tɔk bɔt? I tɔk bɔt “di raregal” we dɛn de kɔl bak “Babilɔn di Gret,” we tinap fɔ ɔl di lay lay rilijɔn dɛn. I tɔk bak bɔt di “wayl animal we gɛt rɛd kɔlɔ,” we tinap fɔ United Nations. Dɛn bin mek dis ɔganayzeshɔn insay 1919 fɔ ɛp fɔ lɛ pis de ɔlsay na di wɔl, ɛn dɛn bin de kɔl am di League of Nations. (Rɛv. 17:3-5) Dɔn i tɔk bɔt “di tɛn ɔn,” we tinap fɔ ɔl di gɔvmɛnt dɛn na di wɔl we de sɔpɔt di wayl animal.
Us biznɛs de bitwin di raregal ɛn di wayl animal we gɛt rɛd kɔlɔ? Di raregal “sidɔm pan” di wayl animal. I de blɛs di wayl animal, i de tray fɔ mek i du wetin i want, ɛn ivin tray fɔ kɔntrol am.
Wetin go apin to di raregal? Di wayl animal ɛn di tɛn ɔn we de sɔpɔt am “go et di raregal.” Fɔ sho se dɛn rili et di raregal, dɛn go tek ɔl in jɛntri ɛn mek ɔlman no se i wikɛd. Ɛn dɛn go dɔnawe wit am kpatakpata, jɔs lɛk aw Jiova dɔn se dɛn go du. (Rɛv. 17:1; 18:8) Lay lay rilijɔn nɔ go de igen. Bɔt bifo dat apin, Jiova go mek di neshɔn dɛn du sɔntin we nɔ ɛva apin yet.
Wetin Jiova go mek di neshɔn dɛn du? I go mek di tɛn ɔn du “wetin i want,” dat na, fɔ “gi dɛn pawa ɛn rayt to di wayl animal [we gɛt rɛd kɔlɔ],” we na United Nations. (Rɛv. 17:13) Tink bɔt wetin dat min. Fɔ se na di gɔvmɛnt dɛnsɛf sɛf go disayd se dɛn go gi dɛn pawa ɛn rayt to di wayl animal? Nɔ-o, nɔto dɛn! Di prɔfɛsi se na Gɔd go mek dɛn du dat. (Prɔv. 21:1; luk bak Ayzaya 44:28.) Fɔ se na smɔl smɔl dɛn go gi dɛn pawa? Nɔ-o! Dɛn go jɔs disayd fɔ du am wantɛm wantɛm. Dɔn jɔs afta dɛn gi di wayl animal pawa, i go mek wetin Jiova want apin, we na fɔ dɔnawe wit lay lay rilijɔn kpatakpata.
So wetin wi go ɛkspɛkt se go apin? Wi nɔ fɔ ɛkspɛkt se wi go yɛri nyuz ripɔt dɛn we de tɔk se smɔl smɔl, di gɔvmɛnt dɛn dɔn bigin fɔ sɔpɔt United Nations mɔ ɛn mɔ. Bifo dat, na dis wi fɔ ɛkspɛkt: Jiova go mek ɔl di gɔvmɛnt dɛn gi dɛn pawa to United Nations wantɛm wantɛm. We dɛn du dat, wi go no se i nɔ go te igen di big big trɔbul go bigin. Bɔt te da tɛm de, “lɛ wi go de wach ɛn kɔntinyu fɔ tink di rayt we” bikɔs dɛn tin dɛn ya go apin jisnɔ!—1 Tɛs. 5:6.