Di Ples we Dɛn Bɔn Jizɔs

YU NO us yɔŋ bebi dis? Na Jizɔs. Dɛn jɔs dɔn bɔn am. Dɛn bɔn am na wan ples we dɛn de kip animal dɛn. Meri de kam le Jizɔs pan wan tin we dɛn kin put gras fɔ kaw ɛn ɔda animal dɛn fɔ it. Bɔt wetin mek Meri ɛn Josɛf de naya wit di animal dɛn? Yu fil se dis na ples fɔ bɔn pikin?

Nɔ, nɔto ples dis fɔ bɔn pikin. Bɔt wetin mek dɛn de naya? Di kiŋ na Rom we nem Ɔgɔstɔs, se ɔlman fɔ go na di tɔŋ we dɛn bɔn, fɔ go rayt dɛn nem na wan buk. Na Bɛtliɛm Josɛf bɔn. Bɔt we in ɛn Meri rich de, dɛn nɔ bin gɛt ples fɔ de. So dɛn kam de na dis ples usay dɛn de kip animal dɛn. Ɛn na da sem de de, Meri bɔn Jizɔs. Bɔt jɔs lɛk aw yu de si na di pikchɔ, natin nɔ du Jizɔs.

Yu de si dɛn man ya we de kam to Jizɔs? Na shɛpad dɛn. We dɛn bin de na do de wach dɛn ship dɛn na nɛt, na de wan brayt layt shayn pan dɛn. Na bin wan enjɛl. Di shɛpad dɛn fred bad bad wan. Bɔt di enjɛl tɛl dɛn se: ‘Una nɔ fred! A gɛt gud nyus fɔ una. Tide dɛn dɔn bɔn di Mɛsaya na Bɛtliɛm. I go sev pipul dɛn. Una go mit dɛn rap rap am ɛn dɛn le am pan wan tin we dɛn kin put gras fɔ kaw ɛn ɔda animal dɛn fɔ it.’ Dɔn plɛnti plɛnti enjɛl dɛn kam ɛn bigin prez Gɔd. So di shɛpad dɛn rɔn go wantɛm fɔ go luk fɔ Jizɔs. Ɛn we dɛn go, dɛn si am.

Yu no wetin mek Jizɔs spɛshal? Yu no uskayn pɔsin i bi? Mɛmba se, insay di fɔs stori na dis buk, wi bin tɔk bɔt Gɔd in fɔs Pikin. Dis Pikin bin de wok wit Jiova fɔ mek di ɛvin, di wɔl ɛn ɔl di ɔda tin dɛn. Dis pikin ya na Jizɔs.

Jiova tek di layf we in Pikin bin gɛt na ɛvin, ɛn put am na Meri in bɛlɛ. Di pikin bigin gro na Meri in bɛlɛ kwik kwik wan lɛk aw ɔda pikin dɛn kin gro na dɛn mama dɛn bɛlɛ. Bɔt dis pikin ya na Gɔd in Pikin. Leta, dɛn bɔn Jizɔs na Bɛtliɛm, na wan ples we dɛn kin kip animal dɛn. Yu dɔn si naw wetin mek di enjɛl dɛn bin gladi fɔ tɛl pipul dɛn se dɛn dɔn bɔn Jizɔs?