Dɛn Sɛn Pɔl na Rom

Pɔl bin dɔn fɔ du di prichin wok na Jerusɛlɛm afta i dɔn go prich rawnd di siti dɛn fɔ di tɔd tɛm. Na de dɛn arɛst am ɛn put am na prizin. Insay wan vishɔn na nɛt, Jizɔs tɛl Pɔl se: ‘Yu go go na Rom ɛn prich de.’ Dɛn pul Pɔl na Jerusɛlɛm ɛn kɛr am go na Sizeria usay i bin de na prizin fɔ tu ia. We Pɔl bin de bifo Gɔvnɔ Fɛstɔs, i tɔk se: ‘Una mek Siza jɔj mi na Rom.’ Fɛstɔs tɛl am se: “Ɛnti yu want mek Siza luk insay yu kes, yu de go to Siza.” Dɛn put Pɔl na ship fɔ go na Rom, ɛn tu Kristian brɔda dɛn we nem Lyuk ɛn Aristakɔs bin go wit am.

We dɛn de na si, big big briz bigin fɔ blo, ɛn i kɔntinyu fɔ blo fɔ sɔm dez. Dɛn ɔl bin tink se dɛn go day insay di ship. Bɔt Pɔl tɔk se: ‘Man dɛn, wan enjɛl tɛl mi insay mi drim se: “Pɔl, nɔ fred. Yu go rich na Rom ɛn ɔlman we de na di ship go sev.” Una tek kɔrej! Wi nɔ go day.’

Di big big briz blo fɔ 14 dez. Faynali, dɛn si land. Na wan ayland we nem Mɔlta. Di ship bin fasin ɛn pwɛl bad bad wan. Bɔt ɔl di 276 pipul dɛn we bin de insay di ship rich na di dray land sef wan. Sɔm pan dɛn swim ɛn ɔda wan dɛn ol sɔm pan di tin dɛn we brok brok pan di ship, ɛn dɛn flot go na di bich. Di pipul dɛn na Mɔlta kia fɔ dɛn, ɛn dɛn mek faya fɔ mek dɛn wam dɛnsɛf.

Tri mɔnt afta dat, di sojaman dɛn yuz ɔda ship fɔ kɛr go Pɔl na Rom. We dɛn rich, di brɔda dɛn kam mit Pɔl. We Pɔl si dɛn i tɛl Jiova tɛnki, ɛn i tek kɔrej. Pan ɔl we Pɔl na bin prizina, dɛn alaw am fɔ de na wan os we dɛn rɛnt ɛn sojaman dɛn bin de gayd am. I de de fɔ tu ia. Pɔl bin de prich bɔt Gɔd in Kiŋdɔm to di pipul dɛn we de kam fɛn am ɛn tich dɛn bɔt Jizɔs. Pɔl rayt lɛta dɛn bak to di kɔngrigeshɔn dɛn na Eshia Minɔ ɛn Judia. Jiova rili yuz Pɔl fɔ prich di gud nyuz na bɔku neshɔn dɛn.