Jiova Sɛn Jɛrimaya fɔ Go Prich

Jiova pik Jɛrimaya fɔ bi prɔfɛt fɔ di pipul dɛn na Juda. I tɛl am fɔ go prich to di pipul dɛn ɛn fɔ go wɔn dɛn fɔ stɔp fɔ du bad. Jɛrimaya tɔk se: ‘Bɔt Jiova, mi na smɔl bɔbɔ. A nɔ sabi aw fɔ tɔk to di pipul dɛn.’ Jiova tɛl am se: ‘A go tɛl yu wetin yu fɔ se. A go ɛp yu.’

Jiova tɛl Jɛrimaya fɔ gɛda di bigman dɛn fɔ di pipul dɛn ɛn brok wan kle pɔt bifo dɛn ɛn tɛl dɛn se: ‘Na so a go brok Jerusɛlɛm.’ We Jɛrimaya bin du wetin Jiova se, di bigman dɛn vɛks bad bad wan. Wan prist we nem Pashɔ bit Jɛrimaya ɛn lɔk in fut dɛn, in an dɛn, ɛn in nɛk midul ebi bod dɛn. Ol nɛt, Jɛrimaya nɔ bin ebul fɔ muv in bɔdi. Pashɔ pul am de di nɛks mɔnin. Jɛrimaya tɔk se: ‘A nɔ go ebul fɔ bia dis igen. A de kam lɛf fɔ prich.’ Bɔt i bin giv ɔp? Nɔ. We Jɛrimaya tek tɛm tink if i fɔ lɛf fɔ prich, i tɔk se: ‘Jiova in mɛsej tan lɛk faya we de bɔn insay mi. A nɔ go ebul fɔ stɔp fɔ prich.’ Jɛrimaya bin kɔntinyu fɔ wɔn di pipul dɛn.

Afta sɔm tɛm, dɛn gɛt wan nyu kiŋ na Juda. Di prist ɛn di lay lay prɔfɛt dɛn bin et di mɛsej we Jɛrimaya de prich. Dɛn tɛl di prins dɛn se: ‘Dis man fit fɔ day.’ Jɛrimaya tɔk se: ‘If una kil mi, una go kil pɔsin we nɔ du natin bad. Na wetin Jiova tɛl mi a de tɔk, nɔto wetin mi want.’ We di prins dɛn yɛri dat, dɛn tɔk se: ‘Dis man nɔ fit fɔ day.’

Jɛrimaya kɔntinyu fɔ prich ɛn dat mek di prins dɛn vɛks bad bad wan. Dɛn aks di kiŋ fɔ mek dɛn kil Jɛrimaya. Di kiŋ tɛl dɛn fɔ du ɛnitin we dɛn want wit Jɛrimaya. Dɛn tek Jɛrimaya ɛn go put am insay wan dip watawɛl we gɛt pɔtɔpɔtɔ so dat i go day. Jɛrimaya bin bigin fɔ go dɔŋ di pɔtɔpɔtɔ.

Dɔn Ibɛdmɛlɛk we na wan man we gɛt ay pozishɔn na di pales tɛl di kiŋ se: ‘Di prins dɛn dɔn put Jɛrimaya insay wan watawɛl! If wi lɛf am de, i go day.’ Di kiŋ tɛl Ibɛdmɛlɛk fɔ tek 30 man dɛn fɔ go pul Jɛrimaya insay di watawɛl. Yu nɔ tink se wi fɔ tan lɛk Jɛrimaya we nɔ bin alaw ɛnitin fɔ stɔp am fɔ mek i nɔ prich?