Dɛn Bigin Sɔfa

ADAM ɛn Iv bigin gɛt bɔku prɔblɛm dɛn we Gɔd drɛb dɛn na di gadin na Idɛn. Dɛn bigin wok tranga wan fɔ gɛt tin fɔ it. No fayn tik we de bia frut nɔ bin de usay dɛn de naw. Na soso chukchuk bin de de. Ɔl dɛn bad tin ya apin to Adam ɛn Iv bikɔs dɛn nɔ du wetin Gɔd tɛl dɛn. So dɛn nɔto Gɔd in padi dɛn igen.

Di tin we bad pas ɔl, na we Adam ɛn Iv nɔ go de igen sote go. Mɛmba se, Gɔd bin dɔn wɔn dɛn se if dɛn it da tik in frut, dɛn go day. So frɔm da tɛm we dɛn it am, dɛn bigin ol smɔl smɔl te dɛn day. Yu si wetin mek i fayn fɔ yɛri Gɔd in wɔd!

Adam ɛn Iv bigin bɔn pikin dɛn afta Gɔd drɛb dɛn na di gadin na Idɛn. Dis min se di pikin dɛnsɛf gɛt fɔ ol ɛn day.

If Adam ɛn Iv bin du wetin Jiova tɛl dɛn, layf bin fɔ swit fɔ dɛn ɛn dɛn pikin dɛn. Dɛn bin fɔ de na dis wɔl wit gladi at sote go. Nɔbɔdi nɔ bin fɔ ol, sik ɔ day sɛf.

Gɔd want mek pipul dɛn de wit gladi at sote go. So i prɔmis se, tɛm go kam we dat go apin. Di wɔl go fayn ɛn ɔlman go gɛt wɛlbɔdi. Ɔlman go bi padi wit dɛn kɔmpin ɛn wit Gɔd.

Bɔt Iv nɔto Gɔd in padi igen. Na dat mek i nɔ bin izi fɔ am we i bin de bɔn in pikin dɛn. I bin de fil siriɔs pen ɛnitɛm we i want bɔn. Yu nɔ fil se ɔl dɛn bad tin ya apin to Iv bikɔs i nɔ yɛri Jiova in wɔd?

Adam ɛn Iv bɔn bɔku bɔy ɛn gyal pikin dɛn. Dɛn kɔl di fɔs bɔy pikin Ken ɛn di sɛkɔn wan Ebɛl. Yu no wetin apin to Ken ɛn Ebɛl?