Mozis ɛn Erɔn Go to Fɛro

WE MOZIS go bak na Ijipt, i tɛl in brɔda we nem Erɔn bɔt ɔl di mirekul dɛn. Ɛn we Mozis ɛn Erɔn du dɛn mirekul ya bifo di Izrɛlayt dɛn, dɛn ɔl biliv se Jiova de wit dɛn.

Dɔn Mozis ɛn Erɔn go to Fɛro. Dɛn tɛl am se: ‘Jiova we na di Izrɛlayt dɛn Gɔd se, “Mek mi pipul dɛn go fɔ tri dez, fɔ lɛ dɛn go wɔship mi na di emti land usay pɔsin nɔ go ebul de.”’ Bɔt Fɛro tɛl dɛn se: ‘A nɔ sabi Jiova. Ɛn a nɔ de mek di Izrɛlayt dɛn go.’

Fɛro vɛks bad bad wan bikɔs di pipul dɛn want lɛf dɛn wok fɔ go wɔship Jiova. So i fos dɛn fɔ wok tranga wan pas aw dɛn bin de wok fɔs. Di Izrɛlayt dɛn blem Mozis se na in mek dɛn de sɔfa, ɛn dis mek Mozis fil bad. Bɔt Jiova tɛl Mozis mek i nɔ wɔri. Jiova tɛl am bak se: ‘A go mek Fɛro fri mi pipul dɛn.’

Mozis ɛn Erɔn go bak to Fɛro. Dis tɛm ya, dɛn du wan mirekul. Erɔn ib in stik na grɔn, ɛn di stik tɔn wan big snek. Fɛro in sɛnsman dɛn bak ib stik dɛn na grɔn ɛn di stik dɛn tɔn snek. Bɔt luk o, Erɔn in snek de swɛla di sɛnsman dɛn snek dɛn! Stil Fɛro nɔ mek di Izrɛlayt dɛn go.

So naw Jiova de kam sho Fɛro se na in na Gɔd. Yu no aw i du dis? I mek tɛn bad tin dɛn apin na Ijipt.

We sɔm pan di bad tin dɛn kin dɔn bi, Fɛro kin sɛn mek dɛn go kɔl Mozis. Dɔn i kin tɛl Mozis se: ‘Mek dis bad tin lɛf fɔ apin, ɛn a go mek una go.’ Bɔt we di bad tin kin lɛf fɔ apin, Fɛro nɔ kin mek di pipul dɛn go. Bɔt afta di las bad tin apin, Fɛro mek di Izrɛlayt dɛn go.

Yu sabi ɔl di tɛn bad tin dɛn we apin na Ijipt? Tɔn na di ɔda pej lɛ wi lan bɔt dɛn.