Jizɔs in Las Ivintɛm It

Di Ju dɛn bin de sɛlibret di Pasova ɛni ia. Dɛn bin de du am di 14 de insay di mɔnt we dɛn kɔl Naysan. Dis na bin fɔ mɛmba dɛn bɔt aw Jiova bin fri dɛn frɔm slev wok na Ijipt ɛn kam wit dɛn na di land we i bin dɔn prɔmis dɛn. Insay di ia 33 afta Krays, Jizɔs ɛn in apɔsul dɛn bin sɛlibret di Pasova ɔp wan rum na Jerusɛlɛm. We dɛn dɔn fɔ it, Jizɔs tɔk se: ‘Wan pan una gɛt fɔ kɔmɔt biɛn mi.’ Di apɔsul dɛn bin sɔprayz, so dɛn aks Jizɔs se: ‘Udat na di pɔsin?’ Jizɔs tɔk se: ‘Na di man we a go gi dis bred.’ Dɔn i kɔt smɔl bred ɛn gi am to Judas Iskariɔt. Wantɛm wantɛm, Judas grap ɛn kɔmɔt na di rum.

Afta Jizɔs pre, i tek wan bred ɛn brok am, dɔn i gi am to in apɔsul dɛn we bin stil de wit am. Jizɔs tɔk se: ‘Una it dis bred. I min mi bɔdi, we a go sakrifays fɔ una.’ Dɔn i pre pan di wayn ɛn gi in apɔsul dɛn. I tɔk se: ‘Una drink dis wayn. I min mi blɔd we a go sakrifays fɔ una, so dat Gɔd go fɔgiv una sin dɛn. A de prɔmis se una go bi kiŋ dɛn wit mi na ɛvin. Una go de du dis ɛni ia fɔ de mɛmba mi.’ Di wan dɛn we de fala Jizɔs kin mit togɛda ɛni ia dis sem tɛm. Dɛn de kɔl da mitin de naw, di Masta in Ivintɛm It.

Afta we dɛn dɔn fɔ it, di apɔsul dɛn bin bigin fɔ agyu bɔt udat impɔtant pas dɛn ɔl. Bɔt Jizɔs tɛl dɛn se: ‘Di wan we impɔtant pas una ɔl na di wan we de si insɛf as di smɔl wan we nɔ impɔtant.

‘Una na mi padi dɛn. A de tɛl una ɔl wetin mi Papa want fɔ mek a tɛl una. I nɔ go te igen, a de go to mi Papa na ɛvin. Una go lɛf biɛn ɛn pipul dɛn go no se una na mi disaypul dɛn bay di kayn lɔv we una de sho to una kɔmpin dɛn. Una fɔ lɛk una kɔmpin dɛn jɔs lɛk aw a lɛk una.’

Faynali, Jizɔs pre fɔ mek Jiova protɛkt ɔl in disaypul dɛn. I aks Jiova fɔ ɛp in disaypul dɛn so dat dɛn go wok togɛda wit pis. I bin pre fɔ mek ɔlman tek Jiova in nem as sɔntin we oli. Dɔn Jizɔs ɛn in apɔsul dɛn bin siŋ prez to Jiova ɛn go na do. Di tɛm bin dɔn nia fɔ mek dɛn arɛst Jizɔs.