Wan Man We Nɔ Bin De Fred

YU NO udat na dis man we dɛn pipul ya de laf? Na in nem Jɛrimaya. In na Gɔd in prɔfɛt.

Jiova tɛl Jɛrimaya fɔ bi in prɔfɛt afta Kiŋ Josaya bigin pwɛl pwɛl di aydɔl dɛn na di land. Jɛrimaya fil se i tu smɔl fɔ bi prɔfɛt. Bɔt Jiova tɛl Jɛrimaya se i go ɛp am.

Jɛrimaya tɛl di Izrɛlayt dɛn fɔ lɛf fɔ du bad. I tɛl dɛn bak se: ‘Di gɔd dɛn we di pipul dɛn na ɔda kɔntri dɛn de wɔship, na lay lay gɔd dɛn.’ Bɔt bɔku Izrɛlayt dɛn nɔ de wɔship Jiova, na aydɔl dɛn dɛn de wɔship. We Jɛrimaya bin de tɛl di pipul dɛn se Gɔd de kam pɔnish dɛn fɔ di bad tin dɛn we dɛn de du, dɛn bin jɔs de laf am.

Afta sɔm tɛm, Josaya day. Ɛn afta tri mɔnt, na in pikin we nem Jeoakim bi kiŋ. Jɛrimaya kɔntinyu fɔ tɛl di pipul dɛn se: ‘Dɛn go kam pwɛl Jerusɛlɛm if una nɔ lɛf fɔ du bad.’ Di prist dɛn bɔkul Jɛrimaya ɛn ala pan am se: ‘Dɛn fɔ kil yu fɔ we yu de tɔk dɛn tin ya.’ Dɔn dɛn tɛl di bigman dɛn na Izrɛl se: ‘Una mek dɛn kil Jɛrimaya bikɔs i dɔn tɔk bad bɔt wi tɔŋ.’

Wetin Jɛrimaya go du naw? In na man we nɔ de fred. I tɛl dɛn ɔl se: ‘Na Jiova sɛn mi fɔ kam tɛl una dɛn tin ya. If una nɔ lɛf fɔ du bad, Jiova go kam pwɛl Jerusɛlɛm. Bɔt a want lɛ una no se, if una kil mi, una dɔn kil pɔsin we nɔ du bad.’

Di bigman dɛn nɔ mek dɛn kil Jɛrimaya, ɛn di Izrɛlayt dɛn kɔntinyu fɔ du bad. Leta, Nɛbukanɛza we na di kiŋ na Babilɔn, kam fɛt di pipul dɛn na Jerusɛlɛm. Afta dat, Nɛbukanɛza mek di Izrɛlayt dɛn bi in savant dɛn. I kɛr bɔku go na Babilɔn. Aw yu go fil if pipul dɛn we yu nɔ wan de sabi, pul yu kɔmɔt usay yu de ɛn kɛr yu go na ples we yu nɔ wan de go yet?