Jizɔs Fid Bɔku Pipul Dɛn

Jɔs bifo di Pasova insay di ia 32 afta Krays, di apɔsul dɛn kam bak frɔm dɛn prichin wok. Dɛn bin taya, so Jizɔs Krays bin tek bot ɛn kɛr dɛn go na Bɛtseda fɔ mek dɛn go blo. Bɔt we di bot kam nia di dray land, Jizɔs bin si se bɔku bɔku pipul dɛn bin dɔn fala dɛn. Pan ɔl we Jizɔs bin want fɔ de in wangren wit in apɔsul dɛn, i bin gladi fɔ wɛlkɔm di pipul dɛn. I mɛn di wan dɛn we sik ɛn i stat fɔ tich dɛn. Jizɔs bin yuz di wan ol de fɔ tich dɛn bɔt Gɔd in Kiŋdɔm. We ivintɛm rich, in apɔsul dɛn kam to am ɛn tɛl am se: ‘Di pipul dɛn go dɔn angri. Lɛf dɛn mek dɛn go so dat dɛn go fɛn sɔntin fɔ it.’

Jizɔs tɔk se: ‘Dɛn nɔ nid fɔ go. Una gi dɛn sɔntin fɔ it.’ Di apɔsul dɛn aks am se: ‘Yu want mek wi go bay bred fɔ dɛn?’ Filip we na wan pan di apɔsul dɛn tɔk se: ‘Ivin if wi gɛt bɔku mɔni, wi nɔ go ebul fɔ bay bred fɔ mek ɔl dɛn bɔku pipul dɛn ya it.’

Jizɔs aks se: ‘Ɔmɔs it wi gɛt?’ Andru tɔk se: ‘Wi gɛt fayv bred ɛn tu smɔl fish. Dat nɔ go ivin du.’ Jizɔs tɛl dɛn se: ‘Una gi mi di bred ɛn di fish.’ I tɛl di pipul dɛn fɔ mek dɛn sidɔm na di gras bay grup; sɔm grup bin gɛt 50 ɛn sɔm bin gɛt 100. Jizɔs tek di bred ɛn fish dɛn, i luk ɔp na ɛvin, ɛn pre. Dɔn i gi di it to di apɔsul dɛn, ɛn dɛn gi di pipul dɛn. Di 5,000 man dɛn, uman dɛn, ɛn pikin dɛn it te dɛn bɛlful. Afta dat, di apɔsul dɛn gɛda di it dɛn we dɛn lɛf so dat natin nɔ go west. Dɛn ful-ɔp 12 baskɛt dɛn! Dat na wɔndaful mirekul, nɔto so?

Di pipul dɛn rili kɔle wetin Jizɔs du, so dɛn bin want fɔ mek Jizɔs bi dɛn kiŋ. Bɔt Jizɔs bin no se nɔto da tɛm de Jiova want am fɔ mek i bi kiŋ. So i mek lɛ di pipul dɛn go, ɛn i tɛl in apɔsul dɛn fɔ go na di ɔda pat na di Si na Galili. Di apɔsul dɛn go insay dɛn bot, ɛn Jizɔs go ɔp wan mawntin in wangren. Wetin mek? Na bikɔs i bin nid tɛm fɔ pre to in Papa. Jizɔs de mek tɛm fɔ pre ɔltɛm, ilɛksɛf i bizi.