Jizɔs Mɛn Pipul dɛn we Sik

ƐNISAY we Jizɔs bin de go, i bin de mɛn di wan dɛn we sik. Pipul dɛn na ɔda vilej ɛn tɔŋ dɛn bigin yɛri bɔt di mirekul dɛn we Jizɔs de du. So dɛn bigin fɔ kam wit pipul dɛn we nɔ de waka, di wan dɛn we blaynd, di wan dɛn we dɛf, ɛn di wan dɛn we gɛt ɔda sik dɛn. Ɛn Jizɔs bin de mɛn dɛn ɔl.

Na lɛk tri ia so dɔn pas frɔm we Jɔn baptayz Jizɔs. Wan de, Jizɔs tɛl in apɔsul dɛn se i nɔ go te igen, i gɛt fɔ go na Jerusɛlɛm, ɛn pipul dɛn go kil am de. Bɔt i tɛl dɛn se i go gɛt layf bak. Bɔt bifo da tɛm de kam, i kɔntinyu fɔ mɛn di wan dɛn we sik.

Wan Sabat de, Jizɔs bin de tich pipul dɛn. Sabat de na de we di Ju pipul dɛn fɔ blo. Di uman na di pikchɔ dɔn sik fɔ 18 ia naw. Di sik mek di uman bɛn ɛn i nɔ ebul tinap stret. So Jizɔs tɔch am, ɛn di uman bigin tinap stret. I wɛl wantɛm wantɛm!

Dis mek di edman dɛn pan Gɔd biznɛs vɛks. Wan pan dɛn ala pan di pipul dɛn se: ‘Na siks dez pɔsin fɔ wok. So na wan pan dɛn de ya, una fɔ kam fɔ mek Jizɔs mɛn una. Una nɔ fɔ kam di de we na Sabat.’

Bɔt Jizɔs tɛl di edman dɛn se: ‘Una na bad pipul dɛn. We di Sabat de kin rich, una nɔ kin kɛr una kaw dɛn fɔ go drink wata? So bikɔs na Sabat de, a nɔ fɔ mɛn dis uman we dɔn sik fɔ 18 ia?’ Di tin we Jizɔs tɔk mek dɛn bad pipul ya shem.

Leta, Jizɔs ɛn in apɔsul dɛn bigin go na Jerusɛlɛm. We dɛn rich nia Jɛriko, tu blaynd man dɛn we de beg yɛri se Jizɔs de pas. So dɛn bigin ala se: ‘Jizɔs, duya ɛp wi!’

Jizɔs kɔl di blaynd man dɛn, dɔn i aks dɛn: ‘Wetin una want mek a du fɔ una?’ Dɛn tɛl am se: ‘Masta, duya mek wi si.’ Dɔn Jizɔs tɔch dɛn yay, ɛn wantɛm wantɛm, dɛn bigin si. Yu no wetin mek Jizɔs bin de du ɔl dɛn mirekul ya? Na bikɔs i lɛk pipul dɛn ɛn i want mek dɛn biliv am. Dis mek wi no se we i bigin rul, nɔbɔdi nɔ go sik igen na di wɔl.