Sɔntin Tɛst Ebraam in Fet

Ebraam bin tich in pikin Ayzak fɔ lɛk Jiova ɛn fɔ abop pan ɔl In prɔmis dɛn. Bɔt we Ayzak ol lɛk 25 ia, Jiova tɛl Ebraam fɔ du sɔntin we nɔ rili izi fɔ du. Wetin Jiova tɛl am fɔ du?

Gɔd tɛl Ebraam se: ‘Duya tek yu wangren bɔypikin ɛn sakrifays am to mi na wan mawntin na Mɔraya.’ Ebraam nɔ bin no wetin mek Jiova tɛl am fɔ du dat. Bɔt i bin stil obe Jiova.

As do klin so di nɛks de, Ebraam tek Ayzak wit tu pan in savant dɛn, ɛn dɛn go na Mɔraya. Afta we dɛn dɔn travul fɔ tri dez, dɛn bin de fa bɔt dɛn bin de si di mawntin dɛn. Ebraam tɛl in savant dɛn fɔ wet so dat in ɛn Ayzak go go fɔ mek di sakrifays. Ebraam gi Ayzak di faya wud fɔ tot, ɛn in ol di nɛf. Ayzak aks in papa se: ‘We di animal we wi de kam sakrifays?’ Ebraam ansa am se: ‘Mi pikin, Jiova go gi wi.’

We dɛn rich na di mawntin, dɛn bil wan ɔlta. Afta dat, Ebraam tay Ayzak in an ɛn fut dɛn ɛn put am pantap di ɔlta.

Ebraam tek di nɛf. Wantɛm wantɛm, Jiova in enjɛl ala lawd wan frɔm ɛvin se: ‘Ebraam! Nɔ kil di bɔbɔ! A dɔn no naw se yu gɛt fet pan Gɔd bikɔs yu bin rɛdi fɔ sakrifays yu bɔypikin.’ Dɔn Ebraam si wan ship we in ɔn dɛn fasin na di bush. Kwik kwik wan, i lus Ayzak ɛn sakrifays di ship.

Frɔm da tem de, Jiova kɔl Ebraam in padi. Yu no wetin mek? Ebraam du ɔl wetin Jiova want am fɔ du, pan ɔl we i nɔ bin ɔndastand wetin mek i tɛl am fɔ du dat.

Jiova ripit wetin i bin dɔn prɔmis Ebraam, i se: ‘A go blɛs yu ɛn a go mek yu pikin dɛn bɔku.’ Dis min se na tru Ebraam in famili Jiova go blɛs ɔl di wan dɛn we de obe am.