Atikul we Go Ɛp Uman dɛn we Dɛn De Trit Bad

Na di fɔs wɔd dɛn dis insay wan atikul na jw.org we gɛt di taytul “Fɔ Mek Uman dɛn De Sef Wan—Wetin di Baybul Se?” Wan link de dɔŋ da atikul de we yu go yuz fɔ dawnlod di PDF fɔmat fɔ di atikul we yu go ebul fɔ print ɛn fol as trakt we gɛt 4 pej. Wan sista we de na Amɛrika we nem Stesi tɔk se, “A bin print di atikul, ɛn mi ɛn wan sista bin go wit dɛn na wan say we dɛn de kia fɔ uman dɛn we dɛn layf de pan denja.”

Wan pan di pipul dɛn we de wok na di ples bin aks fɔ mɔ trakt dɛn we i go sheb to di wan dɛn we de de. So tu sista dɛn bin go wit 40 trakt dɛn ɛn 30 jw.org kɔntakt kad dɛn. Leta, di maneja bin aks fɔ mek di Jiova Witnɛs dɛn we go de sho di uman dɛn aw fɔ stɔdi di Baybul.

Stesi ɛn tu ɔda sista dɛn bin go na ɔda ples usay dɛn de kia fɔ uman dɛn, ɛn dɛn bin gi fayv pan dɛn trakt dɛn de ɛn di pipul dɛn bin aks fɔ mɔ. Wan pan di uman dɛn we de wok de bin tɔk se, “Dis trakt go rili ɛp di uman dɛn we de ya. Dis na sɔntin we wi nid.” We di sista dɛn bin go de ɔda tɛm, bɔku pan di uman dɛn bin want fɔ si aw dɛn de stɔdi di Baybul, ɛn tu pan dɛn bin se dɛn go want fɔ atɛnd mitin na Kiŋdɔm Ɔl di nɛks wikɛnd.

Stesi tɔk se: “Wi de kɔle di we aw pipul dɛn rili gladi fɔ gɛt dis atikul we rili fayn. We yu print am ɛn fol am, yu go ebul yuz am fɔ prich di Kiŋdɔm mɛsej to uman dɛn we dɛn nɔ de trit fayn. Di we aw pipul dɛn bin gladi fɔ di trakt rili tɔch wi at. Wi de wet fɔ si aw Jiova go ɛp wi as wi de kɔntinyu fɔ prich to dɛn uman dɛn ya.”