DI BAYBUL IN ANSA TO SƆM KWƐSTYƆN DƐN
Wetin mek wi fɔ mɛmba Jizɔs in day wan?
Us blɛsin dɛn jizɔs in day go kam wit?—Ayzaya 25:8; 33:24
Jizɔs in day impɔtant pas ɛnitin we dɔn ɛva apin na dis wɔl. I day fɔ gi mɔtalman di kayn layf we dɛn bin fɔ dɔn gɛt. Gɔd nɔ bin mek mɔtalman fɔ lɛ dɛn du bad tin, ɔ fɔ lɛ dɛn sik, ɔ day. (Jɛnɛsis 1:31) Bɔt Adam, we na di fɔs mɔtalman, briŋ sin kam na di wɔl. Jizɔs gi in layf so dat i go pul wi pan sin ɛn day.—Rid Matyu 20:28; Lɛta Fɔ Rom 6:23.
Gɔd bin sho se i rili lɛk wi we i sɛn in Pikin na dis wɔl fɔ kam day fɔ wi. (Jɔn In Fɔs Lɛta 4:9, 10) Jizɔs tɛl in disaypul dɛn fɔ mek wan smɔl program fɔ mɛmba in day. I tɛl dɛn fɔ yuz bred ɛn wayn pan di program. We wi de du dis ɛvri ia, wi de sho se wi rili gladi fɔ di lɛk we Gɔd ɛn Jizɔs dɔn sho se dɛn lɛk wi.—Rid Lyuk 22:19, 20.
Udat dɛn fɔ it di bred ɛn drink di wayn?
Di fɔs tɛm we Jizɔs tɛl in disaypul dɛn fɔ mɛmba in day, i tɛl dɛn bɔt wan agrimɛnt. (Matyu 26:26-28) Dis agrimɛnt mek am pɔsibul fɔ lɛ Jizɔs in disaypul dɛn ɛn sɔm ɔda pipul dɛn gɛt di chans fɔ bi kiŋ ɛn prist wit Jizɔs na ɛvin. Di wan dɛn we gɛt fɔ bi kiŋ ɛn prist wit Jizɔs na ɛvin nɔ bɔku. Pan ɔl we bɔku bɔku pipul dɛn kin kam di program fɔ mɛmba Jizɔs in day, na di wan dɛn nɔmɔ we de pan di agrimɛnt kin it di bred ɛn drink di wayn.—Rid Rɛvɛleshɔn 5:10.
Na lɛk 2,000 ia so dɔn pas, we Jiova de pik di wan dɛn we fɔ bi kiŋ. (Lyuk 12:32) Di wan dɛn we gɛt fɔ bi kiŋ nɔ bɔku we yu kɔmpia dɛn to di wan dɛn we go de sote go na dis wɔl.—Rid Rɛvɛleshɔn 7:4, 9, 17.