Aw Jizɔs in Day De “Fri Bɔku Pipul Dɛn”?
Di Baybul in ansa
Na Jizɔs in sakrifays Gɔd de yuz fɔ sev mɔtalman frɔm sin ɛn day. Di Baybul se Jizɔs in blɔd na di prayz fɔ fri wi frɔm sin ɛn day. (Ɛfishians 1:7; 1 Pita 1:18, 19) Na dat mek Jizɔs bin se i kam fɔ “gi in layf fɔ plɛnti plɛnti pipul.”—Matyu 20:28, Krio Fɔs Oli Baybul.
Wetin mek wi nid pɔsin fɔ “fri bɔku pipul dɛn”?
We Gɔd bin mek di fɔs man, Adam, i bin pafɛkt, i nɔ bin gɛt sin. I bin gɛt di chans fɔ liv sote go, bɔt i bin lɔs am bay we i bin disayd nɔ fɔ obe Gɔd. (Jɛnɛsis 3:17-19) We i bɔn pikin dɛn, i pas di sin to dɛn. (Romans 5:12) Na dat mek di Baybul se Adam “sɛl” insɛf ɛn in pikin dɛn as slev to sin ɛn day. (Romans 7:14) Bikɔs Adam in pikin dɛn nɔ pafɛkt, dɛn nɔ ebul fɔ gɛt wetin i bin dɔn lɔs.—Sam 49:7, 8.
Gɔd sɔri fɔ Adam in pikin dɛn bikɔs dɛn nɔ gɛt op. (Jɔn 3:16) Bɔt bikɔs Gɔd de du tin tret ɔltɛm, i nɔ jɔs ovaluk dɛn sin. (Sam 89:14; Romans 3:23-26) Gɔd lɛk mɔtalman, so i arenj fɔ wan ligal we nɔto fɔ jɔs fɔgiv mɔtalman sin bɔt fɔ pul sin pan dɛn. (Romans 5:6-8) Jizɔs in day na di ligal we fɔ pul sin pan mɔtalman.
Aw Jizɔs in day de fri wi?
Insay di Baybul, fɔ “fri” sɔntin, gɛt fɔ du wit tri tin dɛn:
Na pemɛnt.—Di Nɔmba Dɛm 3:46, 47.
I de fri sɔntin.—Ɛksodɔs 21:30.
Di valyu fɔ ikwal to wetin yu de pe fɔ.a
Lɛ wi tɔk bɔt aw dɛn tin dɛn ya fit Jizɔs Krays in sakrifays fɔ fri wi frɔm sin ɛn day.
Pemɛnt. Di Baybul se Gɔd “bay” Kristian dɛn.” (1 Kɔrintians 6:20; 7:23) Na Jizɔs in blɔd i yuz as di prayz fɔ “bay pipul dɛn . . . frɔm ɔl di trayb dɛn, pipul dɛn, neshɔn dɛn, ɛn dɛn bin de tɔk difrɛn difrɛn langwej.”—Rɛvɛleshɔn 5:8, 9.
Jizɔs in sakrifays na “di prayz fɔ fri wi” frɔm sin.—1 Kɔrintians 1:30; Koloshians 1:14; Ibruz 9:15.
Di valyu fɔ ikwal to wetin yu de pe fɔ. Jizɔs in sakrifays ikwal to wetin Adam bin lɔs, dat na pafɛkt layf. (1 Kɔrintians 15:21, 22, 45, 46) Di Baybul se: “Jɔs lɛk aw wan man [Adam] we nɔ obe dɔn mek bɔku pipul dɛn bi sina, na so bak di obe we wan man [Jizɔs Krays] obe go mek bɔku pipul dɛn bi pipul dɛn we de du wetin rayt.” (Romans 5:19) Dis ɛksplen aw wan pɔsin in day kin pe fɔ fri bɔku pipul dɛn frɔm sin. Infakt, Jizɔs in sakrifays na “di ɛgzakt prayz fɔ fri ɔlman” we de du wetin dɛn nid fɔ du fɔ bɛnifit frɔm in day.—1 Timoti 2:5, 6.
a Insay di Baybul, di orijinal wɔd dɛn we dɛn translet as “prayz fɔ fri” gɛt di aydia ɔf sɔntin we gɛt valyu we dɛn de yuz fɔ pe. Fɔ ɛgzampul, di Ibru vab we na ka·pharʹ min “kɔba.” (Jɛnɛsis 6:14) We dɛn kin yuz da wɔd de, i kin min fɔ kɔba sin. (Sam 65:3) Di noun we na koʹpher in min di prayz we dɛn de fɔ kɔba ɔ fri sɔntin. (Ɛksodɔs 21:30) Semweso, di Grik wɔd we na lyʹtron, we bɔku tɛm dɛn kin translet as “prayz fɔ fri,” dɛn kin translet am bak as “prayz fɔ sev.” (Matyu 20:28; The New Testament in Modern Speech, we R. F. Weymouth rayt) Grik rayta dɛn bin de yuz dis wɔd we dɛn bin de tɔk bɔt pemɛnt we dɛn bin de gi fɔ fri pɔsin we de na prizin ɔ pɔsin we na slev.