Jona ɛn di Big Fish

LUK di man we de insay di wata. Na trɔbul dɔn mit am so. Da fish de kam swɛla am! Yu no udat na dis man? In nem na Jona. Lɛ wi si aw i gɛt dis trɔbul.

Jona na Jiova in prɔfɛt. We Ilaysha dɔn day fɔ sɔm tɛm, Jiova tɛl Jona se: ‘Go na wan big tɔŋ we dɛn de kɔl Ninivɛ. Di bad we di pipul dɛn de du, dɔn pasmak. So a want mek yu go wɔn dɛn.’

Bɔt Jona nɔ bin want go. So i tek bot fɔ go ɔdasay. Jiova nɔ gladi we Jona de rɔnawe. So I mek ebi briz bigin blo. Dis mek di wata rɔf bad bad wan; i lɛf smɔl lɛ di bot kapsay. Di man dɛn we de wok na di bot fred, ɛn dɛn bigin pre to dɛn gɔd dɛn.

We ɔl dis de bi, Jona tɛl di man dɛn se: ‘Na Jiova a de wɔship, na in mek di ɛvin ɛn di wɔl. I tɛl mi fɔ du sɔntin we a nɔ want fɔ du.’ So di man dɛn we de wok na di bot aks am se: ‘Wetin wi fɔ du to yu we go mek ɔl dɛn tin ya lɛf fɔ apin?’

Jona tɛl dɛn se: ‘Una ib mi insay di wata, ɛn di wata go stɛdi bak.’ Di man dɛn nɔ bin want du am. Bɔt we di briz bin stil de blo ɛn di wata bin de rɔf mɔ ɛn mɔ, di man dɛn ib Jona insay di wata. As dɛn ib am insay di wata so, na de di briz lɛf fɔ blo wantɛm ɛn di wata stɛdi bak.

As Jona de go dɔŋ di wata so, na de di big fish swɛla am. Bɔt i nɔ day. I tek tri dez ɛn tri nɛt na di fish in bɛlɛ. Jona fil bad fɔ we i nɔ go usay Jiova sɛn am. So yu no wetin i du?

Jona pre mek Jiova ɛp am. So Jiova mek di fish go vɔmit Jona na land. Afta dat, Jona go na Ninivɛ. Wetin Jona in stori de tich wi? I de tich wi se i fayn fɔ du ɛnitin we Jiova tɛl wi fɔ du.