Jizɔs De Ɔp Mawnt Ɔliv

NA JIZƆS ɛn in apɔsul dɛn yu de si ɔp Mawnt Ɔliv so. Di apɔsul dɛn we de wit am na Andru, Pita, Jems ɛn Jɔn. Na di tɛmpul we de na Jerusɛlɛm yu de si oba yanda so

Na tu dez dɔn pas frɔm we Jizɔs rayd da dɔnki pikin fɔ kam na Jerusɛlɛm. Naw na Tyusde. Jizɔs go na di tɛmpul bifo i kam na Mawnt Ɔliv. Na di tɛmpul i de we di prist dɛn tray fɔ ol am ɛn kil am. Bɔt dɛn fred bikɔs di pipul dɛn lɛk Jizɔs.

Jizɔs tɛl di edman dɛn pan Gɔd biznɛs se: ‘Una na snek dɛn.’ Dɔn Jizɔs tɛl dɛn se Gɔd go pɔnish dɛn bikɔs dɛn dɔn du bɔku bad tin dɛn. Afta dat, Jizɔs kam ɔp Mawnt Ɔliv, ɛn dɛn 4 apɔsul ya bigin aks am kwɛstyɔn dɛn. Yu no wetin dɛn de aks Jizɔs?

Di apɔsul dɛn de aks am bɔt di tin dɛn we gɛt fɔ bi tumara bambay. Dɛn no se Jizɔs go mek bad tin dɛn lɛf fɔ bi na di wɔl. Bɔt dɛn want no ustɛm dis go bi, ɛn ustɛm Jizɔs go kam fɔ rul.

Jizɔs no se in disaypul dɛn nɔ go ebul si am we i go kam bak bikɔs i go de na ɛvin. So Jizɔs tɛl in apɔsul dɛn sɔm pan di tin dɛn we gɛt fɔ apin na di wɔl we i go de rul na ɛvin. Wetin na sɔm pan dɛn tin ya?

Jizɔs tɔk se wɔ go plɛnti, bɔku pipul dɛn go sik ɛn angri, plɛnti pipul dɛn go brok lɔ, ɛn di grɔn go trimbul plɛnti say. Jizɔs tɔk bak se dɛn go prich di gud nyus bɔt Gɔd in kiŋdɔm ɔlsay na di wɔl. Yu tink se dɛn tin ya de apin tide? Yɛs, dɛn de apin. So wi shɔ se Jizɔs dɔn bigin rul na ɛvin. Ɛn i nɔ go te igen, i go mek bad tin dɛn lɛf fɔ bi na di wɔl.