Di Gret Ticha Bin De Ɛp Ɔda Pipul Dɛn

YU KIN lɛk we pɔsin de du fayn tin fɔ yu, nɔto so?— Wɛl, ɔda pipul dɛnsɛf lɛk we pɔsin de du fayn tin fɔ dɛn. Wi ɔl lɛk we pɔsin kin du fayn tin fɔ wi. Di Gret Ticha sɛf bin no dat, ɛn i bin de du fayn tin fɔ ɔda pipul dɛn. I bin se: ‘A nɔ kam fɔ mek mɔtalman bi mi savant, bɔt a kam fɔ bi dɛn savant.’—Matyu 20:​28.

So if wi want fɔ bi lɛk di Gret Ticha, wetin wi fɔ du?— Wi fɔ ɛp ɔda pipul dɛn. Wi fɔ du gud tin fɔ dɛn. Bɔku pipul dɛn nɔ de du dis. Infakt, bɔku pipul dɛn kin want mek ɔda pipul dɛn ɛp dɛn ɔltɛm. Wan tɛm ivin Jizɔs in disaypul dɛn fil da we de. Dɛn ɔl want fɔ bi di pɔsin we impɔtant pas dɛn ɔl.

Wan de Jizɔs bin de travul wit in disaypul dɛn. We dɛn go na wan tɔŋ we dɛn kɔl Kepanyɔm, nia di si we de na Galili, dɛn go insay wan os. Na de Jizɔs aks dɛn se: “Wetin una bin de tɔk we wi de kam na rod?” Dɛn ɔl bin sɛt dɛn mɔt bikɔs we dɛn bin de kam na rod, dɛn bin de agyu bɔt udat impɔtant pas in kɔmpin.—Mak 9:​33, 34.

Jizɔs bin no se i nɔ fayn fɔ mek in disaypul dɛn de tink bɔt udat impɔtant pas in kɔmpin. So as wi bin lan na di fɔs chapta na dis buk, i kɔl wan smɔl pikin ɛn put am midul dɛn ɔl, ɛn i se dɛn fɔ put dɛnsɛf dɔŋ lɛk da smɔl pikin de. Bɔt stil, dɛn nɔ bin lisin. So bifo Jizɔs de day, i tich dɛn wan lɛsin we dɛn nɔ go ɛva fɔgɛt. Wetin i bin du?—

Wɛl, we dɛn ɔl bin de it togɛda, Jizɔs grap ɛn tek tawɛl ɛn tay am rawnd in wes. Dɔn i put wata insay bol. In disaypul dɛn go de wɔnda wetin i bin want fɔ du. As dɛn bin de wach, Jizɔs go rawnd to dɛn ɔl, i butu ɛn was dɛn fut dɛn. Dɔn i wep dɛn fut dɛn wit di tawɛl. Jɔs tink bɔt dat! If yu bin de de, aw yu bin fɔ fil?—

In disaypul dɛn bin fil se i nɔ rayt fɔ mek di Gret Ticha du dis to dɛn. Dɛn bin shem. Infakt, Pita nɔ bin want mek Jizɔs was in fut. Bɔt Jizɔs bin se i impɔtant fɔ mek i du dat.

Wi nɔ de was ɔda pɔsin in fut tide. Bɔt pipul dɛn bin de du dis di tɛm we Jizɔs bin de na dis wɔl. Yu no wetin mek?— Wɛl, na di say we Jizɔs ɛn in disaypul dɛn bin de, na sandal pipul dɛn bin de wɛr. So we dɛn bin de waka na dɔti rod, dɔst kin kɔba dɛn fut. Na bin gud tin fɔ was di dɔst we de na pɔsin in fut we i kam waka to yu.

Bɔt Jizɔs in disaypul dɛn ɔl nɔ bin want fɔ was dɛn kɔmpin dɛn fut. So Jizɔs insɛf sɛf du am. We Jizɔs du dis, i bin de tich in disaypul dɛn wan impɔtant lɛsin. Dɛn bin nid fɔ lan dis lɛsin. Ɛn na lɛsin we wisɛf nid fɔ lan tide.

Yu no wetin na di lɛsin?— Afta Jizɔs dɔn kam sidɔm bak na di tebul, i ɛksplen to dɛn se: ‘Una ɔndastand wetin a jɔs du so? Una de kɔl mi Ticha ɛn Masta, ɛn na di rayt tin una de tɔk, bikɔs mi na Ticha ɛn Masta. If mi, we na una Masta ɛn Ticha, dɔn was una fut, unasɛf fɔ was una kɔmpin dɛn fut.’—Jɔn 13:​2-14.

Na dis skripchɔ, di Gret Ticha bin de sho in disaypul dɛn se i want fɔ mek dɛn go de ɛp dɛnsɛf. I nɔ want fɔ mek dɛn tink bɔt dɛnsɛf nɔmɔ. I nɔ want fɔ mek dɛn tink se dɛn impɔtant pas ɔda pipul dɛn ɛn na dɛn nɔmɔ dɛn fɔ de ɛp. I bin want dɛnsɛf fɔ ɛp ɔda pipul dɛn.

Yu nɔ tink se dat na fayn lɛsin?— Yu want fɔ tan lɛk di Gret Ticha fɔ de ɛp ɔda pipul dɛn?— Wi ɔl kin ebul ɛp ɔda pipul dɛn. Dis go mek dɛn gladi. Bɔt i go mek Jizɔs ɛn in Papa gladi mɔ.

I nɔ at fɔ ɛp ɔda pipul dɛn. If yu wach, yu go si bɔku tin dɛn we yu go du fɔ ɛp ɔda pipul dɛn. Tink bɔt dis: Yu tink se sɔntin de we yu go du fɔ ɛp yu mama? Yu no se i de du bɔku bɔku tin fɔ yu ɛn di famili. Yu go ɛp am?— Yu nɔ tink se yu fɔ aks am?

Sɔntɛm yu go ebul ɛp yu mama we i de kuk. Ɔ sɔntɛm yu go was di dɔti pan dɛn afta ɔlman dɔn it. Sɔm pikin dɛn kin swip ɛn wep di grɔn ɛvride. Ɛnitin we yu ebul fɔ du fɔ pɔsin, yu dɔn ɛp am, jɔs lɛk Jizɔs.

Yu gɛt smɔl brɔda ɔ smɔl sista we yu go ɛp? Mɛmba se Jizɔs, we na di Gret Ticha, bin de ɛp in disaypul dɛn. We yu de ɛp yu smɔl brɔda ɔ smɔl sista, yu de falamakata Jizɔs. Wetin yu go ebul du fɔ dɛn?— Sɔntɛm yu go ɛp dɛn fɔ lan fɔ pak dɛn ple tin dɛn we dɛn dɔn fɔ ple. Ɔ sɔntɛm yu go ɛp dɛn fɔ drɛs. Ɔ sɔntɛm yu go lan dɛn fɔ prɛd dɛn bed. Yu tink bɔt ɛni ɔda tin we yu go ebul du fɔ dɛn?— Dɛn go lɛk yu mɔ fɔ we yu de ɛp dɛn, jɔs lɛk aw Jizɔs in disaypul dɛn bin lɛk am.

Na skul sɛf, yu kin ɛp ɔda pipul dɛn. Sɔntɛm yu kin ɛp yu klasmet ɔ yu ticha. If pɔsin in buk dɛn fɔdɔm, i go fayn fɔ mek yu ɛp am fɔ tek dɛn. Yu kin ɛp fɔ klin di blakbɔd ɔ ɛp fɔ du ɔda tin dɛn fɔ yu ticha. Na gud tin bak if yu lɛnt pɔsin yu pɛn ɔ pɛnsil.

Sɔm tɛm dɛn de wi kin notis se sɔm pipul dɛn nɔ de tɛl tɛnki we yu ɛp dɛn. Yu tink se dis fɔ stɔp yu fɔ mek yu nɔ du gud?— Nɔ! Bɔku pipul dɛn nɔ bin de tɛl Jizɔs tɛnki we i bin de du gud tin fɔ dɛn. Bɔt dat nɔ mek i stɔp fɔ du gud.

So mek wi nɔ ɛva lɛf fɔ ɛp ɔda pipul dɛn. Mek wi mɛmba di Gret Ticha, Jizɔs, ɛn tray fɔ fala in ɛgzampul ɔltɛm.