Jizɔs Gɛt Layf Bak

YU SABI dis uman ɛn di tu man dɛn we tinap nia am? Di uman na Meri Magdalin. Ɛn di tu man dɛn we wɛr wayt klos, na enjɛl dɛn. Di ples we Meri de luk insay so, na de dɛn put Jizɔs in dedebɔdi. Bɔt Jizɔs in bɔdi nɔ de de igen. Udat dɔn pul am de? Lɛ wi si.

Afta Jizɔs day, di prist dɛn go tɛl Paylet se: ‘We Jizɔs bin de, i bin se afta tri dez i go gɛt layf bak. So duya, sɛn sɔm man dɛn fɔ go tinap nia di grev, so dat in disaypul dɛn nɔ go go tif in bɔdi ɛn tɔk se i dɔn gɛt layf bak.’ So Paylet tɛl di prist dɛn mek dɛn sɛn sojaman dɛn fɔ go tinap nia di grev.

Bɔt afta tri dez, wan enjɛl kam na di grev ali ali mɔnin. Di enjɛl pul di ston we de na di domɔt. Di sojaman dɛn fred. Di fred mek dɛn stif ɛn dɛn nɔ ebul du natin. Leta, we dɛn luk insay di grev, dɛn nɔ si di bɔdi. Sɔm pan di sojaman dɛn go na tɔŋ ɛn tɛl di prist dɛn ɔl wetin dɔn apin. Bɔt yu no wetin dɛn bad prist ya du? Dɛn gi di sojaman dɛn mɔni ɛn tɛl dɛn se: ‘Una lay se in disaypul dɛn kam tek in bɔdi na nɛt we una de slip.’

We dis de bi, sɔm uman dɛn go na di ples usay dɛn put Jizɔs in bɔdi. Dɛn sɔprayz we dɛn nɔ si natin insay de. I nɔ tu te, di uman dɛn si tu enjɛl dɛn we wɛr brayt brayt klos. Di enjɛl dɛn aks dɛn se: ‘Wetin mek una de luk fɔ Jizɔs naya? I dɔn gɛt layf bak. Una rɔn go tɛl in disaypul dɛn.’ Di uman dɛn rɔn wit spid fɔ go tɛl di disaypul dɛn. Bɔt we dɛn de go, wan man stɔp dɛn na rod. Yu no udat na da man de? Na Jizɔs. I tɛl dɛn se: ‘Una go tɛl mi disaypul dɛn se a dɔn gɛt layf bak.’

We di uman dɛn go tɛl di disaypul dɛn se Jizɔs dɔn gɛt layf bak, di disaypul dɛn nɔ biliv. Pita ɛn Jɔn rɔn go na di grev fɔ go si fɔ dɛnsɛf. We dɛn rich, dɛn nɔ si natin na di grev! We Pita ɛn Jɔn kɔmɔt de, Meri Magdalin lɛf biɛn. Na da tɛm de i luk insay di grev we i si di tu enjɛl dɛn.

Yu no wetin apin to Jizɔs in bɔdi? Gɔd mek Jizɔs in bɔdi lɔs. Ɛn Gɔd gi Jizɔs layf bak. Bɔt i nɔ gi am mɔtalman bɔdi. I gi am spirit bɔdi, lɛk di wan we di enjɛl dɛn na ɛvin, gɛt. Bɔt fɔ lɛ Jizɔs sho in disaypul dɛn se i dɔn gɛt layf bak, i kin chenj in bɔdi fɔ lɛ pipul dɛn si am. Wi go lan bɔt dis na di ɔda stori dɛn.