“Dis Na Mi Pikin”

WE PIKIN dɛn de du gud tin, dɛn mama ɛn papa kin gladi fɔ dɛn. We gyal pikin ɔ bɔy pikin du sɔntin we gud, in papa de gladi fɔ tɛl ɔda pipul dɛn se: “Dis na mi pikin.”

Jizɔs kin du wetin in Papa want ɔltɛm. So in Papa gladi fɔ am. Yu mɛmba wetin Jizɔs in Papa bin du wan de we Jizɔs bin de wit tri pan in disaypul dɛn?— Yɛs, Gɔd bin tɔk frɔm ɛvin se: “Dis na mi Pikin we a lɛk bad, a gladi fɔ am.”—Matyu 17:​5.

Jizɔs kin gladi ɔltɛm fɔ du wetin in Papa want. Yu no wetin mek? Na bikɔs i rili lɛk in Papa. If pɔsin de du sɔntin jɔs bikɔs na in fɔ du am, i kin at fɔ du. Bɔt if i de du sɔntin bikɔs i rili want fɔ du am, i kin izi fɔ du.

Ivin bifo Jizɔs kam na dis wɔl, i bin rɛdi ɔltɛm fɔ du wetin in Papa de tɛl am. Dis na bikɔs i lɛk in Papa, Jiova Gɔd. We Jizɔs bin de na ɛvin wit in Papa, i bin gɛt ay pozishɔn. Bɔt Gɔd bin gɛt spɛshal wok fɔ Jizɔs. Fɔ mek Jizɔs go du da wok de, i fɔ kɔmɔt na ɛvin ɛn dɛn fɔ bɔn am lɛk pikin na dis wɔl. Jizɔs bin rɛdi fɔ du am bikɔs na dat Jiova want am fɔ du.

Fɔ mek dɛn bɔn Jizɔs lɛk pikin na dis wɔl, i nid fɔ gɛt mama. Yu no udat na in mama?— In nem na Meri. Jiova bin sɛn in enjɛl we nem Gebrɛl, frɔm ɛvin fɔ kam tɔk to Meri. Enjɛl Gebrɛl bin tɛl Meri se i go bɔn bɔy pikin. Ɛn dɛn fɔ kɔl di pikin Jizɔs. Udat go bi di pikin in Papa?— Di enjɛl bin se di pikin in Papa go bi Jiova Gɔd. Na dat mek dɛn kɔl Jizɔs Gɔd in Pikin.

Aw yu tink se Meri bin fil bɔt dis?— Yu tink se i bin tɔk se, “A nɔ want fɔ bi Jizɔs in mama”? Nɔ, Meri bin rɛdi fɔ du wetin Gɔd want. Bɔt aw dɛn go bɔn Gɔd in Pikin we de na ɛvin na dis wɔl? Aw di bɔn we dɛn bin bɔn Jizɔs difrɛn frɔm di we aw dɛn bɔn ɔda pikin dɛn? Yu no?—

Wɛl, Gɔd bin mek wi fɔs mama ɛn papa, Adam ɛn Iv, so dat dɛn go kam togɛda wan spɛshal we. Afta dat, pikin kin bigin fɔ gro insay in mama in bɛlɛ. Pipul dɛn se dis na mirekul! A shɔ se yu go gri wit dat.

Gɔd du sɔntin we wɔndaful pas dis mirekul. I tek in Pikin in layf na ɛvin ɛn put am insay Meri in bɛlɛ. Gɔd nɔ bin dɔn ɛva du dis, ɛn i nɔ go ɛva du am igen. Dis mirekul bin mek Jizɔs bigin fɔ gro insay Meri in bɛlɛ jɔs lɛk we ɔda pikin dɛn kin gro insay dɛn mama in bɛlɛ. Afta dat, Josɛf bin mared Meri.

We di tɛm rich fɔ mek dɛn bɔn Jizɔs, Meri ɛn Josɛf bin go waka na wan tɔŋ we nem Bɛtliɛm. Bɔt bɔku pipul dɛn bin de de. Rum nɔ bin de fɔ mek Meri ɛn Josɛf slip, so dɛn bin gɛt fɔ go na di ples usay dɛn de mɛn animal dɛn. Na de Meri bɔn Jizɔs ɛn put am usay dɛn kin put it fɔ kaw ɛn ɔda animal dɛn, jɔs lɛk aw yu de si na di pikchɔ.

Wɔndaful tin dɛn bin apin di nɛt we Jizɔs bɔn. Nia Bɛtliɛm, wan enjɛl apia to sɔm shɛpad dɛn. I tɛl dɛn se Jizɔs na impɔtant pɔsin. Di enjɛl bin se: ‘A briŋ gud nyus fɔ una, we go mek pipul dɛn gladi bad. Tide dɛn dɔn bɔn wan Pikin we go sev pipul dɛn.’—Lyuk 2:​10, 11.

Di enjɛl bin tɛl di shɛpad dɛn se dɛn go si Jizɔs na Bɛtliɛm, na di say usay dɛn kin put it fɔ kaw ɛn ɔda animal dɛn. Wantɛm wantɛm, ɔda enjɛl dɛn jɔyn di fɔs enjɛl fɔ prez Gɔd. Di enjɛl dɛn bin de siŋ se: ‘Lɛ ɔlman prez ɛn ɔnɔ Gɔd. Mek ɔl mɔtalman we gɛt Gɔd in blɛsin gɛt kol at!’—Lyuk 2:​12-14.

We di enjɛl dɛn go, di shɛpad dɛn go na Bɛtliɛm ɛn si Jizɔs. Na de dɛn tɛl Josɛf ɛn Meri ɔl di gud tin dɛn we dɛn dɔn yɛri. Jɔs imajin aw Meri bin gladi bikɔs i bin gri fɔ bi Jizɔs in mama!

Leta, Josɛf ɛn Meri kɛr Jizɔs go na wan tɔŋ we dɛn kɔl Nazarɛt. Na de Jizɔs gro ɔp. We Jizɔs big, i bigin fɔ tich pipul dɛn bɔt Gɔd. Dis na wan pan di wok dɛn we Jiova Gɔd bin want in Pikin fɔ du na dis wɔl. Jizɔs bin rɛdi fɔ du am bikɔs i rili lɛk in Papa we de na ɛvin.

Bifo Jizɔs bigin fɔ prich, Jɔn we bin de baptayz pipul dɛn, bin baptayz am na di Jɔdan Riva. Na de wɔndaful tin apin! We Jizɔs de kɔmɔt insay di wata, Jiova tɔk frɔm ɛvin se: “Dis na mi Pikin we a lɛk, a gladi fɔ am.” (Matyu 3:​17) Yu kin gladi we yu mama ɛn papa se dɛn lɛk yu, nɔto so?— Wi shɔ se na so Jizɔs sɛf bin gladi.

Jizɔs bin de du wetin rayt ɔltɛm. I nɔ bin de mek lɛk se in na pɔsin we i nɔ rili bi. I nɔ bin de tɛl pipul dɛn se in na Gɔd. Enjɛl Gebrɛl bin tɛl Meri se dɛn go kɔl Jizɔs Gɔd in Pikin. Jizɔs insɛf bin tɔk se in na Gɔd in Pikin. Ɛn i nɔ bin de tɛl pipul dɛn se i sabi pas in Papa. I bin se: “Mi Papa pas mi.”—Jɔn 14:​28.

Ivin we Jizɔs bin de na ɛvin, i bin de du di wok we in Papa bin de tɛl am fɔ du. I nɔ bin de tɛl in Papa se i go du sɔntin ɛn lɛf am go du ɔda tin. I bin rili lɛk in Papa. So i bin de lisin to wetin in Papa bin de tɛl am. So we Jizɔs kam na dis wɔl, i bin de du wetin in Papa sɛn am fɔ du. I nɔ bin de yuz in tɛm fɔ du ɔda tin. No wɔnda we mek Jiova bin gladi fɔ in Pikin!

Wi want fɔ mek Jiova gladi, nɔto so?— So wi fɔ sho se wi de rili lisin to Gɔd, lɛk Jizɔs. Gɔd de yuz di Baybul fɔ tɔk to wi. I nɔ fayn fɔ mek lɛk se yu de lisin to Gɔd bɔt yu biliv ɛn de du tin dɛn we di Baybul se i bad, nɔto so?— Mɛmba se wi go gladi fɔ du wetin Jiova want if wi rili lɛk am.