Una fɔ Fetful to Unasɛf

Jiova want wi fɔ “gɛt lɔv we nɔ de ɛva chenj.” (Mayka 6:8) Dis rili impɔtant insay mared bikɔs if una nɔ fetful, una nɔ go biliv unasɛf. Ɛn we una biliv unasɛf dat go mek una lɛk unasɛf mɔ ɛn mɔ.

Tide, i nɔ izi fɔ mek pipul dɛn we mared fetful to dɛn man ɔ to dɛn wɛf. Fɔ protɛkt yu mared-os, yu fɔ rɛdi fɔ du tu tin.

1 PUT YU MARED FƆS

DI BAYBUL SE: “No wetin rayt na Gɔd in yay.” (Lɛta Fɔ Filipay 1:10) Yu mared na wan pan di impɔtant tin dɛn na yu layf. Yu fɔ put am fɔs.

Jiova want mek yu pe atɛnshɔn to yu man ɔ yu wɛf ɛn una fɔ ‘ɛnjɔy layf’ togɛda. (Ɛkliziastis 9:9) I sho bak klia wan se yu fɔ gɛt tɛm fɔ yu man ɔ yu wɛf ɛn una fɔ fɛn we fɔ mek una gladi. (Fɔs Lɛta Fɔ Kɔrint 10:24) Mek yu man ɔ yu wɛf no se yu gladi fɔ wetin i de du.

DU DIS:

• Mek shɔ se una spɛn mɔ tɛm togɛda, ɛn gi yu man ɔ yu wɛf ɔl yu atɛnshɔn

• Tink bɔt ‘una’ nɔ tink bɔt ‘yusɛf’

2 TEK TƐM AW YU DE TINK

DI BAYBUL SE: “Ɛni man we luk uman, we nɔto in wɛf, sote i want am fɔ insɛf, da man de dɔn tɛk ɔda man wɛf nain at.” (Matyu 5:28) If pɔsin we mared kɔntinyu fɔ tink bɔt mami ɛn dadi biznɛs di we aw Gɔd nɔ want, i tan lɛk i nɔ fetful to in man ɔ in wɛf.

Jiova se yu fɔ “tek tɛm aw yu de tink.” (Prɔvabs 4:23; Jɛrimaya 17:9) Fɔ ebul du dis, yu fɔ tek tɛm wit wetin yu de wach. (Matyu 5:29, 30) I fayn fɔ fala Job in ɛgzampul. I bin disayd se i nɔ go yuz in yay fɔ luk uman di we aw Gɔd nɔ want. (Job 31:1) Nɔ ɛva luk tin dɛn we de sho nekɛd pɔsin, ɔ tin dɛn we de sho usay dɛn de du mami ɛn dadi biznɛs. Ɛn yu fɔ disayd nɔ fɔ bigin lɛk ɔda pɔsin apat frɔm yu man ɔ yu wɛf.

DU DIS:

• Mek ɔlman si se yu fetful to yu man ɔ yu wɛf

• Tink bɔt aw yu man ɔ yu wɛf de fil ɛn wantɛm wantɛm stɔp ɛni padi biznɛs we go mek yu man ɔ yu wɛf nɔ fil fayn