Wan Prɔmis we Dɛn Mek to Jiova

Afta tu mɔnt we di Izrɛlayt dɛn bin kɔmɔt na Ijipt, dɛn rich na Mawnt Saynay ɛn kamp de. Jiova bin kɔl Mozis fɔ go ɔp wan mawntin ɛn tɛl am se: ‘A dɔn sev di Izrɛlayt dɛn. If dɛn obe mi ɛn fala mi lɔ dɛn, a go mek dɛn bi mi spɛshal pipul dɛn.’ Mozis go bak ɛn tɛl di Izrɛlayt dɛn wetin Jiova dɔn tɛl am. Wetin dɛn bin se? Dɛn bin ansa se: ‘Wi go du ɔl wetin Jiova tɛl wi fɔ du.’

Mozis go bak ɔp di mawntin. Na de Jiova tɛl am se: ‘Insay tri dez, a go tɔk to yu. Wɔn di pipul dɛn fɔ mek dɛn nɔ tray fɔ kam ɔp Mawnt Saynay.’ Mozis go bak to di Izrɛlayt dɛn ɛn tɛl dɛn fɔ rɛdi fɔ yɛri wetin Jiova go se.

Tri dez leta, di Izrɛlayt dɛn si laytin ɛn dak klawd ɔp di mawntin. Dɛn yɛri bak lawd tɛnda ɛn ɔn de blo. Dɔn Jiova kam dɔŋ di mawntin insay faya. Di Izrɛlayt dɛn bin de rili fred ɛn trimbul. Di wan ol mawntin bin shek bad bad wan ɛn smok bin de ɔlsay. Di ɔn in sawnd bin de lawd mɔ ɛn mɔ. Dɔn Gɔd tɛl dɛn se: ‘Mi na Jiova. Una nɔ fɔ wɔship no ɔda gɔd.’

Mozis go bak ɔp di mawntin, ɛn Jiova bin gi am lɔ dɛn fɔ di pipul dɛn bɔt aw dɛn fɔ wɔship Am ɛn aw dɛn fɔ biev. Mozis bin rayt di lɔ dɛn ɛn rid am to di Izrɛlayt dɛn. Dɛn bin prɔmis se: ‘Wi go du ɔl wetin Jiova tɛl wi fɔ du.’ Yɛs, dɛn bin prɔmis Gɔd. Bɔt dɛn go du wetin dɛn dɔn prɔmis?