Jiova Bin Peshɛnt wit Jona

Di pipul dɛn we bin de na di Asirian siti na Ninivɛ bin rili wikɛd. Jiova tɛl prɔfɛt Jona fɔ go na Ninivɛ fɔ wɔn di pipul dɛn fɔ chenj di we aw dɛn de liv dɛn layf. Bɔt Jona rɔnawe go ɔdasay. I go insay wan big bot we de go na Tashish fɔ rɔnawe.

We di bot de na di wata de go, ebi ebi briz bigin fɔ blo ɛn di pipul dɛn we de kɔntrol di bot bin rili fred. Dɛn bigin fɔ pre to dɛn gɔd dɛn ɛn aks se: ‘Wetin mek dis de apin?’ Faynali, Jona tɛl dɛn se: ‘Na mi una fɔ blem fɔ dis. A de rɔnawe frɔm wetin Jiova dɔn tɛl mi fɔ du. Una trowe mi insay di wata ɛn di ebi ebi briz go stɔp.’ Di pipul dɛn we de kɔntrol di bot nɔ bin want fɔ trowe Jona insay di wata bɔt i bin fos dɛn fɔ du am. We dɛn trowe am insay di wata, di ebi ebi briz stɔp.

Jona bin tink se i go day. As i de go dɔŋ dɔŋ di wata, i pre to Jiova. Dɔn Jiova sɛn wan big big fish. Di fish swɛla Jona, bɔt i nɔ kil am. We i de insay di fish in bɛlɛ, i pre to Jiova se: ‘A prɔmis se a go obe yu ɔltɛm.’ Jiova bin kɔntinyu fɔ protɛkt Jona we i de insay di fish in bɛlɛ fɔ tri dez, ɛn i mek di fish go vɔmit Jona na dray land.

We Jiova dɔn sev Jona, fɔ se dis min se i nɔ nid fɔ go na Ninivɛ igen? Nɔ. Jiova tɛl Jona fɔ go de bak. Dis tɛm, Jona du wetin Jiova tɛl am. I go na Ninivɛ ɛn tɛl di pipul dɛn se: ‘Insay 40 dez, dɛn go dɔnawe wit Ninivɛ.’ Dɔn sɔntin we Jona nɔ de tink bɔt bin apin; di pipul dɛn na Ninivɛ lisin ɛn dɛn chenj di we aw dɛn de liv dɛn layf. Di kiŋ na Ninivɛ tɛl in pipul dɛn se: ‘Una pre to Gɔd ɛn lɛf fɔ du wetin bad. Sɔntɛm dat go mek i nɔ dɔnawe wit wi.’ We Jiova si se di pipul dɛn dɔn chenj, i nɔ dɔnawe wit Ninivɛ.

Jona bin vɛks we Jiova nɔ dɔnawe wit da siti de. Jɔs tink bɔt dis: Jiova dɔn de peshɛnt wit Jona ɛn sho am sɔri-at, bɔt Jona nɔ sho sɔri-at fɔ di pipul dɛn na Ninivɛ. Bifo dat, i kɔmɔt insay di siti ɛn go sidɔm ɔnda wan plant we gɛt shed in vɛks vɛks wan. Dɔn di plant day, ɛn Jona vɛks. So Jiova tɛl am se: ‘Yu kia mɔ fɔ dis plant pas di we aw yu kia fɔ di pipul dɛn na Ninivɛ. A sho dɛn sɔri-at, ɛn dat mek dɛn nɔ day.’ Wetin na di lɛsin? Di pipul dɛn we de na Ninivɛ bin impɔtant pas di plant.