Wan Nyu Tin fɔ It

WETIN yu tink se di pipul dɛn de pik na grɔn so? Na tin fɔ it. I wayt ɛn fiba pawda.

Di Izrɛlayt dɛn dɔn kɔmɔt na Ijipt fɔ lɛk wan mɔnt so. Dɛn dɔn kam de na di ɛmti land usay pɔsin nɔ go ebul de. Bɛtɛ tin fɔ it nɔ de gro de. Dis mek di pipul dɛn bigin grɔmbul se: ‘I bin fɔ bɛtɛ if Jiova fɔ dɔn mek wi day na Ijipt. De bɛtɛ bikɔs wi bin de gɛt ɔl di tin dɛn we wi want fɔ it.’

So Jiova se: ‘A de kam mek tin fɔ it kɔmɔt na di klawd.’ Ɛn na so Jiova du. Di ɔda mɔnin, we di Izrɛlayt dɛn si dis wayt tin na grɔn, dɛn bigin fɔ aks dɛn kɔmpin dɛn se: ‘Na wetin dis?’

Mozis tɛl dɛn se: ‘Na di tin we Jiova dɔn gi una fɔ it.’ Di pipul dɛn bigin kɔl dis nyu tin fɔ it MANA. I swit lɛk flat kek we dɛn mek wit ɔni.

Mozis tɛl di pipul dɛn se: ‘Una tek ɔmɔs una ebul fɔ it.’ So ɛvri mɔnin na so di pipul dɛn bin de du. We di san kin wam, di mana we kin lɛf na grɔn kin mɛlt.

Mozis tɛl di Izrɛlayt dɛn bak se: ‘Una nɔ fɔ kip di mana te di ɔda de.’ Bɔt sɔm pipul dɛn nɔ bin de du wetin Mozis se. Yu no wetin kin apin we dɛn kip di mana te di ɔda de? Di mana kin pul tumbu ɛn i kin smɛl bad.

Bɔt wan de bin de insay di wik we Jiova tɛl di pipul dɛn fɔ tek mana fɔ tu dez. Dat na bin di de we mek siks. Ɛn Jiova se mek dɛn kip sɔm fɔ di de we mek sɛvin bikɔs mana nɔ go de da de de. We dɛn kin kip di mana te di de we mek sɛvin, i nɔ kin pul tumbu ɛn i nɔ kin smɛl. Dis na ɔda mirekul.

Na mana Jiova bin de gi di Izrɛlayt dɛn fɔ it ɔl di tɛm we dɛn bin de na di ɛmti land usay pɔsin nɔ go ebul de.