STƆDI 14

Mek di Men Pɔynt dɛn Klia

Di Ibru Pipul Dɛn 8:1

WETIN FƆ DU: Ɛp di pipul dɛn fɔ lisin we yu de tɔk, ɛn mek lɛ dɛn si aw di men pɔynt dɛn gɛt sɔntin fɔ du wit yu gol ɛn wetin yu de tɔk bɔt.

Sɛt yu gol. Tink if wetin yu de tɔk na fɔ jɔs gi mɛsej, mek pipul dɛn biliv sɔntin, ɔ fɔ ɛnkɔrej dɛn fɔ lisin to yu, dɔn pripia yu tɔk da we de. Mek shɔ se ɔl di pɔynt dɛn ɛp yu fɔ mitɔp yu gol.

Aks yusɛf dɛn kwɛstyɔn dɛn ya: ‘Us dawt ɔ kwɛstyɔn dɛn di pipul dɛn go gɛt bɔt dis tɔpik? Uskayn we dɛn go aks di kwɛstyɔn dɛn ɔ tɔk bɔt di tin dɛn we de dawt dɛn?’ Dɔn arenj yu pɔynt dɛn da sem we de so dat di pipul dɛn go lisin, ɔndastand, ɛn gri wit wetin yu de tɔk.
Tɔk mɔ bɔt di tim fɔ yu tɔk. Tɔk bɔt di tim we yu de gi di tɔk bay we yu de ripit di men wɔd dɛn pan yu tim ɔ yuz ɔda wɔd dɛn we min di sem tin.
Mek di men pɔynt dɛn klia ɛn simpul. Pik di men pɔynt dɛn nɔmɔ we gɛt fɔ du wit yu tim ɛn we yu go ebul fɔ tich fayn fayn wan insay di tɛm we dɛn gi yu. Nɔ pik bɔku men pɔynt dɛn, ɛksplen ɛni men pɔynt klia wan, wet smɔl bifo yu ɛksplen di ɔda wan, ɛn tek tɛm muv frɔm wan pɔynt to di ɔda pɔynt.

Yu kin ɛksplen di men pɔynt dɛn we yu jɔs stat fɔ tɔk fɔ ɛp di pipul dɛn fɔ lisin ɔ yu kin ɛksplen am bak we yu de dɔn fɔ tɔk fɔ ɛp dɛn fɔ mɛmba.