Adam ɛn Iv Nɔ Bin Obe Gɔd

Wan de we Iv bin de in wangren, wan snek tɔk to am. I aks Iv se: ‘Na tru se Gɔd nɔ want mek una it frɔm ɔl dɛn tik dɛn ya?’ Iv tɛl am se: ‘Wi kin it frɔm dɛn ɔl, bɔt wi nɔ fɔ it di wan we de midul di gadin. If wi it di frut we da tik de de bia, wi go day.’ Di snek tɛl am se: ‘Una nɔ go day. Infakt, if una it frɔm di tik una go tan lɛk Gɔd.’ Dat na tru? Nɔ, na lay. Bɔt Iv biliv am. Di mɔ we Iv de luk di frut, na di mɔ i bin want am. I it di frut ɛn gi sɔm to Adam. Adam bin no se dɛn go day if dɛn nɔ obe. Bɔt pan ɔl dat, i it di frut.

Leta da sem de de, Jiova tɔk to Adam ɛn Iv. I aks dɛn wetin mek dɛn nɔ obe am. Iv blem di snek, ɛn Adam blem Iv. Bikɔs Adam ɛn Iv nɔ obe Jiova, I pul dɛn kɔmɔt na di gadin. Jiova put enjɛl dɛn ɛn sɔd we gɛt faya na di rod fɔ go na di gadin fɔ mek shɔ se dɛn nɔ go de bak.

Jiova tɔk se i go pɔnish di wan we lay to Iv. Nɔto di snek bin rili tɔk to Iv. Jiova nɔ bin mek snek dɛn we de tɔk. Na wan bad enjɛl bin mek di snek tɔk. I du dis fɔ ful Iv. Dɛn kɔl da enjɛl de Setan. Tumara bambay, Jiova go dɔnawe wit Setan so dat i nɔ go ful pipul dɛn igen fɔ du bad tin dɛn.