Yu Kin Want Fɔ De Bifo Ɔltɛm?

YU SABI ɛnibɔdi we want fɔ de bifo ɔltɛm?— Pɔsin we want fɔ de bifo ɔltɛm kin push ɔda pipul dɛn na layn so dat i go de bifo. Yu dɔn ɛva si dat apin?— Di Gret Ticha bin ivin si big pipul dɛn we de tray fɔ put dɛnsɛf bifo, ɔ we de tray fɔ sidɔm usay impɔtant pipul dɛn kin sidɔm. Ɛn i nɔ bin lɛk dat. Lɛ wi si wetin apin.

Di Baybul tɛl wi se dɛn bin invayt Jizɔs pan wan pati na wan Faresi in os. Dis Faresi na bin impɔtant edman pan Gɔd biznɛs. We Jizɔs de de, i bigin fɔ wach di pipul dɛn we de kam ɛn we de tray fɔ fɛn di bɛst ples fɔ sidɔm. So i pul wan stori to di pipul dɛn we dɛn invayt. Yu go lɛk fɔ yɛri am?—

Jizɔs se: ‘We dɛn invayt yu pan mared, yu nɔ fɔ sidɔm na di chia we de bifo, we dɛn bigman dɛn fɔ sidɔm pan.’ Yu no wetin mek Jizɔs bin tɔk dat?— I tɔk se sɔntɛm di pɔsin we mek di pati dɔn invayt sɔmbɔdi we impɔtant pas wi. As yu de si na di pikchɔ, di pɔsin we invayt di pipul dɛn kam ɛn tɔk se: ‘Grap mek dis man ya sidɔm ɛn yu go sidɔm oba yanda!’ Aw yu tink se da pɔsin de go fil?— I go shem bikɔs ɔl di ɔda pipul dɛn go de wach am we i de go sidɔm na di say we nɔ impɔtant.

Jizɔs bin de tray fɔ sho se i nɔ fayn fɔ mek wi want fɔ gɛt di bɛst ples. So i tɔk se: ‘We dɛn invayt yu pan mared, go sidɔm na di chia we de biɛn, so we di pɔsin we invayt yu kam si usay yu sidɔm, na in go se, “Mi padi, grap kam sidɔm bifo ya!” Da tɛm de ɔl di pipul dɛn we de na di mared go si se yu gɛt ɔnɔ.’—Lyuk 14:​1, 7-11.

Yu ɔndastand wetin dis stori de tɔk bɔt?— Lɛ wi tɔk bɔt wan ɛgzampul fɔ si if yu ɔndastand. Imajin se yu de go tek transpɔt usay pipul dɛn bɔku. Yu tink se yu fɔ go sidɔm kwik kwik wan ɛn mek pɔsin we big pas yu tinap?— Yu tink se Jizɔs go gladi if yu du dat?—

Sɔmbɔdi go se Jizɔs nɔ want fɔ no wetin wi de du. Bɔt yu biliv dat?— We Jizɔs bin de na da pati na di Faresi in os, i bin de wach di pipul dɛn we bin de fɛn usay fɔ sidɔm. Yu nɔ tink se Jizɔs de wach wisɛf tide?— Naw we Jizɔs de na ɛvin, dat dɔn mek i ebul fɔ si wi fayn fayn wan.

We pɔsin tray fɔ put insɛf bifo, i kin mek prɔblɛm de. Plɛnti tɛm, una go de agyu, ɛn pipul dɛn go vɛks. Sɔntɛm dis kin apin we pikin dɛn kin go tek transpɔt. As di motoka in domɔt opin so, di pikin dɛn kin rɔn fɔ de bifo. Dɛn want di bɛst sidɔm ples, di wan we de nia di winda. Wetin yu tink se go apin?— Yɛs, dɛn go mɔs de vɛks pan dɛn kɔmpin.

We pɔsin want fɔ de bifo, i kin briŋ bɔku prɔblɛm dɛn. Dat bin ivin mek prɔblɛm de bitwin Jizɔs in apɔsul dɛn. As wi bin lan na Chapta 6 na dis buk, dɛn bin agyu bɔt udat impɔtant pas dɛn ɔl. Wetin Jizɔs bin du?— Yɛs, i kɔrɛkt dɛn. Bɔt leta dɛn bin agyu bak. Lɛ wi si aw dis bigin.

Di apɔsul dɛn ɛn ɔda pipul dɛn bin de travul wit Jizɔs fɔ go na Jerusɛlɛm fɔ di las tɛm. Jizɔs bin dɔn de tɔk to dɛn bɔt in Kiŋdɔm, so Jems ɛn Jɔn bin want fɔ rul wit Jizɔs as kiŋ. Dɛn bin ivin tɔk bɔt dis to dɛn mama, we na Salomi. (Matyu 27:​56; Mak 15:​40) So we dɛn de na rod fɔ go na Jerusɛlɛm, Salomi kam mit Jizɔs, i butu bifo am, ɛn aks am fɔ du sɔntin fɔ am.

Jizɔs aks am se: “Wetin yu want?” Salomi se i go want mek Jizɔs mek in tu pikin dɛn sidɔm nia am na in Kiŋdɔm, lɛ wan de na in rayt an ɛn di ɔda wan de na in lɛft an. Wɛl, we di ɔda tɛn apɔsul dɛn kam fɔ no wetin Jems ɛn Jɔn dɛn mama aks Jizɔs fɔ du, aw yu tink se dɛn bin fil?—

Yɛs, dɛn bin rili vɛks pan Jems ɛn Jɔn. So Jizɔs gi ɔl in apɔsul dɛn fayn fayn advays. Jizɔs tɛl dɛn se di pipul dɛn we de rul dis wɔl lɛk fɔ mek dɛnsɛf big ɛn impɔtant. Dɛn want fɔ gɛt impɔtant pozishɔn dɛn we go mek ɔlman obe dɛn. Bɔt Jizɔs tɛl di wan dɛn we de fala am se dɛn nɔ fɔ biev so. Bifo dat, Jizɔs tɔk se: “Ɛni wan pan una we want de bifo, fɔ bi slev fɔ una ɔl.” Tink bɔt dat!—Matyu 20:​20-28.

Yu no wetin slev kin du?— I kin wok fɔ ɔda pipul dɛn, i nɔ de tink se ɔda pipul dɛn fɔ wok fɔ am. I kin put insɛf biɛn ɔltɛm, i nɔ kin put insɛf bifo. I de biev lɛk pɔsin we nɔ impɔtant. Mɛmba se Jizɔs bin se di wan we want fɔ de fɔs fɔ biev lɛk slev to in kɔmpin dɛn.

Wetin yu tink se dat min fɔ wi?— Yu tink se slev go de agyu in masta bɔt udat go gɛt di bɛst sidɔm ples? Ɔ yu tink se i go agyu bɔt udat fɔs fɔ it?— Jizɔs bin tɔk se slev kin put in masta fɔs ɔltɛm.—Lyuk 17:​7-10.

So bifo wi tray fɔ put wisɛf bifo, wetin wi fɔ du?— Yɛs, wi fɔ biev lɛk slev to ɔda pipul dɛn. Ɛn dat min se wi fɔ put ɔda pipul dɛn biznɛs fɔs. I min bak se wi fɔ tek ɔda pipul dɛn impɔtant pas wi. Yu tink bɔt ɛni we, we yu go put ɔda pipul dɛn biznɛs fɔs?— Lɛ wi go bak to pej 40 ɛn 41 ɛn tray fɔ no sɔm we dɛn we yu kin put ɔda pipul dɛn fɔs ɛn wok fɔ dɛn.

Yu go mɛmba se di Gret Ticha bin put ɔda pipul dɛn fɔs bay we i bin wok fɔ dɛn. Di las nɛt we i bin spɛn wit in apɔsul dɛn, i bin ivin butu ɛn was dɛn fut. If wisɛf put ɔda pipul dɛn fɔs bay we wi de wok fɔ dɛn, wi go mek di Gret Ticha ɛn in Papa, Jiova Gɔd, gladi.