“Una . . . Mek di Wanwɔd we di Spirit Dɔn Mek Una Gɛt Kɔntinyu”

Na “di spirit” de mek wi ɛnjɔy di “wanwɔd” we wi gɛt. Dis min se na Gɔd in pawa we i de yuz fɔ du sɔntin de mek wi gɛt wanwɔd. Bɔt jɔs lɛk aw Pɔl tɔk, dis wanwɔd nid fɔ kɔntinyu fɔ de. So udat go mek dat apin? Fɔ tru, ɔlman we na Kristian nid fɔ du sɔntin fɔ mek “di wanwɔd we di spirit dɔn mek [wi] gɛt kɔntinyu” fɔ de.

Fɔ ɛgzampul, imajin se pɔsin gi yu nyu motoka. Na udat fɔ de kia fɔ di motoka? Wi sabi di ansa. Yu nɔ go blem di pɔsin we gi yu di motoka if i pwɛl bikɔs yu nɔ de ol am fayn.

Semweso, pan ɔl we na Gɔd mek wi gɛt wanwɔd, wi ɔl nid fɔ du sɔntin fɔ kɔntinyu fɔ gɛt wanwɔd. If wi nɔ gɛt pis wit wi brɔda ɔ sista, wi nid fɔ aks wisɛf dis kwɛstyɔn, ‘A de du mi bɛst fɔ mek wanwɔd kɔntinyu fɔ de bay we a de du sɔntin fɔ sɔlv di prɔblɛm?’

“TRAY TRANGA WAN” FƆ MEK WANWƆD KƆNTINYU FƆ DE

Jɔs lɛk aw Pɔl tɔk, sɔntɛnde wi nid fɔ tray tranga wan fɔ mek di wanwɔd we di spirit de gi kɔntinyu fɔ de. Wi go nid fɔ du dis mɔ if wan brɔda ɔ sista dɔn ɔfɛn wi. Fɔ se fɔ gɛt wanwɔd min se wi fɔ go mit di pɔsin ɔltɛm fɔ tɔk bɔt di prɔblɛm? Nɔ, i nɔ min so. Aks yusɛf dis kwɛstyɔn, ‘If a go mit di pɔsin, fɔ se dat go ɛp fɔ sɔlv di prɔblɛm ɔ i go mek i wɔs?’ Sɔntɛnde, i kin bɛtɛ fɔ jɔs ovaluk di prɔblɛm ɔ fɔgiv di pɔsin.​—Prɔv. 19:11; Mak 11:25.

Jɔs lɛk aw Apɔsul Pɔl tɔk, lɛ wi kɔntinyu fɔ alaw ‘lɔv fɔ mek wi de bia wi kɔmpin dɛn.’ (Ɛfi. 4:2) Wan buk tɔk se dɛn wɔd dɛn ya kin min se “wi fɔ tek pipul dɛn lɛk aw dɛn de.” Dat min se wi fɔ mɛmba se wi brɔda ɛn sista dɛn kin mek mistek jɔs lɛk wi. Na tru se wi de tray fɔ gɛt “di nyu abit dɛn.” (Ɛfi. 4:​23, 24) Bɔt nɔn pan wi nɔ go ebul fɔ du dat pafɛkt wan. (Rom. 3:23) If wi mɛmba dat, i go izi mɔ fɔ lɛ wi bia wi kɔmpin dɛn, fɔgiv dɛn, ɛn “mek di wanwɔd we di spirit dɔn mek [wi] gɛt kɔntinyu” fɔ de.

We wi sɔlv di prɔblɛm dɛn we wi kin gɛt wit ɔda pipul dɛn, ilɛksɛf wi nɔ go mit dɛn fɔ tɔk bɔt am, dat go mek wi kɔntinyu fɔ gɛt “wanwɔd” ɛn “pis wit [wi] kɔmpin dɛn.” Di Grik wɔd we dɛn translet as “gɛt pis wit una kɔmpin dɛn” na Ɛfishians 4:3 de na Koloshians 2:19 as “di tin dɛn we mek di bon dɛn jɔyn togɛda.” Jɔs lɛk aw sɔntin de we de mek di bɔn dɛn jɔyn togɛda, na so di pis ɛn lɔv we wi gɛt de mek wi kɔntinyu fɔ de nia wi brɔda ɛn sista dɛn pan ɔl we sɔntɛnde dɛn kin du tin dɛn we wi nɔ lɛk.

So we yu kɔmpin Kristian ɔfɛn yu ɔ du sɔntin we mek yu vɛks, bifo yu jɔs pe atɛnshɔn to di bad tin we i du, tray fɔ sho sɔri-at. (Kol. 3:12) Bikɔs wi ɔl nɔ pafɛkt, i go bi se yusɛf dɔn ɔfɛn ɔda pɔsin. We yu de mɛmba dat, i go ɛp yu fɔ “mek di wanwɔd we di spirit dɔn mek una gɛt kɔntinyu” fɔ de.