DI BAYBUL IN ANSA TO SƆM KWƐSTYƆN DƐN

Aw Jizɔs in day bɛnifit wi?

We Gɔd mek mɔtalman, i bin want mek dɛn de na di wɔl sote go; i nɔ bin ɛva want mek dɛn sik ɔ day. Bɔt di fɔs man we na Adam, nɔ bin obe di Pɔsin we mek am, ɛn i lɔs di chans fɔ ebul liv sote go. Bikɔs na Adam bɔn wi, na dat mek wi de day. (Lɛta Fɔ Rom 5:8, 12; 6:23) Di tru Gɔd we na Jiova, sɛn in Pikin we na Jizɔs, fɔ kam na di wɔl ɛn day, so dat i go gi wi bak wetin Adam bin dɔn lɔs.—Rid Jɔn 3:16.

Jizɔs in day de mek Gɔd fɔgiv wi fɔ wi sin dɛn ɛn mek wi ebul gɛt layf we go de sote go. Di Baybul sho wi aw layf go tan lɛk na dis wɔl we wi nɔ go de ol, sik, ɛn day igen.—Rid Ayzaya 25:8; 33:24; Rɛvɛleshɔn 21:4, 5.

Aw wi fɔ mɛmba Jizɔs in day?

Di ivintɛm bifo Jizɔs day, i bin tɛl di wan dɛn we de fala am, fɔ mek wan smɔl savis fɔ de mɛmba in day. Wi fɔ de mɛmba Jizɔs in day dis sem we ɛvri ia. Dis go mek wi ebul tink gud wan bɔt di we aw Jizɔs ɛn Jiova lɛk mɔtalman.—Rid Lyuk 22:19, 20; Jɔn In Fɔs Lɛta 4:9, 10.

Dis ia, di de we wi de mɛmba Jizɔs in day go bi Mɔnde, Epril 14, afta di san dɔn go dɔŋ. Wi de invayt yu fɔ jɔyn Jiova Witnɛs dɛn we de nia yu, fɔ mɛmba Jizɔs in day.—Rid Lɛta Fɔ Rom 1:11, 12.