Wetin Go Mek Yu ɛn Yu Fambul dɛn Gɛt Pis

Na mared de stat nyu famili. Pan ɔl we yu go lɛk ɛn rɛspɛkt yu mama ɛn papa, na yu man ɔ yu wɛf fɔ bi di pɔsin we impɔtant to yu pas ɔlman na di wɔl. I nɔ kin izi fɔ mek sɔm pan yu fambul dɛn gri wit dis. Bɔt di Baybul in advays go ɛp yu fɔ no aw fɔ gɛt pis wit yu fambul dɛn as yu de tray fɔ mek yu yon famili.

1 SI YU FAMBUL DƐN DI RAYT WE

DI BAYBUL SE: “Yu fɔ rɛspɛkt yu papa ɛn yu mama.” (Lɛta Fɔ Ɛfisɔs 6:2) Ilɛk ɔmɔs ia yu ol, yu nid fɔ rɛspɛkt yu mama ɛn papa ɔltɛm. Mɛmba se, yu man ɔ yu wɛf sɛf nid fɔ pe atɛnshɔn to in mama ɛn papa. ‘Lɔv nɔ de jɛlɔs,’ so nɔ ɛva fil bad bɔt aw yu man ɔ yu wɛf de spɛn tɛm wit in mama ɛn papa.​—Fɔs Lɛta Fɔ Kɔrint 13:4; Lɛta Fɔ Galeshya 5:26.

DU DIS:

• Avɔyd fɔ tɔk wɔd dɛn lɛk, “Ɔltɛm yu famili de mek a fil bad bɔt misɛf” ɔ “Yu mama nɔ ɛva lɛk wetin a kin du”

• Tray fɔ ɔndastand di we aw yu man ɔ yu wɛf de si tin dɛn

2 NA UNA FƆ DISAYD WETIN FƆ DU

DI BAYBUL SE: “Man go lɛf in mama ɛn papa ɛn go de wit in wɛf, ɛn dɛn tu go bi wan.” (Jɛnɛsis 2:24) We yu mared, yu mama ɛn papa go stil tink se na dɛn wok fɔ kia fɔ yu, ɛn dɛn go want fɔ ɛp wit bɔku tin na yu mared-os pas aw i fɔ bi.

I lɛf to una fɔ disayd wetin una go alaw dɛn fɔ ɛp wit, bɔt i go fayn fɔ mek una tek tɛm tɛl dɛn. (Prɔvabs 15:1) We yu ɔmbul, du tin saful, ɛn peshɛnt, dat go ɛp yu fɔ gɛt pis wit yu fambul dɛn ɛn ‘fɔ de bia wit dɛn fɔ sho se yu lɛk dɛn.’​—Lɛta Fɔ Ɛfisɔs 4:2.

DU DIS:

• If yu de wɔri tumɔs bɔt di kayn we aw fambul dɛn de put an pan tin dɛn we de apin na yu mared-os, tɔk to yu man ɔ yu wɛf bɔt wetin yu tink we yu at kol

• Una ɔl tu fɔ gɛt wanwɔd we una de tɔk bɔt wetin fɔ du we dɛn kayn tin ya apin