Jizɔs Go na Jerusɛlɛm Lɛk Kiŋ

AFTA Jizɔs mɛn dɛn tu blaynd man dɛn, i kam na wan smɔl vilej we de nia Jerusɛlɛm. Na de i tɛl tu pan in disaypul dɛn se: ‘Una go na di vilej we de bifo una so, ɛn una go si wan dɔnki pikin. Una lus am ɛn kam wit am to mi.’

We dɛn kam wit di dɔnki to Jizɔs, na de i sidɔm pan am. Dɔn i rayd am fɔ go na Jerusɛlɛm. We i rich nia de, bɔku bɔku pipul dɛn kam mit am. Bɔku pan di pipul dɛn pul dɛn klos we dɛn wɛr pantap ɛn prɛd dɛn na di rod. Ɔda wan dɛn kɔt pam tri lif, ɛn le dɛn na di rod. Dɔn dɛn bigin ala se: ‘Mek Gɔd blɛs di kiŋ we i dɔn sɛn fɔ kam tinap fɔ am!’

Fɔstɛm, di nyu kiŋ dɛn na Izrɛl bin de rayd dɔnki pikin fɔ kam na Jerusɛlɛm fɔ mek di pipul dɛn si dɛn. Na di sem tin Jizɔs sɛf de du. Ɛn dɛn pipul ya de sho se dɛn want mek Jizɔs bi dɛn kiŋ. Bɔt nɔto ɔlman bin want mek i bi kiŋ. Sɔntin apin na di tɛmpul we mek wi no se nɔto ɔlman bin want mek Jizɔs bi kiŋ.

We Jizɔs go na di tɛmpul, i mɛn pipul dɛn we blaynd ɛn ɔda wan dɛn we nɔ de waka. We dɛn smɔl pikin dɛn si dɛn tin ya, dɛn bigin prez Jizɔs. Bɔt dis mek di prist dɛn vɛks, so dɛn aks Jizɔs se: ‘Yu de yɛri wetin di pikin dɛn de tɔk?’

Jizɔs tɛl dɛn se: ‘Yɛs, a de yɛri wetin dɛn de tɔk.’ Dɔn i aks dɛn se: ‘Una nɔ rid na di Baybul se, “Gɔd go mek smɔl pikin dɛn prez am?”’ So di pikin dɛn kɔntinyu fɔ prez di kiŋ fɔ Gɔd in kiŋdɔm.

Wisɛf fɔ bi lɛk dɛn smɔl pikin ya, nɔto so? Sɔm pipul dɛn go tray fɔ mek wi lɛf fɔ tɔk bɔt Gɔd in kiŋdɔm. Bɔt wi fɔ kɔntinyu fɔ tɛl ɔda pipul dɛn bɔt di fayn fayn tin dɛn we Jizɔs gɛt fɔ du fɔ mɔtalman.

Di tɛm fɔ mek Jizɔs bi kiŋ nɔ bin dɔn kam yet we i bin de na di wɔl. Na ustɛm i go bi kiŋ? Na dat Jizɔs in disaypul dɛn bin want fɔ no. Wi go tɔk bɔt dat na di ɔda stori.