Jizɔs Go Bak na Ɛvin

Jizɔs mit di wan dɛn we de fala am na Galili. I tɛl dɛn fɔ du wan tin we rili impɔtant. I tɛl dɛn se: ‘Una go ɛn mek pipul dɛn bi mi disaypul dɛn ɔlsay na di wɔl. Una tich dɛn di tin dɛn we a dɔn tich una, ɛn baptayz dɛn.’ Dɔn Jizɔs prɔmis dɛn se: ‘Una mɛmba se a go de wit una ɔltɛm.’

Insay 40 dez afta we Jizɔs gɛt layf bak, i apia to bɔku bɔku pan in disaypul dɛn na Galili ɛn Jerusɛlɛm. I tich dɛn impɔtant lɛsin dɛn, ɛn i pafɔm bɔku mirekul dɛn. Dɔn Jizɔs mit in apɔsul dɛn fɔ di las tɛm na Mawnt Ɔliv. I tɛl dɛn se: ‘Una nɔ kɔmɔt na Jerusɛlɛm. Una kɔntinyu fɔ wet fɔ wetin mi Papa dɔn prɔmis.’

In apɔsul dɛn nɔ bin ɔndastand wetin i min. Dɛn aks am se: ‘Yu de kam bi di Kiŋ na Izrɛl naw?’ Jizɔs tɛl dɛn se: ‘Jiova in tɛm nɔ rich yet fɔ mek a bi Kiŋ. I nɔ go te igen, di oli sprit go gi una pawa, ɛn una go bi mi witnɛs dɛn. Una go prich na Jerusɛlɛm, Judia, Sameria, ɛn na di fa fa say dɛn na di wɔl.’

Dɔn Jizɔs go ɔp di skay ɛn di klawd kɔba am. In disaypul dɛn kɔntinyu fɔ luk ɔp, bɔt Jizɔs bin dɔn go.

Di disaypul dɛn kɔmɔt na Mawnt Ɔliv ɛn go bak na Jerusɛlɛm. In disaypul dɛn bin de mit togɛda ɔltɛm ɔp wan rum ɛn pre. Dɛn bin de wet fɔ Jizɔs fɔ tɛl dɛn wetin-ɛn-wetin dɛn fɔ du.