Fɔ Mek Uman dɛn De Sef Wan—Wetin di Baybul Se?

“We a bin smɔl, mi brɔda bin de bit mi ɛn tɛl mi bad bad wɔd dɛn ɔltɛm. Afta a mared, mi mɔdɛnlɔ sɛf bin kɔntinyu fɔ kɔs ɛn bit mi. In ɛn mi fadɛnlɔ bin de trit mi lɛk se mi na slev. A bin de tink bɔt fɔ kil misɛf.”—Madu,a India.

World Health Organization gri se, “I kɔmɔn ɔlsay na di wɔl tide fɔ kɔs ɛn bit uman dɛn.” We dɛn kɔnt tri uman dɛn, tɛm go dɔn de we dɛn dɔn bit ɔ rep wan pan dɛn.

If dande dɔn apin to yu, sɔntɛm yu go fred se ɛnisay we yu go, pɔsin go kɔs, bit, ɔ rep yu. Bikɔs ɔf dɛn bad tin dɛn ya we de apin to yu jɔs bikɔs yu na uman, sɔntɛm yu go fil se bɔku pipul dɛn nɔ tek uman dɛn mek natin. Bɔt fɔ se Gɔd de si uman dɛn as pipul dɛn we impɔtant to am?

Aw Gɔd de si uman dɛn?

Skripchɔ: “[Gɔd] mek man ɛn uman.”—Jɛnɛsis 1:27.

Wetin i min?: Gɔd bin mek man ɛn uman dɛn. I de si dɛn ɔltu as pipul dɛn we fit fɔ gɛt rɛspɛkt. Pantap dat, i want maredman fɔ “lɛk in wɛf lɛk aw i lɛk insɛf,” nɔto fɔ fos am fɔ du sɔntin bay we i de yuz ash wɔd dɛn ɔ bit am. (Ɛfishians 5:33; Koloshians 3:19) Dis sho klia wan se Gɔd want uman dɛn fɔ de sef wan.

“We a bin smɔl, sɔm pan mi fambul dɛn bin rep mi. We a bin ol 17 ia, mi bɔs se i go sak mi if a nɔ du mami ɛn dadi biznɛs wit am. Ivin we a big, mi man, mi mama ɛn papa, ɛn mi neba dɛn nɔ bin de trit mi wit rɛspɛkt. Bɔt as tɛm de go, a bin lan bɔt Jiova,b we na di Wan we mek ɔltin. I de trit uman dɛn wit rɛspɛkt. Dis mek a biliv se i lɛk mi ɛn a valyu na in yay.”—Maria, Ajɛntina.

Wetin go ɛp yu fɔ lɛ yu bigin fil fayn?

Skripchɔ: “Padi dɛn de we lɛk dɛnsɛf pas aw brɔda dɛn lɛk dɛnsɛf.”—Prɔvabs 18:24.

Wetin i min?: Yu gud padi go de biɛn yu. Tɛl yu bɛlɛ wɔd to pɔsin we yu rili biliv, if yu fil se dat go ɛp yu.

“Fɔ 20 ia, a nɔ ɛva tɛl pɔsin se dɛn bin rep mi. Na dat mek a kam fɔ bi pɔsin we nɔ gladi, we de wɔri, ɛn we gɛt pwɛlat. Bɔt we a faynali tɛl pɔsin we bin rɛdi fɔ lisin to mi, a bin rili fil fayn.”—Ilif, Tɔki.

Skripchɔ: “Una . . . put ɔl wetin de wɔri una na [Gɔd] in an, bikɔs i bisin bɔt una.”—1 Pita 5:7.

Wetin i min?: Gɔd de rili lisin to yu we yu de pre to am. (Sam 55:22; 65:2) Bikɔs i bisin bɔt yu, i go ɛp yu fɔ ɔndastand se yu na pɔsin we rili gɛt valyu.

“We a bin de lan bɔt Jiova, a bigin fɔ lɛf fɔ fil bad bɔt di bad bad tin dɛn we bin apin to mi. Naw a kin pre to Gɔd ɛn tɔk ɔl wetin de na mi at. In na lɛk padi we rili ɔndastand aw a de fil.”—Ana, Bɛliz.

Fɔ se Gɔd go ɛva stɔp di bad we aw dɛn de trit uman dɛn?

Skripchɔ: “Jiova . . . go mek pikin dɛn we nɔ gɛt papa ɛn di wan dɛn we dɛn at pwɛl gɛt jɔstis, so dat pipul dɛn we de na di wɔl nɔ go mek dɛn fred igen.” —Sam 10:​17, 18.

Wetin i min?: I nɔ go te igen, Gɔd go pul ɔl di wan dɛn we nɔ de trit dɛn kɔmpin fia wan, ivin di wan dɛn we de du dɛn bad bad tin dɛn ya to uman dɛn.

“We a lan se i nɔ go te igen Jiova go du sɔntin fɔ dɔn di bad tin we dɛn de du to uman dɛn ɛn smɔl galpikin dɛn, i bin tan lɛk se dɛn gi mi sɔntin fɔ mek a fil fayn. I dɔn mek a gɛt kolat.”—Rɔbɔta, Mɛksiko.

Fɔ lan mɔ bɔt di op we di Baybul de gi, wetin mek yu fɔ abop pan di prɔmis dɛn we de de, ɛn aw Jiova Witnɛs dɛn de yuz di Baybul fɔ ɛp yu, na fɔ aks fɔ lɛ i kam fɛn yu fɔ fri.

Dawnlod di wan fɔ print fɔ dis atikul.