Enjɛl dɛn Bin Anawns we Dɛn Bɔn Jizɔs

Di kiŋ na Rom, we nem Siza Ɔgɔstɔs, bin tɛl ɔl di Ju dɛn fɔ go na di tɔŋ we dɛn bɔn fɔ mek dɛn go rɛjista dɛn. So Josɛf ɛn Meri travul go na Bɛtliɛm usay Josɛf in famili dɛn kɔmɔt. I bin dɔn rich tɛm fɔ mek Meri bɔn in pikin.

We dɛn rich na Bɛtliɛm, di wangren ples we dɛn bin ebul fɔ gɛt na wan ples usay dɛn kin kip animal dɛn. Na de Meri bɔn in bɔypikin we nem Jizɔs. I rap am wit klos dɛn ɛn put am na wan bɔks usay dɛn kin put it fɔ di animal dɛn.

Sɔm shɛpad dɛn we de nia Bɛtliɛm bin de na do na nɛt de kia fɔ dɛn ship dɛn. Wantɛm wantɛm, wan enjɛl apia bifo dɛn ɛn Jiova in glori we tan lɛk layt bin sɔrawnd dɛn. Di shɛpad dɛn fred, bɔt di enjɛl tɛl dɛn se: ‘Una nɔ fred. A gɛt nyuz we go mek una gladi. Dɛn dɔn bɔn di Mɛsaya tide na Bɛtliɛm.’ Da sem tɛm de, bɔku bɔku enjɛl dɛn apia na di skay ɛn tɔk se: ‘Mek Gɔd na ɛvin gɛt di glori ɛn mek pis de na di wɔl.’ Dɔn di enjɛl dɛn lɔs. Wetin di shɛpad dɛn du?

Di shɛpad dɛn tɔk to dɛnsɛf se: ‘Lɛ wi go na Bɛtliɛm wantɛm wantɛm.’ Dɛn go kwik kwik wan, ɛn dɛn si Josɛf ɛn Meri wit dɛn yɔŋbebi na di say we dɛn kin kip animal dɛn.

Ɔlman we yɛri wetin di enjɛl dɛn tɛl di shɛpad dɛn bin kɔle. Meri tink gud wan bɔt di wɔd dɛn we di enjɛl tɛl am, ɛn i nɔ ɛva fɔgɛt dɛn. Di shɛpad dɛn go bak to dɛn ship dɛn, ɛn dɛn tɛl Jiova tɛnki fɔ ɔl wetin dɛn si ɛn yɛri.