Udat Na Jiova?
Di Baybul in ansa
Jiova na di tru Gɔd we mek dɛn rayt di Baybul, ɛn di Wan we mek ɔltin. (Rɛvɛleshɔn 4:11) Di prɔfɛt Ebraam ɛn Mozis bin de wɔship am, ɛn Jizɔs sɛf bin de wɔship am. (Jɛnɛsis 24:27; Ɛksodɔs 15:1, 2; Jɔn 20:17) In nɔto Gɔd jɔs fɔ wan patikyula pipul dɛn, bɔt in na Gɔd fɔ di “wanol wɔl.”—Sam 47:2.
Jiova na Gɔd in spɛshal nem we de na di Baybul. (Ɛksodɔs 3:15, NWT; Sam 83:18, NWT) I kɔmɔt frɔm wan vab insay Ibru we min fɔ “bi,” ɛn sɔm masta sabi bukman dɛn tink se di nem min, “I De Mek Wetin I Want Bi.” Dis minin fit Jiova as di Wan we mek ɔltin ɛn di Wan we de du ɔl wetin i dɔn tɔk. (Ayzaya 55:10, 11) Di Baybul ɛp wi bak fɔ no udat Jiova rili bi, ɛn in men kwaliti we na lɔv.—Ɛksodɔs 34:5-7; Lyuk 6:35; 1 Jɔn 4:8.
Di nem Jiova na Inglish transleshɔn fɔ di Ibru nem fɔ Gɔd. Insay Inglish, dɛn bin de yuz YHWH fɔ tinap fɔ di 4 lɛta dɛn )(יהוה we dɛn de yuz fɔ spɛl Gɔd in nem insay Ibru. Dɛn bin de kɔl dɛn lɛta dɛn de di Tɛtragrametin. Wi nɔ no aw dɛn bin de kɔl Gɔd in nem insay Ibru trade, bɔt di fɔs tɛm we dɛn yuz Gɔd in nem “Jiova” insay Inglish na bin insay 1530, we Wiliam Tindel translet frɔm Jɛnɛsis to Ditarɔnɔmi.a
Wetin mek wi nɔ no aw dɛn bin de kɔl Gɔd in nem insay Ibru trade trade?
Trade we dɛn bin de rayt insay Ibru dɛn nɔ bin de yuz vawɛl dɛn, na kɔnsonant dɛn nɔmɔ dɛn bin de yuz. I go izi fɔ pɔsin we de rid Ibru fɔ put di vawɛl dɛn usay dɛn fit fɔ de. Bɔt afta dɛn dɔn fɔ rayt di Ibru Skripchɔ dɛn (“Ol Tɛstamɛnt”) sɔm Ju pipul dɛn bin biliv di lay lay tin dɛn we dɛn bin de tɔk fɔ se i bad fɔ kɔl Gɔd in rial nem lawd wan. So we dɛn bin de rid ɛni skripchɔ we gɛt Gɔd in nem lawd wan, dɛn bin de chenj am to “Lɔd” ɔ “Gɔd.” As tɛm de go, dis lay lay tɔk bin prɛd ɔlsay ɛn smɔl smɔl, di we aw dɛn bin de kɔl Gɔd in nem trade trade bigin fɔ lɔs.b
Sɔm pipul dɛn fil se dɛn bin de kɔl di nem “Yawɛ,” bɔt ɔda wan dɛn tink se ɔda we dɛn de fɔ kɔl am. Insay wan Dɛd Si Skrol we gɛt af pat pan Lɛvitikɔs insay Grik, dɛn spɛl di nem as Iao. Sɔm pipul dɛn we bin de rayt Grik bin de kɔl am Iae, I·a·beʹ, ɛn I·a·ou·eʹ. Bɔt wi nɔ no aw dɛn bin de kɔl Gɔd in nem insay Ibru trade.c
Lay lay aydia dɛn bɔt Gɔd in nem insay di Baybul
Lay: Na ad dɛn ad Gɔd in nem “Jiova” insay di Baybul dɛn we dɛn translet.
Tru: Gɔd in nem we dɛn rayt insay 4 Ibru lɛta dɛn we na di Tɛtragrametin, de insay di Baybul fɔ lɛk 7,000 tɛm.d Bɔku transleshɔn dɛn pul Gɔd in nem ɛn yuz taytul lɛk “Lɔd.”
Lay: Di Ɔlmayti Gɔd nɔ nid spɛshal nem.
Tru: Na Gɔd insɛf sɛf tɛl di wan dɛn we bin de rayt di Baybul fɔ yuz in nem bɔku bɔku tɛm, ɛn i tɛl di wan dɛn we de wɔship am fɔ yuz in nem. (Ayzaya 42:8, NWT; Joɛl 2:32, NWT; Malakay 3:16, NWT; Romans 10:13) Infakt, Gɔd bin de kɔndɛm lay lay prɔfɛt dɛn we bin de tray fɔ mek pipul dɛn fɔgɛt in nem.—Jɛrimaya 23:27.
Lay: Akɔdin to di Ju dɛn tradishɔn, dɛn fɔ pul Gɔd in nem na di Baybul.
Tru: Na tru se sɔm Ju ticha dɛn nɔ bin de gri fɔ kɔl Gɔd in nem. Bɔt dɛn nɔ bin pul am na di Baybul. Ɛn Gɔd nɔ want wi fɔ fala mɔtalman tradishɔn we nɔ gri wit in lɔ dɛn.—Matyu 15:1-3.
Lay: Dɛn nɔ fɔ yuz Gɔd in nem na di Baybul bikɔs dɛn nɔ no di rayt we aw dɛn de kɔl am insay Ibru.
Tru: Dis we aw dɛn de tink go mek i tan lɛk se Gɔd de ɛkspɛkt pipul dɛn we de tɔk difrɛn difrɛn langwej dɛn fɔ kɔl in nem di sem we. Bɔt di Baybul sho se Gɔd in savant dɛn trade trade we bin de tɔk difrɛn langwej dɛn bin de kɔl pipul dɛn nem difrɛn we dɛn.
Fɔ ɛgzampul, lɛ wi tɔk bɔt wan pan di Izrɛlayt dɛn jɔj we nem Jɔshwa. I go bi se di Kristian dɛn we bin de trade we bin de tɔk Ibru bin de kɔl am Yehoh·shuʹaʽ, ɛn di wan dɛn we bin de tɔk Grik bin de kɔl am I·e·sousʹ. Insay di Baybul dɛn translet Jɔshwa in Ibru nem insay Grik, we sho se Kristian dɛn trade bin de fala aw dɛn de kɔl pɔsin in nem insay dɛn yon langwej.—Akt 7:45; Ibruz 4:8.
Wi de yuz dis sem prinsipul fɔ translet Gɔd in nem. Di tin we impɔtant mɔ nɔto fɔ sabi di kɔrɛkt we fɔ kɔl Gɔd in nem, bɔt na fɔ put am na di rayt say dɛn we i fɔ de na di Baybul.
a Tindel bin yuz di nem “Iehouah” we i bin de translet di fɔs fayv buk dɛn na di Baybul. As tɛm de go, Inglish chenj ɛn dɛn chenj di spɛlin fɔ Gɔd in nem to aw i de naw. Fɔ ɛgzampul, insay di ia 1612 Ɛnri Aynswɔt bin yuz di wɔd “Iehovah” we i bin de translet di Sam buk. Dɔn insay 1639, we i bin go ova di transleshɔn bak, i yuz di nem “Jiova” insay de. Insay 1901, di wan dɛn we translet di American Standard Version yuz di nem “Jiova” ɛnisay we Gɔd in nem de insay di Ibru skripchɔ.
b Di New Catholic Encyclopedia, Second Edition, Volume 14, pej 883 ɛn 884, tɔk se: “Fɔ sɔm tɛm afta di ɛgzayl, pipul dɛn bigin fred fɔ yuz di nem Yawɛ, so dɛn bigin yuz ɔda wɔd dɛn lɛk ADONAI ɔ ELOHIM.”
c Fɔ no mɔ, rid pej 1 to 5 insay di buk we nem, Buk we Go Ɛp Yu fɔ Stɔdi Gɔd in Wɔd.
d Rid di Theological Lexicon of the Old Testament, Volume 2, pej 523 ɛn 524.