Wetin Mek Pipul dɛn Kin Pre?

Yu na pɔsin we kin pre ɔltɛm? Na so bɔku pipul dɛn kin du, ivin sɔm pan di wan dɛn we se dɛn nɔ biliv Gɔd. Bɔt wetin mek pipul dɛn de pre? We dɛn chɛk insay Frans, af pan di pipul dɛn se sɔntɛnde dɛn kin pre ɔ tink gud wan “jɔs fɔ lɛ dɛn fil fayn.” Dɛn tan lɛk bɔku pipul dɛn we de na Yurop we nɔ de pre fɔ wɔship Gɔd. Bɔt dɛn jɔs de pre bikɔs “prea de mek dɛn fil fayn.” Sɔm pipul dɛn we biliv Gɔd de pre to am di tɛm nɔmɔ we dɛn gɛt prɔblɛm, ɛn dɛn kin fil se Gɔd fɔ ansa dɛn prea wantɛm wantɛm.—Ayzaya 26:16.

We yu, wetin yu go se bɔt prea? Yu tink se prea jɔs de nɔmɔ fɔ ɛp yu fɔ tink klia wan? If yu na pɔsin we biliv Gɔd, yu dɔn si di we aw prea de ɛp yu? Ɔ yu tink se Gɔd nɔ de ansa yu prea? Di Baybul go ɛp yu fɔ no se prea nɔ de fɔ mek yu fil fayn nɔmɔ, bɔt na spɛshal tin we go ɛp yu fɔ kam nia Gɔd.