Frɔm we di Ebi Ren Kam te di Izrɛlayt dɛn Kɔmɔt na Ijipt

We di Ebi Ren bin kam na et pipul dɛn nɔmɔ bin sev. As tɛm de go, pipul dɛn bigin bɔku na di wɔl. Dɛn bɔn Ebraam 352 ia afta di Ebi Ren kam. Wi go lan aw Gɔd gi Ebraam di bɔy pikin we i bin prɔmis am. Di pikin nem Ayzak. Wi go lan bak bɔt aw Gɔd bin pik Jekɔb, pan Ayzak in tu bɔy pikin dɛn.

Jekɔb bin gɛt big famili. I bɔn 12 bɔy pikin dɛn ɛn sɔm gyal pikin dɛn. Tɛn pan Jekɔb in bɔy pikin dɛn bin et wan pan dɛn smɔl brɔda we nem Josɛf. Ɛn dɛn sɛl am fɔ bi slev na Ijipt. Leta, Josɛf bi wan impɔtant pɔsin na Ijipt. We plɛnti tin fɔ it nɔ bin de, Josɛf tɛst in brɔda dɛn fɔ no if dɛn dɔn chenj. Afta ɔl dis, Jekɔb in wan ol famili go de na Ijipt. Na Jekɔb in famili dɛn kɔl di Izrɛlayt dɛn. Di Izrɛlayt dɛn go na Ijipt 290 ia afta dɛn bɔn Ebraam.

Di Izrɛlayt dɛn de na Ijipt fɔ 215 ia. We Josɛf day, di Izrɛlayt dɛn bi slev na Ijipt. We i te smɔl, na de dɛn bɔn Mozis, ɛn Gɔd yuz am fɔ pul di Izrɛlayt dɛn kɔmɔt na Ijipt. So, ɔltin na Pat TU apin insay 857 ia.