Ɛzra Bin Tich Gɔd in Lɔ

Na lɛk 70 ia bin dɔn pas we bɔku Izrɛlayt dɛn go bak na Jerusɛlɛm. Bɔt sɔm bin stil de na difrɛn say dɛn usay di Pashian dɛn bin de rul. Wan pan dɛn na di prist we nem Ɛzra we de tich Jiova in Lɔ. Ɛzra kam fɔ no se pipul dɛn na Jerusɛlɛm nɔ de fala Jiova in lɔ, so i bin want fɔ go de fɔ go ɛp dɛn. Di kiŋ na Pashia we nem Atazaksis tɛl am se: ‘Gɔd mek yu gɛt sɛns so dat yu go tich pipul dɛn in Lɔ. Kɛr go ɛnibɔdi we want fɔ go wit yu.’ Ɛzra go to di wan dɛn we want fɔ go bak na Jerusɛlɛm. Dɛn pre to Jiova fɔ protɛkt dɛn as dɛn de travul, ɛn dɛn stat fɔ go.

Afta 4 mɔnt, dɛn rich na Jerusɛlɛm. Di prins dɛn we de de tɛl Ɛzra se: ‘Di Izrɛlayt dɛn dɔn pwɛl Jiova in lɔ, ɛn dɛn dɔn mared uman dɛn we de wɔship lay lay gɔd dɛn.’ Wetin Ɛzra du? Ɛzra nil dɔŋ bifo ɔl di pipul dɛn ɛn pre se: ‘Jiova, yu dɔn du bɔku tin dɛn fɔ wi, bɔt wi dɔn sin agens yu.’ Di pipul dɛn ripɛnt, bɔt dɛn bin stil de du tin dɛn we nɔ rayt. Ɛzra pik bigman dɛn ɛn jɔj dɛn fɔ andul dɛn prɔblɛm dɛn de. Afta tri mɔnt, dɛn drɛb di wan dɛn we nɔ de wɔship Jiova kɔmɔt na Jerusɛlɛm.

Twɛlv ia pas. Da tɛm de, dɛn bin de bil di wɔl dɛn na Jerusɛlɛm. So Ɛzra gɛda di pipul dɛn na di pɔblik ples, ɛn rid Gɔd in Lɔ to dɛn. We Ɛzra opin di buk, di pipul dɛn tinap. I prez Jiova, ɛn di pipul dɛn es dɛn an dɛn ɔp fɔ sho se dɛn gri. Dɔn Ɛzra rid ɛn ɛksplen di Lɔ to di pipul dɛn, ɛn dɛn tek tɛm lisin. Dɛn gri se dɛn dɔn kɔmɔt biɛn Jiova bak, ɛn dat mek dɛn kray. Di nɛks de, Ɛzra kɔntinyu fɔ rid di Lɔ to dɛn. Dɛn kam fɔ no se i nɔ go te igen dɛn go sɛlibret di Bafa Fɛstival. Wantɛm wantɛm, dɛn bigin fɔ pripia fɔ di fɛstival.

Fɔ sɛvin dez, di pipul dɛn gladi ɛn prez Jiova ɛn tɛl am tɛnki fɔ we dɛn ebul fɔ avɛst bɔku it. Dɛn nɔ ɛva gɛt dis kayn Bafa Fɛstival frɔm Jɔshwa in tɛm. Afta di fɛstival, di pipul dɛn gɛda ɛn pre to Jiova se: ‘Jiova, yu dɔn mek wi nɔ bi slev igen, yu fid wi di tɛm we wi bin de na dray land, ɛn yu gi wi dis fayn fayn land. Bɔt wi kɔntinyu fɔ sin agens yu. Yu sɛn prɔfɛt dɛn fɔ wɔn wi, bɔt wi nɔ lisin. Bɔt stil, yu peshɛnt wit wi. Yu du wetin yu prɔmis to Ebraam. Wi de prɔmis yu naw se wi go obe.’ Dɛn rayt wetin dɛn dɔn prɔmis, ɛn di prins dɛn, di Livayt dɛn, ɛn di prist dɛn bin sayn.