Gɔd Gi Layf Bak To In Pikin

JIZƆS bin kray we in padi Lazarɔs day. Yu tink se Jiova bin fil bad we Jizɔs sɔfa ɛn day?— Di Baybul se Gɔd kin ‘fil bad’ ɛn sɔm tin dɛn we kin apin kin ‘mɔna am.’—Sam 78:​40, 41; Jɔn 11:​35.

Yu ebul imajin di pen we Jiova go dɔn fil we i si in Pikin de day?— Jizɔs bin shɔ se Gɔd nɔ go fɔgɛt am. Na dat mek jɔs bifo i day, i tɔk se: ‘Papa, na day a de day so, tek mi layf!’—Lyuk 23:​46.

Jizɔs bin shɔ se i go gɛt layf bak, ɛn i nɔ go lɛf “na ɛl,” we min di grev. Afta Jizɔs gɛt layf bak, di apɔsul Pita tɔk bɔt wetin di Baybul bin dɔn se bɔt Jizɔs. I se: “In sol nɔ bin lɛf na ɛl, ɛn in bɔdi nɔ bin rɔtin.” (Di Apɔsul Dɛn Wok [Akt] 2:​31, King James Version; Sam 16:​10) So Jizɔs in bɔdi nɔ bin rɔtin ɛn smɛl na di grev.

We Jizɔs bin de na di wɔl, i bin tɛl in disaypul dɛn se i nɔ go day fɔ lɔng tɛm. I ɛksplen to dɛn se pipul dɛn go “kil am ɛn bɛr am. Bɔt i go rayz frɔm di grev di de we mek tri.” (Na wi mek am italiks; Lyuk 9:​22) So di disaypul dɛn nɔ bin fɔ dɔn rili sɔprayz we Jizɔs gɛt layf bak. Bɔt yu tink se dɛn bin sɔprayz?— Mek wi si.

Bay dɛn tri oklɔk Frayde aftanun, di Gret Ticha bin day na di stik. Josɛf, we na wan man we gɛt mɔni ɛn we de na di Ju Ay kɔt, insɛf bin biliv Jizɔs, bɔt pipul dɛn nɔ bin no. We i kam no se Jizɔs dɔn day, i go to Paylet, we na di Roman gɔvnɔ. I aks am if i kin tek Jizɔs in bɔdi fɔ go bɛr am. Leta, Josɛf bin kɛr Jizɔs in bɔdi na wan gadin usay grev bin de we dɛn mek insay ston.

We dɛn put Jizɔs in bɔdi insay di grev, dɛn rol wan big ston bifo di grev fɔ lɔk am. I dɔn bi tri dez naw we Jizɔs day, so naw na Sɔnde. San nɔ bin dɔn kɔmɔt yet, so di ples bin stil dak. Sɔm man dɛn bin de gayd di grev. Na di bigman dɛn fɔ di prist dɛn sɛn dɛn. Yu no wetin mek?—

Di prist dɛnsɛf bin dɔn yɛri se Jizɔs se i go gɛt layf bak. So fɔ mek Jizɔs in disaypul dɛn nɔ kam tif in bɔdi ɛn se i dɔn gɛt layf bak, di prist dɛn bin put gaydman dɛn na di ples. Wantɛm wantɛm, di grɔn bigin shek. Pan ɔl we di ples bin dak, wan brayt layt shayn na di ples. Na Jiova in enjɛl! Di sojaman dɛn bin so fred dat dɛn nɔ ebul muv. Di enjɛl go na di grev, ɛn pul di ston. Di grev bin ɛmti!

I apin jɔs lɛk aw di apɔsul Pita tɔk leta, we i se: “Gɔd dɔn mek Jizɔs rayz frɔm di grev.” (Di Apɔsul Dɛn Wok [Akt] 2:​32) Gɔd mek Jizɔs gɛt layf bak wit bɔdi we tan lɛk di wan we i bin gɛt bifo i kam na di wɔl. I bin gɛt layf bak wit spirit bɔdi lɛk di wan we di enjɛl dɛn gɛt. (Pita In Fɔs Lɛta 3:​18) So if pipul dɛn si Jizɔs, i go mɔs bi se i tek mɔtalman bɔdi. Yu tink se na so i bi?— Lɛ wi si.

Di san bin dɔn bigin kɔmɔt. Di sojaman dɛn dɔn go. Meri Magdalin ɛn sɔm pan Jizɔs in disaypul dɛn we na uman dɛn de na rod fɔ go na di grev. Dɛn bin de tɔk to dɛnsɛf se: ‘Udat go pul da ebi ston kɔmɔt fɔ wi?’ (Mak 16:​3) Bɔt we dɛn go na di grev, di ston nɔ bin de de igen. Di grev bin ɛmti! Jizɔs in bɔdi nɔ de de igen! Kwik kwik wan, Meri Magdalin rɔn go fɛn Jizɔs in disaypul dɛn.

Di ɔda uman dɛn tinap nia di grev. Ɛn dɛn de wɔnda: ‘Usay Jizɔs in bɔdi de?’ Wantɛm wantɛm, tu man dɛn we wɛr wan brayt klos kam. Na enjɛl dɛn! Dɛn tɛl di uman dɛn se: ‘Wetin mek una de luk fɔ Jizɔs na ya? I dɔn gɛt layf bak. Una rɔn go tɛl in disaypul dɛn.’ Jɔs imajin aw dɛn uman dɛn de go de rɔn! We dɛn de go, dɛn mit wan man. Yu no udat i bi?—

Na Jizɔs, we dɔn tek mɔtalman bɔdi! Insɛf tɛl di uman dɛn se: ‘Una go tɛl mi disaypul dɛn.’ Di uman dɛn bin rili gladi. Dɛn go fɛn di disaypul dɛn ɛn tɛl dɛn se: ‘Jizɔs dɔn gɛt layf bak! Wi si am!’ Meri bin dɔn tɛl Pita ɛn Jɔn bɔt di ɛmti grev. Naw dɛn de luk insay de, as yu de si na di pikchɔ. Dɛn de luk di klos we dɛn bin tek rap Jizɔs, bɔt dɛn nɔ no wetin fɔ tink. Dɛn bin want fɔ biliv se Jizɔs dɔn gɛt layf bak, bɔt i bin at fɔ biliv.

Leta da sem Sɔnde ivintɛm de, Jizɔs apia to tu pan in disaypul dɛn we de waka na di rod fɔ go na wan vilej we dɛn kɔl Ɛmeɔs. Jizɔs de waka ɛn tɔk to dɛn, bɔt dɛn nɔ bin no se na Jizɔs bikɔs nɔto di sem bɔdi i bin gɛt. Pas we Jizɔs it ɛn pre wit dɛn bifo dɛn no se na in. Di disaypul dɛn bin so gladi dat dɛn rɔn go bak na Jerusɛlɛm, pan ɔl we di ples bin fa! Sɔntɛm na jɔs afta dis, Jizɔs apia to Pita ɛn tɛl am se I dɔn gɛt layf bak.

Leta da Sɔnde ivintɛm de, Jizɔs in disaypul dɛn bin de insay wan rum. Di domɔt bin lɔk. Wantɛm wantɛm, Jizɔs jɔs apia midul dɛn! Naw dɛn dɔn no se di Gret Ticha dɔn rili gɛt layf bak. Jɔs imajin aw dɛn bin gladi!—Matyu 28:​1-15, NW; Lyuk 24:​1-49, NW; Jɔn 19:​38–20:​21, NW.

Fɔ lɛk 40 dez, Jizɔs bin de yuz difrɛn mɔtalman bɔdi dɛn fɔ sho in disaypul dɛn se i dɔn gɛt layf bak. Dɔn i bin go bak to in Papa na ɛvin. (Di Apɔsul Dɛn Wok [Akt] 1:​9-11) I nɔ tu te, di disaypul dɛn bigin tɛl ɔlman se Gɔd dɔn gi Jizɔs layf bak. Pan ɔl we di prist dɛn de bit dɛn ɛn kil sɔm pan dɛn, dɛn bin stil de prich. Dɛn no se if dɛn day, Gɔd go mɛmba dɛn jɔs lɛk aw i mɛmba in Pikin.

Jizɔs in disaypul dɛn rili difrɛn frɔm pipul dɛn we de na di wɔl tide! Na sɔm say dɛn na di wɔl, pipul dɛn jɔs de tink bɔt Ista rabit ɛn Ista eg we di tɛm kin rich we Jizɔs bin gɛt layf bak. Bɔt di Baybul nɔ se ɛnitin bɔt Ista rabit ɛn eg. I tɔk se wi fɔ wɔship Gɔd.

Wi kin bi lɛk Jizɔs in disaypul dɛn we wi tɔk bɔt di fayn tin we Gɔd du we i mek in Pikin gɛt layf bak. Mek wi nɔ ɛva fred, ivin if pipul dɛn se dɛn go kil wi. Ilɛksɛf wi day, Jiova go mɛmba wi ɛn gi wi layf bak, jɔs lɛk aw i bin gi Jizɔs layf bak.

Yu nɔ tink se wi fɔ gladi fɔ no se Gɔd go mɛmba di wan dɛn we de wɔship am ɛn ivin gi dɛn layf bak?— We wi no dɛn tin ya, dat fɔ mek wi want fɔ no aw wi go mek Gɔd gladi. Yu no se wi go rili ebul fɔ mek Gɔd gladi?— Lɛ wi tɔk bɔt dis na di nɛks chapta.