Aw di Laybri we De na di Kiŋdɔm Ɔl Go Bɛnifit Wi?

Yu go lɛk fɔ no mɔ bɔt di Baybul? Yu gɛt ɛni skripchɔ, pɔsin, ples, ɔ ɛnitin we yu want no bɔt? Ɔ sɔntɛm, yu kin de wɔnda if Gɔd in Wɔd go ɛp yu fɔ sɔlv yu prɔblɛm dɛn. If yu want no bɔt ɔl dɛn tin ya, na fɔ kam na di Kiŋdɔm Ɔl laybri.

I gɛt plɛnti tin dɛn we de ɛp wi fɔ stɔdi di Baybul. Sɔntɛm yu nɔ gɛt ɔl di buk dɛn we Jiova Witnɛs dɛn dɔn mek. Bɔt di laybri we de na di Kiŋdɔm Ɔl gɛt plɛnti pan di buk dɛn we dɛn jɔs mek. Di laybri gɛt difrɛn difrɛn Baybul dɛn, dikshɔnari, ɛn ɔda tin dɛn we go ɛp yu fɔ stɔdi di Baybul. Yu kin yuz di laybri bifo di mitin ɛn afta di mitin. If di laybri gɛt kɔmpyuta, dɛn go mɔs dɔn put de Wachtawa Laybri. Dis na kɔmpyuta program we gɛt plɛnti pan di buk dɛn we di ɔganayzeshɔn dɔn mek. I go mek am izi fɔ yu fɔ fɛn tɔpik, wɔd, ɔ skripchɔ dɛn we yu de luk fɔ.

I de ɛp di studɛnt dɛn we de na Wi Kristian Layf ɛn Prichin Wok Mitin. Yu kin yuz di Kiŋdɔm Ɔl laybri fɔ fɛn di tin dɛn we yu go want fɔ yuz na yu tɔk. Na di Kristian Layf ɛn Prichin Wok Mitin ovasia de kia fɔ di laybri. In wok na fɔ mek shɔ se ɔl di nyu buk dɛn de na di laybri, ɛn di buk dɛn ɔl pak fayn. In ɔ di pɔsin we de stɔdi yu di Baybul go sho yu aw fɔ yuz di laybri. Nɔbɔdi nɔ fɔ pul ɛni buk kɔmɔt na di laybri. Wi fɔ ol di buk dɛn fayn ɛn nɔbɔdi nɔ fɔ rayt pan dɛn.

Di Baybul ɛksplen aw wi go “no bɔt Gɔd.” Wi fɔ rɛdi fɔ luk fɔ di tin dɛn we de na di Baybul lɛk aw nɔmɔ dɛn kin dig fɔ fɛn “ɛni tin we gɛt valyu.” (Prɔvabs 2:1-5) Di Kiŋdɔm Ɔl laybri go ɛp yu fɔ no mɔ bɔt Gɔd.

• Wetin-ɛn-wetin de na di Kiŋdɔm Ɔl laybri we go ɛp yu fɔ stɔdi di Baybul?

• Udat go sho yu aw fɔ yuz di laybri?