Gɔd Tɛst Ebraam in Fet

YU DE si wetin Ebraam de du naya? I ol nɛf, ɛn i tan lɛk se na kil i want kil in pikin. Wetin mek i fɔ du dat? Bifo wi tɔk bɔt dat, lɛ wi tɔk fɔs bɔt aw Ebraam ɛn Sera bin bɔn dɛn pikin.

Mɛmba se, Gɔd bin dɔn prɔmis dɛn se dɛn go bɔn pikin. Bɔt i bin tan lɛk se Ebraam ɛn Sera nɔ go ebul bɔn pikin igen bikɔs dɛn bin dɔn ol. Pan ɔl we dɛn dɔn ol, Ebraam bin biliv se Gɔd go ebul mek dɛn bɔn pikin. So wetin bin apin?

Wan ol ia pas afta Gɔd bin dɔn prɔmis dɛn. We Ebraam bin ol 100 ia ɛn Sera bin ol 90 ia, dɛn bɔn wan bɔy pikin we nem Ayzak. So Gɔd du wetin i prɔmis!

Bɔt we Ayzak dɔn tɔn big man, Jiova tɛst Ebraam in fet. I kɔl se: ‘Ebraam!’ Ɛn Ebraam ansa se: ‘Yɛs, luk mi naya!’ So Gɔd tɛl am se: ‘Tek yu pikin, yu wan gren pikin we na Ayzak, ɛn go ɔp wan mawnten we a go sho yu. We yu rich de, kil yu pikin ɛn mek am sakrifays.’

Dat go mɔs dɔn mek Ebraam in at pwɛl bad bikɔs Ebraam bin lɛk in pikin tumɔs. Ɛn mɛmba se, Gɔd bin dɔn prɔmis se Ebraam in pikin dɛn go de na Kenan. Bɔt aw dis go apin if Ebraam kil Ayzak? Ebraam nɔ bin no wetin mek Gɔd tɛl am fɔ kil in pikin, bɔt i stil du wetin Gɔd tɛl am.

We Ebraam go ɔp di mawnten, i tay Ayzak ɛn put am pan di ɔlta we i mek wit stik dɛn. Dɔn i pul di nɛf fɔ kil in pikin. Bɔt as i want kil am so, na de Gɔd yuz wan enjɛl fɔ kɔl se: ‘Ebraam, Ebraam!’ Ɛn Ebraam ansa se: ‘Yɛs, luk mi naya!’

Dɔn Gɔd tɛl am se: ‘Nɔ kil yu pikin. Na naw a dɔn no se yu gɛt fet bikɔs yu rɛdi fɔ kil yu wan gren pikin fɔ mi.’

Ebraam bin gɛt trɔng fet! I bin biliv se Jiova go ebul du ɛnitin, ɛn i biliv se Jiova go ebul gi Ayzak layf bak. Bɔt Gɔd nɔ bin want mek Ebraam kil Ayzak. So Gɔd mek wan ship fasin pan smɔl smɔl tik dɛn we bin de nia de. Dɔn i tɛl Ebraam fɔ lɛf in pikin, ɛn sakrifays di ship.