Udat Na Gɔd?

1. Wetin mek wi fɔ wɔship Gɔd?

Na Gɔd mek ɔltin. I nɔ gɛt biginin ɛn i nɔ gɛt ɛndin. (Sam 90:2) Na frɔm am di gud nyuz we de na di Baybul, kɔmɔt. (Fɔs Lɛta To Timoti 1:11) Na Gɔd nɔmɔ wi fɔ wɔship bikɔs na in gi wi layf.​—Rid Rɛvɛleshɔn 4:11.

2. Aw Gɔd tan lɛk?

Nɔbɔdi nɔ wande si Gɔd bikɔs in na Spirit. Dis min se di layf we Gɔd gɛt difrɛn frɔm di wan we mɔtalman gɛt. (Jɔn 1:18; 4:24) Bɔt wi go ebul no di kwaliti dɛn we Gɔd gɛt we wi wach di tin dɛn we i mek. Fɔ ɛgzampul, di difrɛn difrɛn frut ɛn flawa dɛn de sho wi se Gɔd lɛk wi ɛn i gɛt sɛns. Di we aw di wɔl big de sho wi di kayn pawa we Gɔd gɛt.​—Rid Lɛta Fɔ Rom 1:20.

Wi go lan mɔ bɔt Gɔd in kwaliti dɛn we wi rid di Baybul. Fɔ ɛgzampul, di Baybul de tɛl wi wetin Gɔd lɛk ɛn wetin i nɔ lɛk. I de tɛl wi bak aw Gɔd de trit pipul dɛn ɛn wetin i de du we pipul dɛn du gud tin ɔ we dɛn du bad tin.​—Rid Sam 103:7-10.

3. Gɔd gɛt nem?

Jizɔs bin se: “Papa Gɔd we de na ɛvin: Na yu wangren na Gɔd, mek ɔlman pre to yu ɛn ɔna yu [nem].” (Matyu 6:9, New World Translation) Gɔd gɛt bɔku taytul dɛn, bɔt na wangren nem i gɛt. Ɔl langwej gɛt di we aw dɛn de kɔl Gɔd in nem. Insay Krio, dɛn kin kɔl am “Jiova.” Bɔt sɔm pipul dɛn kin kɔl am “Yawɛ.”​—Rid Sam 83:18, NW.

Pipul dɛn dɔn pul Gɔd in nem insay bɔku Baybul dɛn ɛn put Lɔd ɔ Gɔd de. Bɔt we dɛn bin rayt di Baybul, Gɔd in nem bin de insay de lɛk 7,000 tɛm so. Jizɔs bin tich pipul dɛn di tru bɔt Gɔd. Ɛn i bin tich dɛn bak bɔt Gɔd in nem.​—Rid Jɔn 17:26.

Wach di fim we gɛt di taytul: Yu Tink se Gɔd Gɛt Nem?

4. Jiova bisin bɔt wi?

Bɔku pipul dɛn de sɔfa tide. Bɔt dat min se Jiova nɔ bisin bɔt wi? Sɔm dɛn fil se Gɔd de mek wi de sɔfa fɔ tɛst wi. Bɔt dat nɔto tru.​—Rid Jems 1:13.

Gɔd dɔn alaw mɔtalman fɔ du wetin dɛn want. I du dis fɔ sho se wi impɔtant to am. Wi gladi we Gɔd nɔ de fos wi fɔ sav am. (Jɔshwa 24:15) Bɔt bɔku pipul dɛn de du bad tin dɛn to ɔda pipul dɛn. Dis de mek plɛnti pipul dɛn de sɔfa. Jiova kin fil am we dɛn kayn tin ya de apin.​—Rid Jɛnɛsis 6:5, 6.

Jiova na Gɔd we bisin bɔt wi. I want lɛ wi ɛnjɔy layf. I nɔ go te igen, Gɔd go pul ɔl di tin dɛn we de mek wi sɔfa ɛn di wan dɛn we de mek wi sɔfa. Bɔt Gɔd gɛt gud rizin we mek i de alaw wi fɔ sɔfa. Wi go lan bɔt da rizin de na Lɛsin 8.​—Rid Sam 37:10; Pita In Sɛkɛn Lɛta 2:9; 3:13.

5. Aw wi go ebul go nia Gɔd?

Jiova want lɛ wi go nia am bay we wi de pre to am. I lɛk wi ɔl. (Sam 65:2; 145:18) Gɔd rɛdi fɔ fɔgiv wi. I kin no we wi de tray fɔ du wetin i want, pan ɔl we sɔntɛnde wi nɔ kin du di tin dɛn we i want. Bɔt stil wi kin bi Gɔd in padi pan ɔl we wi nɔ pafɛkt.​—Rid Sam 103:12-14; Jems 4:8.

Na Jiova gi wi layf so wi fɔ lɛk am pas ɛnibɔdi. (Mak 12:30) Yu go sho se yu lɛk Gɔd we yu lan mɔ bɔt am ɛn du wetin i want. Dis go ɛp yu fɔ go nia am.​—Rid Fɔs Lɛta To Timoti 2:4; Jɔn In Fɔs Lɛta 5:3.